ក្រុម​ពន្លត់​អគ្គិភ័យ​កំពុង​ប្រយុទ្ធ​ជាមួយ​ភ្លើង​ឆេះ​ព្រៃ​ចំនួន​ពីរ​ក្នុង​រដ្ឋ កាលីហ្វ័រ​នីញ៉ា ខណៈ​អ្នកស្លាប់​កើន​ដល់​៥០​នាក់

ក្រុម​អ្នក​ពន្លត់​អគ្គិភ័យ​រាប់ពាន់នាក់​បាន​ប្រយុទ្ធ​តស៊ូ​ជាមួយ​ភ្លើង​ឆេះ​ព្រៃ​នៅ​ភាគ​ខាងជើង​និង​ភាគខាងត្បូង​រដ្ឋ​កាលីហ្វ័​រ​នីញ៉ា ​កាលពី​ថ្ងៃ​អង្គារ ​ខណៈ​ក្រុម​រុករក​សាកសព​បាន​ស្វែងរក​តាម​ផ្ទះ​និង​រថយន្ត​ឆេះ​សម្រាប់​ជនរងគ្រោះ​នៃ​ភ្លើង​ឆេះ​ព្រៃ​សម្លាប់​មនុស្ស​ច្រើន​បំផុត​ក្នុង​ប្រវត្តិសាស្ត្រ​សហរដ្ឋអាមេរិក។

គិត​មក​ត្រឹម​ពេលនេះ អ្នកស្លាប់​យ៉ាងតិច​៥០​នាក់​ត្រូវបាន​គេ​រាយការណ៍​នៅ​ទូទាំង​រដ្ឋ​នេះ​ចាប់តាំងពី​ភ្លើង​ឆេះ​ព្រៃ​កើត​ឡើងខណៈ​មនុស្ស​រាប់រយ​នាក់​មិន​ត្រូវបាន​រាប់បញ្ចូល​ដែលជា​ហេតុ​ធ្វើ​ឲ្យ​ចំនួន​អ្នកស្លាប់​ទំនងជា​នឹង​កើនឡើង​។​
​
ភាគច្រើន​នៃ​អ្នកស្លាប់​ដែល​បណ្តាលមកពី​ភ្លើង​ឆេះ​ព្រៃ “Camp Fire” គឺ​ស្ថិតនៅក្នុង​និង​ជុំវិញ​ទីក្រុង Paradise ដែលមាន​ប្រជាជន​២៦,០០០​នាក់​។​
​
តម្រួត Kory Honea បាន​ប្រាប់​សន្និសីទ​សារព័ត៌មាន​មួយ​ថា “​ថ្ងៃនេះ​សាកសព​ចំនួន​៦​នាក់​បន្ថែមទៀត​ត្រូវបាន​រកឃើញ​ដែល​នាំ​ឲ្យ​ចំនួន​អ្នកស្លាប់​សរុប​កើន​ដល់​៤៨​នាក់​។ សាកសព​ទាំង​ប្រាំមួយ​ត្រូវបាន​រកឃើញ​នៅក្នុង​ទីក្រុង Paradise ហើយ​ពួកគេ​ស្ថិតនៅ​ក្នុងផ្ទះ​”​។​
​
អ្នកស្លាប់​ពីរ​នាក់​ទៀត​ត្រូវបាន​គេ​រាយការណ៍​មកពី​ភ្លើង​ឆេះ​ព្រៃ “Woolsey Fire” នៅ​ភាគ​ខាងជើង​ទីក្រុង Los Angeles ។​
​
ទីក្រុង Paradise ដែលជា​លំនៅដ្ឋាន​របស់​អ្នក​ចូលនិវត្តន៍​ជាច្រើន​នាក់​និង​បាន​ជួបប្រទះ​នូវ​គ្រោះរាំងស្ងួត​មិនធម្មតា​គឺ​ត្រូវបាន​កម្ទេច​ដោយ​ភ្លើង​ឆេះ​ព្រៃ “Camp Fire” ដែល​រាលដាល​យ៉ាង​ឆាប់រហ័ស​។​
​
យោងតាម Cal Fire បាន​ឲ្យ​ដឹងថា ភ្លើង​ឆេះ​ព្រៃ “Camp Fire” ដែល​បាន​ផ្ទុះឡើង​កាលពី​ថ្ងៃ​ព្រហស្បតិ៍​គឺ​បាន​បំផ្លាញ​ផ្ទៃដី​១៣០,០០០​ហិច​តា​ហើយ​៣៥​ភាគរយ​ត្រូវបាន​ទប់ស្កាត់​។​
“Camp Fire” បាន​បំផ្លាញ​ផ្ទះ​ជាង​៦,៥០០​ខ្នង​និង​អចលនទ្រព្យ​ពាណិជ្ជកម្ម​២៦០​កន្លែង​។ បុគ្គលិក​ពន្លត់​អគ្គិភ័យ​ជាង​៥,៦០០​នាក់​កំពុង​ប្រយុទ្ធ​ជាមួយ​ភ្លើង​ឆេះ​ព្រៃ​នេះ​ដោយ​ក្នុងនោះ​មាន​មួយចំនួន​មកពី​តំបន់​ឆ្ងាយៗ​ដូចជា​រដ្ឋ​វ៉ាស៊ីនតោន​និង​តិច​សាស់​។​
ចំណែក​ភ្លើង​ឆេះ​ព្រៃ “Woolsey Fire” ដែល​ក៏បាន​ចាប់ផ្តើម​កាលពី​ថ្ងៃ​ព្រហស្បតិ៍​ដែរនោះ​គឺ​បាន​បំផ្លាញ​ផ្ទៃដី​៩៧,១១៤​ហិច​តា​និង​ទប់ស្កាត់បាន​៤០​ភាគរយ​។​
Cal Fire បាន​និយាយថា បុគ្គលិក​ពន្លត់​អគ្គិភ័យ​ជាង​៣,៥០០​នាក់​កំពុង​ប្រយុទ្ធប្រឆាំង​ភ្លើង​ឆេះ​ព្រៃ “Woolsey Fire”៕ AFP

​

Source: Kampuchea Thmey Daily