បន្ទាយមានជ័យ ៖ យុវជនវ័យក្មេងម្នាក់ បើករថយន្តយ៉ាងព្រហើន បុករះរថយន្ត និងម៉ូតូជាច្រើនគ្រឿង បណ្តាលឲ្យមានមនុស្សស្លាប់ម្នាក់ និងរបួសជាច្រើននាក់ ដែលកំពុងឈប់នៅភ្លើងស្តុបនៅវេលាម៉ោង១១និង៣០នាទី ថ្ងៃទី១៥ ខែវិច្ឆិកា ឆ្នាំ២០១៨ ចំណុចលើផ្លូវជាតិលេខ៥៩A ខាងជើងស្តុប១៥ម៉ែត្រ ស្ថិតក្នុងភូមិតារាងបាល់ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ។
លោកវរសេនីយ៍ត្រី យ៉ាន់ សុវណ្ណ មេបញ្ជាការមូលដ្ឋានកងរាជអាវុធហត្ថក្រុងសិរីសោភ័ណ បានប្រាប់អ្នកយកព័ត៌មានឲ្យដឹងថា នៅមុនពេលកើតហេតុនោះ មានរថយន្តម៉ាកយ៊ីឌុប ពណ៌ខៀវ ស ពាក់ស្លាកលេខ ភ្នំពេញ៣A២៣៦៤ ទម្ងន់ផ្ទុក១៤តោន អ្នកបើកមានឈ្មោះ ច្រឹក រតនា ភេទប្រុសអាយុ២២ឆ្នាំ រស់នៅភូមិភ្នំដែក ឃុំរមុន្នី ស្រុករវៀង ខេត្តព្រះវិហារ បើកយ៉ាងលឿន ក្នុងទិសដៅពីលិច មកដល់ចំណុចស្តុប ដែលជាចំណុចកើតហេតុ បានបត់ឆ្វេង ទៅផ្លូវជាតិលេខ៥៩ មិនដឹងជាមូលហេតុអី ស្រាប់បើកទៅបុករថយន្តម៉ាកឆ្លាម ពណ៌ខ្មៅ ស៊េរីឆ្នាំ៩៧ ពាក់ស្លាកលេខ ក្រុងព្រះសីហនុ២A ដែលចតខាងស្តាំពីក្រោយពេញទំហឹង លាន់ដូចរន្ទះ អ្នកបើកមានឈ្មោះ ហ៊ឹម បូរ៉ា ភេទប្រុស អាយុ៣៩ឆ្នាំ រស់នៅភូមិបន្ទាយឆ្មារ ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ បណ្ដាលឲ្យអ្នកបើករបួសស្រាល ហើយបានបន្តទៅខាងឆ្វេងបុករះម៉ូតូចំនួន៤គ្រឿងបន្តទៀត ១-ម៉ូតូម៉ាកហុងដាសេ១២៥ ពណ៌ខ្មៅ ស៊េរី២០១៦ ពាក់ស្លាកលេខ បន្ទាយមានជ័យ១L៤១៣១ អ្នកបើកមានឈ្មោះ ឡាយ គឹមកៅ ភេទប្រុស អាយុ១៤ឆ្នាំ រស់នៅភូមិកំពង់ស្វាយ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ បណ្ដាលឲ្យស្លាប់នឹងកន្លែងកើតហេតុ។ ២-ម៉ូតូម៉ាកវ៉េវ S ពណ៌ខ្មៅ ពាក់ស្លាកលេខ បន្ទាយមានជ័យ១B៩៣៥៨ អ្នកបើកមានឈ្មោះ គង់ សារុន ភេទប្រុស អាយុ៦១ឆ្នាំ រស់នៅភូមិពង្រ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ របួសធ្ងន់។ ៣-ម៉ូតូស្គុបពីរ ពណ៌ខ្មៅ ពាក់ស្លាកលេខ បន្ទាយមានជ័យ១G៩១៩៤ អ្នកបើកមិនស្គាល់អត្តសញ្ញាណ។ ៤-ម៉ូតូរ៉ឺម៉កប្រភេទដឹកពាង សាន់យ៉ាន់ អ្នកបើកឈ្មោះ នួន ហូ ភេទប្រុស អាយុ៤៥ឆ្នាំ រស់នៅភូមិជំទាវ ឃុំឫស្សីក្រោក ស្រុកមង្គលបុរី ខេត្តបន្ទាយមានជ័យ របួសស្រាល។
ក្រោយពីកើតហេតុ អ្នកបើកដ៏វ័យក្មេងនោះត្រូវបានសមត្ថកិច្ចឃាត់ខ្លួនបញ្ជូនទៅស្នងការដើម្បីរៀបចំសំណុំរឿងបញ្ជូនទៅតុលាការដើម្បីធ្វើទៅតាមនីតិវិធីច្បាប់។
លោកបានបញ្ជាក់ឲ្យដឹងទៀតថា វត្ថុតាងរថយន្ត និងម៉ូតូ ត្រូវបានសមត្ថកិច្ចយកទៅរក្សាទុកនៅស្នងការ រីឯសាកសព ត្រូវបានក្រុមគ្រួសារយកទៅធ្វើបុណ្យតាមប្រពៃណី នៅគេហដ្ឋាន។
បច្ចុប្បន្ន ជនរងគ្រោះខាងលើ ត្រូវបានសមត្ថកិច្ចដឹកបញ្ជូនទៅមន្ទីរពេទ្យដើម្បីសង្គ្រោះបន្ទាន់ផងដែរ៕
Source: Kampuchea Thmey Daily
0 Comments