ចាន់ សាន់ ប្រកួត​បង្គ្រប់កិច្ច ខណៈ ប៊ុន សុធា ត្រូវការ​ឈ្នះ​ក្នុង​ជម្រុះ​ខ្សែក្រវាត់​គូ​បូ​តា​ជុំ​ចុង​ក្រោយ​នេះ​

ការប្រកួត​ជម្រុះ​ដណ្ដើម​ខ្សែក្រវាត់​ជើងឯក​លេខ​១​គូ​បូ​តា ​ទម្ងន់​៥៤​គីឡូក្រាម នៅ​សង្វៀន​បាយ័ន​ស្ទឹងមានជ័យ នៅ​យប់​ថ្ងៃ​សុក្រ ​ទី​១៦ ខែ​វិច្ឆិកា​ ឆ្នាំ​២០១៨​នេះ ដែល​ជា​ការប្រកួត​ជុំ​ចុងក្រោយ​របស់ ​ចាន់ សាន់​ និង ប៊ុន សុធា។​
​ ​
សម្រាប់​ជំនួប​ជុំ​ចុង​ក្រោយនេះ ចាន់ សាន់ អ្នក​ប្រដាល់​ក្លិប​និរោធ​មានជ័យ ត្រូវ​ជួប​ជាមួយ​អ្នក​ប្រដាល់​ឡាវ Seang Suriyak Site Torkah kart ហើយ​ចំពោះ ប៊ុន សុធា អ្នក​ប្រដាល់​សមាគម​កីឡា​ក្រសួងការពារជាតិ ជួប​អ្នក​ប្រដាល់​ឡាវ​ដែរ គឺ Wangngeun Rungreankilanakom Phattom។​
​ ​
រវាង ចាន់ សាន់ និង Seang Suriyak មិនដែល​ប៉ះ​គ្នា​ទេ​កន្លងមក។ តែ​យ៉ាងណា ចាន់ សាន់​ប្រហែល​ជា​មិនមាន​សំណាង​បានឈ្នះ​នោះទេ ព្រោះ​អ្នក​ប្រដាល់​ឡាវ Seang Suriyak ជា​ជើង​ខ្លាំង​មិនទាន់​ស្គាល់​ចាញ់​ម្ដង​នៅឡើយ​ទេ ក្នុង​ការ​ប្រកួត​ជម្រុះ​៣​ជុំ​កន្លង​មកនេះ ពោល​គឺ​គេ​វាយ​ឈ្នះ​អ្នក​ប្រដាល់​កម្ពុជា​ទាំង​ជុំ។​
​ ​
Seang Suriyak នេះ ទើប​ប្រកួត​បាន​៣​ជុំ​ប៉ុណ្ណោះ មាន​៩​ពិន្ទុ​ហើយ ឯ​ចាន់ សាន់ អ្នក​ប្រដាល់​កម្ពុជា​យើង​វិញ​នោះ គេ​ប្រកួត​៤​ជុំ​ហើយ ដោយ​បាន​៦​ពិន្ទុ គឺ​ឈ្នះ​១ ចាញ់​៣​ប្រកួត។​ ដូច្នេះ សម្រាប់​ការ​ប្រកួត​ជុំ​ទី​៥ ដែល​ជា​ជុំ​ចុងក្រោយ​របស់​ចាន់​សាន់​នេះ គេ​ប្រកួត​គ្រាន់តែ​បង្គ្រប់កិច្ច​ប៉ុណ្ណោះ ព្រោះ ទោះបី​ការប្រកួត​លើកចុងក្រោយ​នេះ គេ​មាន​វាសនា​បានឈ្នះ​ក្ដី ក៏​នៅតែ​ជ្រុះ​ធ្លាក់​ពី​ការប្រកួត​ខ្សែ​ក្រវាត់​នេះដែរ។​
​
តែ​ទោះជា​យ៉ាងណា សម្រាប់​ការជួបគ្នា​រវាង​ ចាន់ សាន់ និង Seang Suriyak នេះ បើតាម​ការ សន្និដ្ឋាន​មុន​នោះ គឺ​ចាន់ សាន់ មិនអាច​ឈ្នះ Seang Suriyak នេះ​បានឡើយ ព្រោះ​អ្នក​ប្រដាល់​ឡាវ រូប​នេះ​គេ​ខ្លាំង គេ​បាន​យកឈ្នះ​ ខេ​ម ចាន់ ផាន ផាត់​យុទ្ធ និង​ប៊ុន​សុធា អស់ហើយ។​
​
ចំពោះ ប៊ុន សុធា អ្នក​ប្រដាល់​សមាគម​កីឡាប្រដាល់​ក្រសួងការពារជាតិ ដែល​ត្រូវ​ជួប​ជាមួយ​អ្នក​ប្រដាល់​ឡាវ Wangngeun Rungreankilanakom Phattom នោះ ប្រហែលជា​មិន​ពិបាក​ប៉ុន្មាន​ទេ ដោយ​សារ​អ្នក​ប្រដាល់​ឡាវ​រូបនេះ មិនសូវ​ខ្លាំង​ប៉ុន្មាន។

រវាង ប៊ុន សុធា និង Wangngeun មិនដែល​ប៉ះគ្នា​ទេ​កន្លងមក​។ តែ​យ៉ាងណា ប៊ុន សុធា សម្រាប់​ការ​ប្រកួត​លើក​នេះ គឺ​គេ​ត្រូវការ​ឈ្នះ​ជា​ចាំបាច់ ដើម្បី​សន្សំ​ពិន្ទុ​សម្រាប់​ប្រជែង​ជាមួយ ខេ​ម ចាន់ និង​ផាន ផាត់​យុទ្ធ ក្នុងការ​ឡើងទៅ​ពាក់កណ្ដាល​ផ្ដាច់ព្រ័ត្រ​នោះ។
​
ទោះជា​យ៉ាងនេះ​ក្តី សម្រាប់​ការជួបគ្នា​រវាង​ ប៊ុន សុធា និង Wangngeun នេះ ពុំ​អាចសន្និដ្ឋាន​មុន​ថា អ្នកណា​ឈ្នះ អ្នកណា​ចាញ់​នោះឡើយ ហើយពីរ​នាក់​នេះ ក៏​មិន​អាចមាន​អ្នកណាម្នាក់​មើលស្រាល​គ្នា​បានដែរ។​

Wangngeun នេះ ជា​អ្នក​ប្រដាល់​ឡាវ​មិនមាន​ឈ្មោះ​ល្បី នៅ​ស្រុក​ឡាវ​នោះ​ទេ។ ​គេ​មិន​ធ្លាប់​មក​ប្រកួត​នៅ​ស្រុក​ខ្មែរ​ទេ​កន្លងមក​។ ក្នុងការ​ប្រកួត​៤​ប្រកួត​កន្លងមកនេះ គេ​វាយ​ឈ្នះ​២ ចាញ់​២​ប្រកួត មាន​៨​ពិន្ទុ។
​
ប៊ុន សុធា អ្នក​ប្រដាល់​វ័យក្មេង​កម្ពុជា គេ​ក៏​មិនធម្មតា​នោះដែរ គេ​មាន​ផ្លែ​ល្អ ពិសេស​កែង ​និង​ជង្គង់ ដែល​ក្នុងការ ឆ្លងកាត់​៤​ប្រកួត​ដូចគ្នា គេ​ឈ្នះ​៣ ចាញ់​១​ប្រកួត មាន​១០​ពិន្ទុ​លើក។
​
សូមបញ្ជាក់ថា កីឡាករ​ខ្លាំង​ទាំង​១០​រូប ដែល​ចូលរួម​ប្រកួត​ដណ្ដើម​ខ្សែក្រវាត់​គូ​បូ​តា​រដូវ​កាល​ថ្មី​ទម្ងន់​៥៤​គីឡូក្រាម​នេះ មាន​អ្នក​ប្រដាល់​ជើង​ខ្លាំង​កម្ពុជា​៥​រូប និង អ្នក​ប្រដាល់​ជើង​ខ្លាំង​ថៃ​-​ឡាវ ៥​រូប ចូល​រួម​វាយ​ដណ្ដើម​យក​ខ្សែក្រវាត់​នេះ។​
​
អ្នក​ប្រដាល់​ជើង​ខ្លាំង​ទាំង​៥​រូប​របស់​កម្ពុជា​នោះ គឺ​ចាន់ សាន់ ក្លិប​និរោធ​មានជ័យ​-​ខេ​ម ចាន់ ក្លិប​កងពលតូច​ទ័ព​ឆ័​ត្រ​យោង​៩១១ - ផាន ផាត់​យុទ្ធ ក្លិប​សាល​វ័​ន្ត​កីឡា - ប៊ុន សុធា សមាគម​កីឡា​ក្រសួង​ការពារជាតិ និង រិ​ទ្ធ អាទិត្យ ក្លិប​អាណាចក្រ​គុន​ខ្មែរ។ ​អ្នក​ប្រដាល់​ទាំង​៥​រូប​នេះ សុទ្ធតែ​ចម្រាញ់​ចេញពី​ក្នុងចំណោម​កីឡាករ​៨​រូប ក្នុង​ការ​ប្រកួត​ជម្រុះ​កន្លងមក។​
​
ចំពោះ​អ្នក​ប្រដាល់​ថៃ​វិញ មាន Anuntasak Site Phukhorngyus , Kaoreanghom Pctchchinda និង Plangthip Por.Yuthphumi ហើយ​អ្នក​ប្រដាល់​ឡាវ មាន Wangngeun Rungreankilanakom Phattom និង Seang Suriyak Site Torkah kart។
​
អ្នក​ប្រដាល់​មួយរូបៗ ទាំង​ខ្មែរ ទាំង​ថៃ និង​ឡាវ គឺ​ត្រូវ​ឆ្លងកាត់​ការប្រកួត​ក្នុង​ម្នាក់ៗ ចំនួន​៤ ប្រកួត​ម្នាក់ ហើយ​អ្នក​ដែល​មាន​ពិន្ទុ​ច្រើន​២​រូប​ក្នុង​មួយ​ពូ​ល ទាំង​ពូ​ល​ខ្មែរ និង ពូ​ល​ថៃ​-​ឡាវ នឹង​ត្រូវ​បាន​ឡើង​ទៅ​ប្រកួត​វគ្គ​ពាក់កណ្ដាល​ផ្ដាច់ព្រ័ត្រ និង ផ្ដាច់ព្រ័ត្រ ៕



​

Source: Kampuchea Thmey Daily