ភ្នំពេញ ៖ កម្ពុជា-ថៃ បានរួមគ្នាជួយការពារសុវត្ថិភាព លើកកម្ពស់លក្ខខណ្ឌការងារ និងសុខុមាលភាពសង្គមដល់ពលករកម្ពុជាដែលធ្វើការនៅប្រទេសថៃឲ្យកាន់តែប្រសើរឡើងថែមទៀត។
ថ្លែងក្រោយពិធីចុះហត្ថលេខាលើអនុស្សរណៈ នៃការយោគយល់គ្នារវាងសមាគមទីភ្នាក់ងារហត្ថពលកម្មកម្ពុជា សមាគមជ្រើសរើសពលករកម្ពុជា និងសមាគមទំនាក់ទំនងកម្ពុជា-ថៃ កាលពីរាត្រីថ្ងៃទី០៧ ខែវិច្ឆិកា ឆ្នាំ២០១៨ នៅសណ្ឋាគារ ដឹ ក្រេដ ឌូក រាជធានីភ្នំពេញ លោក បណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈបានមានប្រសាសន៍ថាអនុស្សរណៈ នៃការយោគយល់គ្នានេះ គឺជាវឌ្ឍនភាព និងយន្តការបន្ថែមថ្មីមួយទៀតក្នុងការការពារដល់ពលករកម្ពុជា ដែលទៅធ្វើការនៅប្រទេសថៃបន្ថែមលើកិច្ចគាំពារ និងលើកកម្ពស់សិទ្ធិ សុខុមាលភាព ក៏ដូចជាអត្ថប្រយោជន៍ផ្សេងៗដល់ពលករខណៈមានពលករខ្មែរធ្វើការដោយស្របច្បាប់នៅប្រទេសថៃប្រមាណ១លាន៨ម៉ឺននាក់។
លោកបណ្ឌិតបានបន្តថា «ខ្ញុំគិតថា នេះគឺជាការបង្កើតដៃគូថ្មីមួយទៀតក្រៅពីស្ថាប័នរដ្ឋាភិបាលប្រទេសទាំងពីរកម្ពុជា-ថៃ ដើម្បីធ្វើយ៉ាងណាឲ្យបងប្អូនពលករខ្មែរធ្វើការនៅប្រទេសថៃកាន់តែមានសុខសុវត្ថិភាព និងទទួលបានការគាំពារពីច្បាប់ដូចពលករដទៃៗទៀតដែរ»។
លោករដ្ឋមន្ត្រីបានបន្ថែមថា រាជរដ្ឋាភិបាលបានយកចិត្តទុកដាក់ខ្ពស់បំផុតក្នុងការគាំពារ ការការពារសិទ្ធ និងផលប្រយោជន៍ពលករខ្មែរនៅបរទេសតាមរយៈកិច្ចសហប្រតិបត្តិការជាមួយរដ្ឋាភិបាល នៃប្រទេសទទួល និងការពង្រឹងការអនុវត្តច្បាប់ និងបទដ្ឋាននានា។
លោកបណ្ឌិត អ៊ិត សំហេង បានស្នើឲ្យសមាគមទាំងបីពិចារណាក្នុងការរៀបចំផ្ទះស្នាក់នៅបណ្ដោះអាសន្នសម្រាប់ពលករកម្ពុជានៅតាមតំបន់ក្នុងប្រទេសថៃ ដើម្បីអាចឲ្យពលករកម្ពុជាបានស្នាក់នៅបណ្ដោះអាសន្នក្នុងអំឡុងពេលប្ដូរការងារ ឬរង់ចាំការដោះស្រាយវិវាទជាមួយនិយោជក។
ជាមួយគ្នានេះដែរ លោករដ្ឋមន្ត្រីបានគាំទ្រនូវគម្រោងរបស់សមាគមទាំងបីដែលនឹងរៀបចំផ្តល់ជូនសេវាកម្មធានារ៉ាប់រងដល់ពលករកម្ពុជាលើការធានាគ្រោះថ្នាក់ការងារ និងអាយុជីវិតផងដែរ។
លោក តាណីត ណាំណយ ប្រធានសមាគមទំនាក់ទំនងកម្ពុជា-ថៃបានសន្យាថា នឹងជួយគាំពារសិទ្ធិសេរីភាព និងលើកកម្ពស់លក្ខខណ្ឌការងារដល់ពលករខ្មែរដែលកំពុងបម្រើការងារនៅប្រទេសថៃ ដូចពលករបរទេសផ្សេងទៀតដែរ។
លោក ពិន វិរៈ នាយកប្រតិបត្តិសមាគមជ្រើសរើសពលករកម្ពុជាបានមានប្រសាសន៍ថា នាពេលខាងមុខ សមាគមគ្រោងនឹងបង្កើតទីស្នាក់ការមួយនៅក្នុងប្រទេសថៃដើម្បីងាយស្រួលដល់ពលករខ្មែរទំនាក់ទំនងដូចជា ទាក់ទងតាមលេខទូរស័ព្ទ ឬទៅផ្ទាល់តែម្ដង នៅពេលដែលពលករមានបញ្ហាអ្វីមួយ។
គួរបញ្ជាក់ថា បច្ចុប្បន្ននេះមានពលករខ្មែរកំពុងធ្វើការដោយស្របច្បាប់នៅប្រទេសថៃប្រមាណ១លាន៨ម៉ឺននាក់ដោយក្នុង១ឆ្នាំៗបាននាំមកនូវប្រាក់ចំណូលចូលមកប្រទេសកម្ពុជាវិញប្រមាណជាង១ពាន់លានដុល្លារ៕
Source: Kampuchea Thmey Daily
0 Comments