ពលរដ្ឋអាមេរិកកណ្តាលរាប់រយនាក់បានទៅដល់ព្រំដែនភាគខាងត្បូងរបស់សហរដ្ឋអាមេរិកហើយកាលពីថ្ងៃពុធដោយផ្គើនទៅនឹងដំណើរទស្សនកិច្ចរបស់រដ្ឋមន្ត្រីក្រសួងការពារជាតិអាមេរិកលោក Jim Mattis ខណៈដែលក្រុមជនចំណាកស្រុកផ្សេងទៀតបានបង្កើនល្បឿនរបស់ខ្លួនដើម្បីចូលរួមជាមួយពួកគេ។
ជនចំណាកស្រុកក្រុមធំៗបានប្រមូលផ្ដុំគ្នាលើឆ្នេរខ្សាច់នៅទីក្រុងភាគខាងជើង Tijuana នៅឯរបងព្រំដែនដែលពុះចែកប្រទេសម៉ិកស៊ិកពីរដ្ឋកាលីហ្វ័រនីញ៉ាដោយពួកគេបានឡើងលើរបងហើយលោតចុះទៅម្ខាងទៀតខណៈដែលភ្នាក់ងារល្បាតព្រំដែនរបស់សហរដ្ឋអាមេរិកបានឈរមើលមុនពេលរុញច្រានយ៉ាងឆាប់រហ័សឲ្យពួកគេត្រឡប់ទៅខាងប្រទេសម៉ិកស៊ិកវិញ។
នៅក្នុងសារមួយទៅកាន់លោកប្រធានាធិបតីសហរដ្ឋអាមេរិក Donald Trump ដែលបានដាក់ពង្រាយទាហានប្រមាណ៥,៩០០នាក់ទៅកាន់ព្រំដែន, ពួកគេមួយចំនួនបានស្រែកថា “ពួកយើងមិនមែនជាឧក្រិដ្ឋជនទេ!”។
ជនអន្តោប្រវេសន៍៤,០០០នាក់ផ្សេងទៀតដែលជាក្រុមដ៏ធំគឺត្រូវបានគេរំពឹងថានឹងទៅដល់ព្រំប្រទល់ក្នុងរយៈពេលប៉ុន្មានថ្ងៃខាងមុខបន្ទាប់ពីរត់គេចពីភាពក្រីក្រនិងអំពើហឹង្សានៅក្នុងប្រទេសកំណើតរបស់ពួកគេ។
អ្នកឆ្លើយឆ្លងព័ត៌មាន AFP ម្នាក់បាននិយាយថា មានជនអន្តោប្រវេសន៍យ៉ាងតិច៩នាក់មកពីក្បួននេះបានឆ្លងកាត់ចូលទៅក្នុងសហរដ្ឋអាមេរិកហើយត្រូវបានចាប់ខ្លួនភ្លាមៗដោយមន្ត្រីល្បាតព្រំដែន។
តាមបទបញ្ជារបស់លោក Trump ដែលចេញកាលពីសប្ដាហ៍មុនបានឲ្យដឹងថា ជនអន្តោប្រវេសន៍ដែលមិនឆ្លងកាត់ព្រំដែនតាមប៉ុស្តិ៍ព្រំដែនផ្លូវការគឺនឹងលែងត្រូវបានអនុញ្ញាតឲ្យស្នើសុំសិទ្ធិជ្រកកោនទៀតហើយ ហើយត្រូវប្រឈមនឹងការនិរទេសដោយស្វ័យប្រវត្តិ។
ជនចំណាកស្រុកជាច្រើននាក់នៅទីក្រុង Tijuana បាននិយាយថា ពួកគេនឹងរង់ចាំការមកដល់របស់ហ្វូងមនុស្សដែលនៅសេសសល់ទាំងអស់មុនពេលព្យាយាមឆ្លងកាត់។
ខណៈពេលកំពុងធ្វើទស្សនកិច្ចរដ្ឋតិចសាស់ លោក Mattis បានទទូចថា ការដាក់ពង្រាយយោធាគឺជាការចាំបាច់ដើម្បីគាំទ្រភ្នាក់ងារល្បាតព្រំដែនរបស់សហរដ្ឋអាមេរិក។
លោក Mattis បាននិយាយថា យោធាកំពុងជួយភ្នាក់ងារព្រំដែនជាមួយការងារជាច្រើនចាប់ពីការដឹកជញ្ជូនពួកគេតាមឧទ្ធម្ភាគចក្ររហូតដល់ការដាក់របងបន្លាលួសនៅតាមបណ្តោយព្រំដែន៕ AFP
Source: Kampuchea Thmey Daily
0 Comments