ភ្នំពេញ ៖ មន្ត្រីជាន់ខ្ពស់ នៃនាយកដ្ឋានឱសថ ចំណីអាហារ និងបរិក្ខារពេទ្យ និងគ្រឿងសំអាង នៃក្រសួងសុខាភិបាលបានស្នើឲ្យភោជនីយដ្ឋានជាង២ពាន់កន្លែងចូលរួមវគ្គបណ្ដុះបណ្ដាលស្ដីពីសុវត្ថិភាពចំណីអាហារ ដើម្បីក្លាយជាភោជនីយដ្ឋានមួយមានស្តង់ដារ សំដៅចូលរួមចំណែកកាត់បន្ថយអត្រាគ្រោះថ្នាក់ ដោយចំណីអាហារនៅកម្ពុជាឲ្យកាន់តែប្រសើរឡើង។
ថ្លែងក្នុងឱកាសបើកវគ្គបណ្ដុះបណ្ដាលស្ដីពីការអនុវត្តន៍ អនាម័យល្អ តាមភោជនីយដ្ឋាន និងអាហារដ្ឋានកាលពីថ្ងៃទី០៧ ខែវិច្ឆិកា ឆ្នាំ២០១៨ នៅសណ្ឋាគារភ្នំពេញ លោកឱសថបណ្ឌិត ហេង ប៊ុនគៀត ប្រធាននាយកដ្ឋានឱសថ ចំណីអាហារ និងបរិក្ខារពេទ្យ និងគ្រឿងសំអាង នៃក្រសួងសុខាភិបាល បានឲ្យដឹងថា គិតត្រឹមខែតុលានេះ មានភោជនីយដ្ឋាន និងអាហារដ្ឋាននៅទូទាំងប្រទេសសរុបចំនួន៤៥៦២ ក្នុងនោះមាន២០២០ ជាភោជនីយដ្ឋាន ដែលទទួលបានការបណ្ដុះបណ្ដាល ឬវិញ្ញាបនបត្រ អនាម័យចំណីអាហារ និងគោលការណ៍អនុវត្តន៍ល្អពីក្រសួងសុខាភិបាល និងជាង២ពាន់ នៅមិនទាន់សហការជាមួយក្រសួងសុខាភិបាលនៅឡើយទេ។
លោកឱសថបណ្ឌិត ហេង ប៊ុនគៀត បានបានបន្តទៀតថា ក្នុងចំណោមអាហារដ្ឋាន និងភោជនីយដ្ឋានទូទាំងប្រទេសសរុប៤៥៦២ ក្នុងនោះមានមានវិញ្ញាបនបត្រ អនាម័យ និងស្លាកសញ្ញា(Logo) ២០២០ ដោយមានLogo ចំនួន ១៤៣១ គឺកម្រិតល្អA-៤៣៥, បង្គួរB-១២៣ និងមធ្យមC-៣១ សម្រាប់ហាងដែលទទួលបានការបណ្ដុះបណ្ដាល និងវិញ្ញាបនបត្រ មិនទាន់បានទទួលបាន Logo ត្រូវបន្តប្រឹងប្រែងពង្រឹងគុណភាពបន្ថែមទៀត។
លោកឱសថបណ្ឌិត ហេង ប៊ុនគៀត បញ្ជាក់ថា ការបណ្ដុះបណ្ដាលស្ដីពីការអនុវត្តន៍ អនាម័យល្អ តាមភោជនីយដ្ឋាន និងអាហារដ្ឋាន គឺមិនមែនមានតែនៅកម្ពុជាយើងទេ គឺមានគ្រប់ប្រទេសបណ្ដាប្រទេស។
សម្រាប់កម្ពុជា ក៏នឹងបន្តប្រឹងប្រែងក្នុងការផ្ដល់ចំណេះដឹងដែលទទួលបានពីការបណ្ដុះបណ្ដាលពីក្រៅប្រទេស ក្រោមជំនួយពីរដ្ឋាភិបាល នូវែលហ្សេឡង់ មកអភិវឌ្ឍន៍វិស័យចំណីអាហារនៅកម្ពុជា ប្រកបដោយគុណភាព និងស្តង់ដារខ្ពស់ដូចបណ្ដាប្រទេសដូច្នេះដែរ។
ជាមួយគ្នានេះដែរ លោកឱសថបណ្ឌិត ហេង ប៊ុនគៀត បានអំពាវនាវដល់ម្ចាស់អាហារដ្ឋាន និងភោជនីយដ្ឋានទាំងអស់ សូមមកទទួលការវគ្គបណ្ដុះបណ្ដាលអនាម័យចំណីអាហារ និងគោលការណ៍អនុវត្តន៍ល្អ ឲ្យបានគ្រប់ៗគ្នា ដើម្បីបន្តពង្រឹងសមត្ថភាព លើគុណភាព អនាម័យ និងបំពេញកាតព្វកិច្ចជាអាជីវករមួយដ៏ត្រឹមត្រូវ ដើម្បីក្លាយជាភោជនីយដ្ឋានស្តង់ដារមួយដែលផ្ដល់ទំនុកចិត្ត និងទទួលបានកិត្តិយស ពីអតិថិជនជាភ្ញៀវជាតិ និងអន្តរជាតិ ពិសេសដើម្បីចូលរួមចំណែកក្នុងការកាត់បន្ថយអត្រាគ្រោះថ្នាក់ ដោយចំណីអាហារនៅកម្ពុជាផងដែរ៕
Source: Kampuchea Thmey Daily
0 Comments