កំពង់ឆ្នាំង ៖ ប្រភពពីប្រជាពលរដ្ឋបានរាយការណ៍ឲ្យដឹងថា នៅយប់ថ្ងៃទី១២ ខែវិច្ឆិកា ឆ្នាំ២០១៨កន្លងទៅនេះ មានក្មេងពាល១ក្រុម បានគប់រថយន្តដែលបើកបរតាមផ្លូវជាតិលេខ០៥ ចំណុចសាលារៀនស្មែត ក្នុងឃុំស្វាយជ្រំ ស្រុករលាប្អៀរ ខេត្តកំពង់ឆ្នាំង បណ្តាលឲ្យបុរសម្នាក់បានបែកក្បាល និងរថយន្តគាត់បានបែកកញ្ចក់ ហើយជនរងគ្រោះមកឈប់រថយន្តនៅក្នុងក្រុងកំពង់ឆ្នាំង ទើបគេដឹងរឿងនេះ។
ប្រជាពលរដ្ឋបានឲ្យដឹងទៀតថា ករណីក្មេងពាលជិះម៉ូតូចាំឆ្មក់យកដុំថ្មគប់ទៅលើរថយន្ត ក៏ធ្លាប់កើតមានរួចមកហើយដែរ នៅតាមផ្លូវជាតិលេខ០៥ ក្នុងស្រុករលាប្អៀរ ស្រុកបរិបូរណ៍ ដោយឡែកនៅក្នុងក្រុងកំពង់ឆ្នាំង គឺម្ដុំចុងស្ពានខ្សាម សង្កាត់ខ្សាម រហូតដល់ ចុងភូមិទី០៨ ចំណុចទន្លេ សាប។
ហេតុនេះ សូមអ្នកបើករថយន្តទាំងអស់នៅពេលយប់ មេត្តាប្រុងប្រយ័ត្នឲ្យបានខ្ពស់។
ករណីខាងលើនេះ ប្រជាពលរដ្ឋ បានស្នើសុំលោកស្នងការនគរបាលខេត្ត និងលោកអធិការនគរបាលតាមស្រុក/ក្រុង មេត្តាជួយចេញអន្តរាគមន៍ពេលយប់ ដើម្បីបង្ក្រាប និងចាប់ឲ្យបានក្រុមក្មេងពាលដែលបានបង្កគ្រោះថ្នាក់ដល់អ្នកធ្វើដំណើរខាងលើនេះ និងបង្កអសន្តិសុខដល់សង្គមជាតិ យើង៕
Source: Kampuchea Thmey Daily
0 Comments