បន្ទាយមានជ័យ ៖ មានករណីគ្រោះថ្នាក់ចរាចរណ៍មួយ កើតឡើងសែនហួសចិត្ត គឺមានស្ត្រីជាកម្មករធ្វើផ្លូវម្នាក់ ក្ដៅពេក ឃើញរឡូឈប់ ក៏រត់មកអង្គុយផ្អែកនឹងកង់រឡូ ស្រាប់តែតៃកុងរឡូឡើងបើកមិនបានមើល បុកស្លាប់កំប៉ែតដូចចេកចៀន កាលពីវេលាម៉ោង៣រសៀល ថ្ងៃទី១៤ ខែវិច្ឆិកា ឆ្នាំ២០១៨ នៅចំណុចផ្លូវវាងក្រុង ស្ថិតក្នុងភូមិបត់ត្រង់ ឃុំឫស្សីក្រោក ស្រុកមង្គលបូរី ខេត្តបន្ទាយមានជ័យ។
លោកវរសេនីយ៍ត្រី ងួន ភារម្យ មេបញ្ជាការមូលដ្ឋានកងរាជអាវុធហត្ថស្រុកមង្គលបូរី បានប្រាប់អ្នកយកព័ត៌មានឲ្យដឹងថា ជនរងគ្រោះមានឈ្មោះ វ៉ាន់ ឈៀក ភេទស្រី អាយុ៣៨ឆ្នាំ រស់នៅភូមិព្រែករពៅ ឃុំឫស្សីក្រោក ស្រុកមង្គលបូរី ខេត្តបន្ទាយមានជ័យ។
លោកបញ្ជាក់ឲ្យដឹងទៀតថា នៅមុនពេលកើតហេតុនោះ អ្នកបើករឡូបើកមកឈប់នៅកន្លែងកើតហេតុ ដោយមិនបានពន្លត់ម៉ាស៊ីន ហើយក៏បានចុះពីរឡូទៅនោមស្របពេលនោះ ស្ត្រីរងគ្រោះ ដោយធ្វើការក្ដៅពេក ក៏រត់មកជ្រកនៅមុខកង់រឡូ ហើយបានផ្អែកនៅកង់រឡូ ដោយមិនបានចាប់អារម្មណ៍អ្វីទាំងអស់ ដោយសារមេឃក្ដៅពេក ពេលនោះអ្នកបើករឡូពេលដែលនោមហើយ ក៏មកបើករឡូវិញមិនបានចាប់អារម្មណថា មានមនុស្សនៅមុខកង់រឡូ ក៏បើករឡូបុកស្លាប់កំប៉ែតដូចចេកចៀនតែម្ដង។ ក្រោយពីកើតហេតុ អ្នកបើករឡូចុះគេចខ្លួនបាត់។
ចំណែកសព ត្រូវបានក្រុមគ្រួសារដឹកយកមកធ្វើបុណ្យនៅផ្ទះតាមប្រពៃណី រីឯរឡូ ត្រូវបានសមត្ថកិច្ចបើកយកមករក្សាទុកនៅអធិការស្រុកមង្គលបូរី ដើម្បីដោះស្រាយនៅពេលក្រោយ៕
Source: Kampuchea Thmey Daily
0 Comments