ភ្នំពេញ ៖ គណៈកម្មការផលិតទូក ង វែងជាងគេលើពិភពប្រារព្ធពិធីបំបែកកំណត់ត្រា ទូកងវែងជាងគេនៅលើពិភពលោកនៅម៉ោង ៨និង ៣០ នាទី ព្រឹកថ្ងៃទី១២ ខែវិច្ឆិកា ឆ្នាំ២០១៨ នេះនៅត្រើយខាងកើតអ្នកលឿងក្រោមអធិបតីភាពសម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា តំណាង Guinness World Records និងថ្នាក់ដឹកនាំ មន្ត្រីរាជការសិស្ស និស្សិតព្រមទាំងប្រជាពលរដ្ឋជាច្រើនទៀត។
លោក ស សុខា អនុប្រធាន សហភាពសហព័ន្ធយុវជនកម្ពុជា (សសយក) និងជាប្រធានគណៈកម្មការផលិតទូក ង វែងជាងគេលើពិភពលោកបានអោយដឹងថា ពិធីបំបែកកំណត់ត្រាទូកង វែងជាងគេនៅលើពិភពលោកនាពេលនេះធ្វើឡើងក្នុងគោលបំណង ដើម្បីបង្ហាញពីការផលិត ទូក ងនិងត្រៀមខ្លួនរៀបចំពិធីបង្ហាញ វត្តមាន ទូក ង វែងជាងគេនៅលើពិភពលោក ដើម្បីបំបែកកំណត់ត្រាពិភពលោក Guiness World records នៅថ្ងៃទី១២ខែវិច្ឆិកាខាងមុខនេះ។
នេះគឺជាលើកទី៤ហើយដែលសហភាពសហព័ន្ធយុវជនកម្ពុជាបានរៀបចំបំបែក កំណត់ត្រាពិភពលោក បន្ទាប់ពីលើកទី១ បានបំបែកការធ្វើនំអន្សមយក្យ ដែលធំជាគេលើលោក ទី២ ការរាំចង្វាក់ម៉ាឌីហ្សូន ដែលមានមនុស្សរាំរហូតដល់២០១៧នាក់និងទី៣ ការត្បាញក្រមាដែលវែងជាគេនៅលើពិភពលោក។
លោកបានបន្តថា ការធ្វើទូកងវែងជាងគេដើម្បីបំបែកកំណត់ត្រាទូកមួយដែលវែងជាងគេនៅលើពិភពលោកនេះ គឺចង់បង្ហាញដល់ពិភពលោកថាកូនខ្មែរពិតជារួបរួមសាមគ្គីគ្នា និងអាចធ្វើបាននិងបង្ហាញអំពីសក្ដានុពលទេសចរណ៍ជាច្រើនផ្សេងទៀតរបស់កម្ពុជានៅលើពិភពលោកផងដែរ។
លោក ស សុខា បានបញ្ជាក់ថា គិតចាប់តាំងពីដំណើរធ្វើរហូតមកដល់លេចចេញជារូបរាងទូកជាស្ថាពរនេះ គឺមានរយៈពេលជិត៧ខែមកហើយ ពោលគឺមានចំនួន១៩២ថ្ងៃ។ បន្ទាប់ពីពិធីបំបែកកំណត់ត្រានៅថ្ងៃទី១២ខែវិច្ឆិការួច ទូក ង វែងជាងគេលើពិភពលោក នឹងបន្តយកមកកាន់រាជធានីភ្នំពេញដើម្បីបង្ហាញខ្លួននៅក្នុងព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ដោយដាក់តាំងបង្ហាញដល់សាធារណជន បានទស្សនា និងថតរូបទុកជាអនុស្សាវរីយ៍ នៅវាលព្រះមេរុ រយៈ៧ថ្ងៃទៅ១០ថ្ងៃ។
លោកបានបន្ថែមថា បន្ទាប់ពីបង្ហាញខ្លួននៅក្នុងព្រះរាជពិធីបុណ្យអុំទូករួចហើយ ទូក ង វែងជាងគេ នឹងត្រូវយកទៅទុកនៅខេត្តព្រៃវែងវិញ ហើយ នឹងសាងសង់ សារមន្ទីរ នៅក្នុងខេត្ត ដើម្បីតម្កល់ទុកទូក ង វែងជាងគេនេះ ផងដែរ។
គួរបញ្ជាក់ថា ទូក ង ដែលកម្ពុជាធ្វើ ដើម្បីបំបែកឯតទគ្គកម្មពិភពលោក មានបណ្តោយប្រវែង ៨៧,៣ ម៉ែត្រ និងទទឹង១,៩៤ម៉ែត្រ ជម្រៅ០,៨ម៉ែត្រ ផ្ទុកចំណុះទូកចំនួន១៧៩នាក់ ព្រមទាំងក្បូរក្បាច់រចនាដ៏ ប្រណិតរបស់ខ្មែរសម័យអង្គរ ដោយប្រើប្រាស់ពេលវេលាធ្វើរយៈពេល១៩២ថ្ងៃ។
ទូក ងវែងជាងគេ លើពិភពលោកនេះ ក៏ត្រូវបានប្រសិទ្ធនាមថា “កម្ពោជិកបុត្តាខេមរាតរី” ដែលមានន័យថា “ទូកងរបស់កូនខ្មែររស់នៅក្នុងដែនដីកម្ពុជា”។ ទូក ង នេះដែរ មានការចូលរួម ឈូសឆាយ ចាំងឈើ និងគាំទ្រ ពីសំណាក់ ថ្នាក់ដឹកនាំ មន្ត្រីរាជការ សិស្ស និស្សិត ស.ស.យ.ក ព្រមទាំងប្រជាពលរដ្ឋប្រមាណជាង១៤០០០នាក់ ទូទាំងប្រទេសកម្ពុជា៕
Source: Kampuchea Thmey Daily
0 Comments