ភ្នំពេញ ៖ អគ្គិភ័យបានឆេះអាសនៈជាន់ទី១ នៃផ្ទះ មួយល្វែង នៅបុរីលឹមឈាងហាក់ ត្រូវបានសមត្ថកិច្ច និងអាជ្ញាធរ ចេញរថយន្តពន្លត់អគ្គិភ័យ៤គ្រឿង ទៅជួយទាន់ពេលវេលា មិនបណ្តាលឲ្យរាលដាលដល់ផ្ទះទាំងមូល និងផ្ទះអ្នកជិតខាងទេ ប៉ុន្តែខូចខាតទ្រព្យសម្បត្តិអស់មួយចំនួន។
ហេតុការណ៍នេះ បានកើតឡើងកាលពីវេលាម៉ោង១៣និង៥០នាទី ថ្ងៃទី១៥ ខែវិច្ឆិកា ឆ្នាំ២០១៨ នៅចំណុចផ្ទះលេខ៦៥F ផ្លូវលេខ2A បុរីលឹមឈាងហាក់ ក្រុមទី១១ ភូមិគ្រោលគោ សង្កាត់គីឡូម៉ែត្រលេខ៦។
សមត្ថកិច្ចឲ្យដឹងថា ម្ចាស់ផ្ទះឈ្មោះ នួន ស៊ីខន ភេទស្រី អាយុ៣១ឆ្នាំ មុខរបរលក់ដូរ រស់នៅទីតាំងកើតហេតុខាងលើ។
សមត្ថកិច្ចបន្តថា នៅវេលាម៉ោងកើតហេតុខាងលើ ប្រជាពលរដ្ឋបានរាយការណ៍ថា មានអគ្គិភ័យឆាបឆេះផ្ទះក្នុងបុរីលឹមឈាងហាក់ ខណៈទទួលបានព័ត៌មានភ្លាម កម្លាំងខណ្ឌប៉ុស្តិ៍ និងខណ្ឌ រួមទាំងអាជ្ញាធរ បានចុះដល់កន្លែងកើតហេតុធ្វើការបំផុសដល់ប្រជាពលរដ្ឋនៅជុំវិញកន្លែងកើតហេតុជួយបាញ់ទឹកពន្លត់ភ្លាម ប្រើឡានទឹកអស់ចំនួន៤គ្រឿង ១គ្រឿងឡានសាលាខណ្ឌឫស្សីកែវ បានបាញ់ពន្លត់រលត់ជាស្ថាពរនៅកន្លះម៉ោងក្រោយ។
បើតាមម្ចាស់ផ្ទះ ឈ្មោះ នួន ស៊ីខន បានឲ្យដឹងថា អគ្គិភ័យនេះអាចបណ្ដាលមកពីទុស្សេខ្សែភ្លើង ដែលដាក់នៅអាសនៈនោះតែម្ដង ព្រោះមិនមានអ្វីសង្ស័យក្រៅពីនោះទេ។
ម្ចាស់ផ្ទះបន្តថា សម្ភារៈខូចខាត ឆេះបន្ទប់រៀបអាសនៈជាន់ទី១ ក្រៅពីនោះពុំមានការខូចខាត ឬគ្រោះថ្នាក់ដល់ជីវិតនោះឡើយ៕
Source: Kampuchea Thmey Daily
0 Comments