ប្រទេសស្រីលង្កា បានធ្លាក់ចូលទៅក្នុងវិបត្តិកាន់តែជ្រៅនៅថ្ងៃសៅរ៍បន្ទាប់ពីលោកប្រធានាធិបតី Maithripala Sirisena បានអំពាវនាវឲ្យមានការបោះឆ្នោតជាបន្ទាន់មួយដែលជាហេតុធ្វើឲ្យប្រទេសនេះ ត្រូវប្រឈមមុខនឹងការកកស្ទះនយោបាយរយៈពេលពីរខែទៀតស្របពេលគូប្រជែងដ៏ជូរចត់ទាំងពីរកំពុងដណ្តើមគ្នាដើម្បីដឹកនាំរដ្ឋាភិបាលរបស់គាត់។
នៅក្នុងអ្វីដែលក្រុមប្រឆាំងថ្កោលទោសថាជាទង្វើខុសច្បាប់នោះ, លោក Sirisena បានរំលាយសភាកាលពីថ្ងៃសុក្រហើយបានប្រកាសអំពីការបោះឆ្នោតនៅខែមករាបន្ទាប់ពីមានការបង្ហាញយ៉ាងច្បាស់ថា នាយករដ្ឋមន្ត្រីដែលត្រូវបានតែងតាំងរបស់គាត់គឺអតីតប្រធានាធិបតី Mahinda Rajapakse នឹងមិនអាចទទួលបានសំឡេងភាគច្រើននៅក្នុងសភាបច្ចុប្បន្នទេ។
លោក Rakapakse និងនាយករដ្ឋមន្ត្រី Ranil Wikremesinghe ដែលបានបដិសេធចាកចេញពីតំណែងគឺកំពុងប្រយុទ្ធដើម្បីអំណាចអស់រយៈពេលពីរសប្តាហ៍មកហើយស្របពេលមានក្តីបារម្ភជាអន្តរជាតិជុំវិញភាពចលាចលកាន់តែខ្លាំងនៅក្នុងប្រទេសកោះដ៏សំខាន់មួយនេះ។
លោក Sirisena បានចុះហត្ថលេខាលើក្រិត្យមួយដើម្បីរំលាយសភាសមាជិកចំនួន២២៥អាសនៈរបស់កោះមួយនេះនិងបានកំណត់ពេលការបោះឆ្នោតសភានៅថ្ងៃទី៥ខែមករាមុនកាលកំណត់ជិតពីរឆ្នាំ។ នៅក្នុងការប៉ុនប៉ងដើម្បីបញ្ចៀសការបះបោរប្រឆាំងនឹងសកម្មភាពរបស់គាត់ គាត់ក៏បានព្យួរសភាផងដែរ។
ទោះបីជាយ៉ាងណាក៏ដោយ មិនមានសេចក្តីអត្ថាធិប្បាយភ្លាមៗពីលោក Wickremesinghe ទេប៉ុន្តែគណបក្ស United National (UNP) របស់គាត់បាននិយាយថា ខ្លួននឹងជំទាស់ការបណ្តេញចេញពីអង្គនីតិប្បញ្ញត្តិរបស់លោក Sirisena ។
លោក Sirisena បានទទួលរងសម្ពាធជាអន្តរជាតិពីសហរដ្ឋអាមេរិក អង្គការសហប្រជាជាតិនិងសហភាពអឺរ៉ុបដើម្បីអនុញ្ញាតឲ្យសភាធ្វើការបោះឆ្នោតទៅលើថាតើនាយករដ្ឋមន្ត្រីរូបណាគួរតែបង្កើតរដ្ឋាភិបាល។
ទន្ទឹមនោះ ទីក្រុងវ៉ាស៊ីនតោនបានរិះគន់យ៉ាងឆាប់រហ័សចំពោះទង្វើចុងក្រោយរបស់លោក Sirisena ។
ក្រសួងការបរទេសអាមេរិកបាននិយាយនៅក្នុងសេចក្តីថ្លែងការណ៍មួយលើ Twitter ថា “សហរដ្ឋអាមេរិកមានការព្រួយបារម្ភយ៉ាងខ្លាំងចំពោះព័ត៌មានដែលថា សភាស្រីលង្កានឹងត្រូវរំលាយហើយធ្វើឲ្យវាកាន់តែធ្ងន់ធ្ងរឡើងនូវវិបត្តិនយោបាយ”៕ AFP
Source: Kampuchea Thmey Daily
0 Comments