ភ្នំពេញ ៖ តារាសម្ដែងស្រី មានដើមកំណើតមកពីទឹកដីខេត្តព្រះវិហារ លេចធ្លោលើសកម្មភាពមនុស្សធម៌ កញ្ញា ដេននី ក្វាន់ នាឱកាសថ្ងៃខួបកំណើត នាងបានបង្ហាញពីអារម្មណ៍ពិតផ្ទាល់ខ្លួនចំពោះមនុស្សជាទីស្រលាញ់ គឺលោក ចាន់ មករា ថាខ្លួនមិនត្រូវការប្តីអ្នកមានទ្រព្យធននោះទេពោលគឺសុខចិត្តស្រលាញ់ប្តីអ្នកក្រ ទើបមានសេចក្តីសុខ។
តាមរយៈខ្លឹមសារដែលតារាស្រី កញ្ញា ដេននី ក្វាន់ បង្ហោះភ្ជាប់ជាមួយរូបភាព និងវីដេអូ នាងបានរៀបរាប់ថា មានមនុស្សជាច្រើនសួរខ្ញុំថា ហេតុអ្វីខ្ញុំរើសយកម្នាក់ហ្នឹង ដែលជាមនុស្សប្រុសសាមញ្ញបំផុត មិនស្អាត មិនសង្ហារ ហើយមិនមែនជាអ្នកមានទៀត តែសម្រាប់ខ្ញុំ ខ្ញុំក៏មិនដឹងឡើយថារើសខុស ឬក៏រើសទៅត្រូវ?។
តារាសម្ដែងមានប្រជាប្រិយភាព កញ្ញា ដេននី ក្វាន់ បានលើកឡើងបន្ថែមទៀតថា តែបើឲ្យរើសថ្មីម្តងទៀត ខ្ញុំនៅតែរើសយកម្នាក់ហ្នឹងដដែល.. .។ ព្រោះស្នេហារបស់ខ្ញុំទាំងពីរមិនមែនស្ថិតលើមាត់អ្នកដទៃ ខ្ញុំសុខចិត្តធ្វើព្រះនាងរបស់ប្តីអ្នកក្រ ប្រសើរជាងធ្វើទាសករប្តីអ្នកមាន…អរគុណសម្រាប់ការស្រលាញ់ដែលបងមានចំពោះអូន។
ជាមួយគ្នា នៃថ្ងៃខួបកំណើតរបស់ខ្លួននេះដែរ កញ្ញា ដេននី ក្វាន់ ក្រៅតែពីការបញ្ចេញអារម្មណ៍ និងទំហំក្តីស្រលាញ់របស់ខ្លួនលើ លោក ចាន់ មករា នេះដែរ នាងក៏ទទួលបានកាដូចិញ្ចៀនពេជ្រតម្លៃរាប់ម៉ឺនដុល្លារពីគូស្នេហ៍រូបនេះផងដែរ។
ដោយសារតែការទទួលបានកាដូថ្ងៃខួបកំណើតនេះហើយ ទើបភ្លាមៗនោះ ធ្វើឲ្យតារាស្រីរូបនេះរំភើបខ្លាំងរហូតស្រក់ទឹកភ្នែកស្ទើរខ្សោះខ្លួន។
តាមការកត់សម្គាល់ តារាស្រី កញ្ញា ដេននី ក្វាន់ អំឡុងមួយរយៈពេលចុងក្រោយនេះ នាងមិនត្រឹមតែជោគជ័យលើមុខជំនួញ និងរឿងរ៉ាវសាងសម្ពន្ធភាពស្នេហាប៉ុណ្ណោះទេ គឺតារាស្រីរូបនេះក៏ចាប់ផ្ដើមមានភាពលេចធ្លោលើសកម្មភាពមនុស្សធម៌ជួយសង្គមផងដែរ។
ទង្វើនេះ បានធ្វើឲ្យមហាជនជាច្រើនគាំទ្រ និងលើកសរសើរចំពោះទឹកចិត្តដ៏ល្អរបស់នាងនាពេលបច្ចុប្បន្ន៕
Source: Kampuchea Thmey Daily
0 Comments