កំពង់ឆ្នាំង ៖ ក្មេងទំនើងចំនួន០៨នាក់ ដែលសុទ្ធតែជាអ្នកប្រើប្រាស់គ្រឿងញៀន ត្រូវបានសមត្ថកិច្ចនគរបាលខេត្តកំពង់ឆ្នាំង ធ្វើការស្រាវជ្រាវចាប់ខ្លួនបាន រួមជាមួយម៉ូតូចំនួន០៦គ្រឿង នៅព្រឹកថ្ងៃទី១៤ ខែវិច្ឆិកា ឆ្នាំ២០១៨ បន្ទាប់ពីពួកគេបានធ្វើសកម្មភាពគប់កញ្ចក់ឡាន នៅក្នុងភូមិសាស្ត្រស្រុករលាប្អៀរ និងស្រុកបរិបូណ៌ កាលពីយប់ថ្ងៃទី១២ និង១៣ ខែវិច្ឆិកា ឆ្នាំ២០១៨ មុននេះ។
លោកឧត្ដមសេនីយ៍ទោ ឡុច វណ្ណារា ស្នងការនគរបាលខេត្តកំពង់ឆ្នាំង នៅល្ងាចថ្ងៃទី១៤ ខែវិច្ឆិកាឆ្នាំ២០១៨ នេះ បានផ្ដល់បទសម្ភាសន៍ជាមួយក្រុមអ្នកកាសែតក្នុងខេត្តកំពង់ឆ្នាំងឲ្យដឹងថា ក្មេងទំនើងចំនួន០៨នាក់ ក្នុងចំណោម១១នាក់ នៅថ្ងៃទី១៤វិច្ឆិកានេះ សមត្ថកិច្ចនគរបាលខេត្តកំពង់ឆ្នាំងសហការជាមួយនគរបាលស្រុកបរិបូណ៌ បានធ្វើការតាមចាប់ខ្លួនបាន ជាមួយនឹងម៉ូតូចំនួន០៦គ្រឿង បន្ទាប់ពីពួកគេបានធ្វើសកម្មភាពគប់កញ្ចក់ឡានធំៗ នៅយប់ ថ្ងៃទី១២ និង១៣វិច្ឆិកា ក្នុងនោះបណ្ដាលឲ្យរថយន្តប្រមាណ២០គ្រឿងរងគ្រោះ និងបុរសម្នាក់បានរបួសបែកក្បាល។
លោកស្នងការបានបញ្ជាក់ឲ្យដឹងថា ក្នុងចំណោមបក្ខពួកគេទាំង០៨នាក់ គឺមានម្នាក់ជាមេខ្លោងឈ្មោះ អ៊ុំ ចន ជាអ្នកចែកចាយគ្រឿងញៀន ដែលបក្ខពួកគេទាំងអស់គ្នា គឺសុទ្ធប្រើប្រាស់គ្រឿងញៀន ទើបពួកគេមានភាពក្លាហាន និងសកម្មភាពល្មើសខាងលើនេះ ជាល្បែងលេងកម្សាន្តរបស់ពួកគេ។
លោក ឧត្ដមសេនីយ៍ត្រី ប៉ុល វុទ្ធី ស្នងការរងទទួលផែនព្រហ្មទណ្ឌបាននិយាយឲ្យដឹងថា នៅយប់ថ្ងៃទី១២ និង១៣ ពួកជនទំនើងទាំង០៨នាក់នេះ បានធ្វើសកម្មភាពពីភូមិស្មែត ឃុំស្វាយជ្រំ ស្រុករលាប្អៀរ ដល់ព្រំប្រទល់ស្រុកបរិបូណ៌ ជាប់ព្រំប្រទល់ស្រុកក្រគរ ខេត្តពោធិ៍សាត់ ដោយក្នុងរយៈពេល០២ថ្ងៃនេះ សមត្ថកិច្ចយើងទទួលពាក្យបណ្ដឹងតាមទូរស័ព្ទ ពីជនរងគ្រោះជាង២០នាក់។
ជនសង្ស័យទាំង០៨នាក់នេះ មាន ១-ឈ្មោះ ឌឿន សីហា អាយុ១៧ឆ្នាំ ,២-ឈ្មោះ ខាំ អៀង ម៉ាលី អាយុ២០ឆ្នាំ, ៣-ឈ្មោះ ម៉ាល់ ចាន់រ៉ុង អាយុ១៧ឆ្នាំ, ៤-ឈ្មោះ ហ៊ល សុខចាន់ អាយុ២០ឆ្នាំ, ៥-ឈ្មោះ យឿន ចាន់ឌី អាយុ១៨ឆ្នាំ, ៦-ឈ្មោះ សៀន ការ៉ាត អាយុ១៦ឆ្នាំ, ៧-ឈ្មោះ សេង ហាន អាយុ២០ឆ្នាំ ,និង៨-ឈ្មោះ អ៊ុំ ចន អាយុ៣០ឆ្នាំ ដែលពួកគេទាងអស់គ្នានេះ នៅក្នុងស្រុកបរិបូណ៌ទាំងអស់។
ដោយឡែកបក្ខពួកគេ២នាក់ទៀត សមត្ថកិច្ចកំពុងស្វែងរកចាប់ខ្លួន។
លោកស្នងការនគរបាលខេត្តកំពង់ឆ្នាំង ក៏សុំអំពាវនាវផងដែរ ដល់ប្រជាពលរដ្ឋរងគ្រោះទាំងអស់ដែលរងគ្រោះដោយសារជនទំនើងនេះ សូមមកដាក់ពាក្យបណ្ដឹងឲ្យបានទាន់ពេលវេលា ដើម្បីសមត្ថកិច្ចកសាងសំណុំរឿងបញ្ជូនជនសង្ស័យ ទៅតុលាការចាត់ការតាមផ្លូវច្បាប់។
ដោយឡែក ប្រសិនបើប្រជាពលរដ្ឋរងគ្រោះដោយករណីបែបនេះទៀតនោះ សូមមេត្តារាយការណ៍ជាបន្ទាន់ជូនសមត្ថកិច្ចដែលនៅជិតបំផុត ដើម្បីសហការបង្ក្រាបជនល្មើសឲ្យបានទាន់ពេលវេលា៕
Source: Kampuchea Thmey Daily
0 Comments