រតនគិរី ៖ បុរសជាងផ្សារដែកម្នាក់ ត្រូវជាកូនជាងម្ចាស់សិប្បកម្ម ឈាងរ៉ា (ញ៉ាញ់) ខ្វះការប្រុងប្រយ័ត្ន ប៉ះនឹងខ្សែកាបភ្លើងស្រាតឆក់ស្លាប់ភ្លាមៗយ៉ាងសង្វេគ។
ហេតុការណ៍នេះ បានកើតឡើងកាលពីវេលាម៉ោង០៩និង៣០នាទីព្រឹក ថ្ងៃពុធ ៧កើត ខែកត្តិក ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៤ ខែវិច្ឆិកា ឆ្នាំ២០១៨ នៅចំណុចផ្ទះ"យីហោ" បែប ប៊ី ម៉ាតលីហួរវេរលុយ ក្បែររង្វង់មូល ស្ថិតនៅក្នុងភូមិជ័យជំនះ សង្កាត់ឡាបានសៀក ក្រុងបានលុង។
នគរបាលមូលដ្ឋានបានបញ្ជាក់ថា ជនរងគ្រោះមានឈ្មោះ ធា ភេទប្រុស អាយុ៣៤ឆ្នាំ ជនជាតិខ្មែរ មានប្រពន្ធនិងកូន២នាក់ ហើយជនរងគ្រោះមានមុខរបរកូនជាងផ្សារដែក រស់នៅភូមិ/ឃុំកើតហេតុខាងលើ។
ក្រោយពីកើតហេតុ នគរបាលក្រុងបានលុង និងបងប្អូនសាច់ញាតិដឹកបានជនរងគ្រោះទៅមន្ទីរពេទ្យបង្អែកខេត្ត ដើម្បីជួយសង្គ្រោះ តែដឹកដល់មន្ទីរពេទ្យលោកគ្រូពេទ្យប្រាប់ថា ជនរងគ្រោះបានដាច់ខ្យល់ស្លាប់បាត់ទៅហើយ ទើបបងប្អូនសាច់ញាតិដឹកសាកសពត្រឡប់ទៅផ្ទះវិញ។
បើតាមនគរបាលបានបញ្ជាក់ទៀតថា យោងតាមការត្រួតពិនិត្យនៅកន្លែងកើតហេតុនោះ ម្ចាស់ផ្ទះលីហួរវេរលុយខាងលើ បានជួលឲ្យក្រុមជាងផ្សារដែកមានគ្នា២ ទៅ៣នាក់ ឡើងលើដំបូលផ្ទះមានកម្ពស់ជាង១០ម៉ែត្រ ដើម្បីផ្សារដែក និងប្រក់ដំបូលផ្ទះ ខណៈកំពុងលើកស័ង្កសី ក៏ប៉ះនឹងខ្សែកាបភ្លើងស្រាត(មេ) ទើបបណ្ដាលឲ្យឆក់ជនរងគ្រោះធ្លាក់ពីលើដំបូលមកដល់ដីស្លាប់ភ្លាមៗនៅនឹងកន្លែងកើតហេតុតែម្ដង។
នគរបាលបានបន្តថា ជនរងគ្រោះពិតជាស្លាប់ដោយសារខ្សែភ្លើងឆក់ពិតប្រាកដមែន គ្មានរឿងអ្វីផ្សេងនោះទេ ហើយសាកសព ត្រូវបានប្រពន្ធ និងសាច់ញាតិ ដឹកយកទៅធ្វើបុណ្យតាមប្រពៃណីនៅគេហដ្ឋានជនរងគ្រោះ៕
Source: Kampuchea Thmey Daily
0 Comments