រិ​ទ្ធ អាទិត្យ និង​ផាន ផាត់​យុទ្ធ វាយ​ចាញ់​ថៃ​ដូចគ្នា ក្នុង​ជម្រុះ​ជុំ​ទី​៤ ​ខ្សែក្រវាត់​គូ​បូ​តា​

ការប្រកួត​ជម្រុះ​ដណ្ដើម​ខ្សែក្រវាត់​ជើងឯក​លេខ​១ គូ​បូ​តា​ ទម្ងន់​៥៤​គីឡូក្រាម នៅ​សង្វៀន​បាយ័ន​ស្ទឹងមានជ័យ កាលពី​យប់​ថ្ងៃ​សុក្រ​ ទី​០៩ ខែ​វិច្ឆិកា ឆ្នាំ​២០១៨ ដែលជា​ការប្រកួត​ជុំ​ទី​៤ នោះ រិ​ទ្ធ អាទិត្យ ក្លិប​អាណាចក្រ​គុន​ខ្មែរ និង​ផាន ផាត់​យុទ្ធ អ្នក​ប្រដាល់​ក្លិប​សាល​វ័​ន្ត​កីឡា បាន​វាយ​ចាញ់​ឡាវ​ទាំងពីរ​នាក់។​
​
រិ​ទ្ធ អាទិត្យ គេ​វាយ​ចាញ់​អ្នក​ប្រដាល់​ថៃ Anuntasak Site Phukhorngyus ដោយ​ពិន្ទុ ហើយ ​ផាន ផាត់​យុទ្ធ វាយ​ចាញ់​អ្នក​ប្រដាល់​ថៃ Kaoreanghom Pctchchinda ដោយ​ពិន្ទុ​ដែរ។​
​
ក្នុង​៥​ទឹក អ្នក​ប្រដាល់​ថៃ Anuntasak Site Phukhorngyus បាន​វាយ​ចេញ​មុន រិ​ទ្ធ អាទិត្យ ជានិច្ច ដែល​ធ្វើ​ឲ្យ​ អាទិត្យ ចាញ់​ពិន្ទុ។ រិ​ទ្ធ អាទិត្យ ក្រោយ​ចាញ់ Anuntasak នេះ គេ​នឹងត្រូវ​ហាលអាវ​ខ្ទាត​ចេញពី​ការប្រកួត​នេះហើយ បើទោះជា​នៅសល់​មួយ​ប្រកួត​ទៀត​ក្ដី ព្រោះ​គេ​វាយ​ចាញ់​៤​ប្រកួត​ទៅ​ហើយ ក្នុង​ការ​ប្រកួត​ជម្រុះ​៤​ជុំ​នេះ។ ចំណែក Anuntasak គេ​មាន​ផ្លូវ​អ៊ុត​ជាមួយ​កីឡាករ​ក្នុង​ពូ​ល ដោយសារ​គេ​ឆ្លងកាត់​៥​ប្រកួត​កន្លងមក​នោះ គេ​វាយ​ឈ្នះ​២ និង ចាញ់​៣ ប្រកួត មាន​៩​ពិន្ទុ នោះ។​
​
ចំពោះ​ការប្រកួត​របស់​ ផាន ផាត់​យុទ្ធ ក៏​មិន​ខុសគ្នា​ប៉ុន្មាន​ដូច​ការប្រកួត​របស់​ រិ​ទ្ធ អាទិត្យ ដែរ។ គេ​វាយ​ចាញ់​អ្នក​ប្រដាល់​ថៃ Kaoreanghom Pctchchinda ដោយ​ពិន្ទុ ដោយ​ក្នុង​ការប្រកួត​៥​ទឹក​នោះ ផាន ផាត់​យុទ្ធ មិនអាច​យកឈ្នះ Kaoreanghom បានឡើយ ទោះបីជា​គេ​បាន​វាយ​ចេញ​ច្រើន​ក៏ដោយ ក៏​ការ​វាយ​របស់គេ​ខុស​គោលដៅ និង​ត្រូវ​អ្នក​ប្រដាល់​ថៃ​នោះ ទប់​បាន​ទាំងអស់។
​
ជាមួយនឹង​លទ្ធផល​នេះ ផាន ផាត់​យុទ្ធ បាន​១០​ពិន្ទុ ក្នុង​៤​ប្រកួត ហើយ​អ្នក​ប្រដាល់​ថៃ Kaoreanghom គេ​បាន​៨​ពិន្ទុ ក្នុង​ការ​ប្រកួត​៤ ប្រកួត​ដូចគ្នា​គឺ​ឈ្នះ​២ ចាញ់​២​ប្រកួត។​

សូមបញ្ជាក់ថា កីឡាករ​ខ្លាំង​ទាំង​១០​រូប ដែល​ចូលរួម​ប្រកួត​ដណ្ដើម​ខ្សែក្រវាត់​គូ​បូ​តា​រដូវ​កាល​ថ្មី​ ទម្ងន់​៥៤​គីឡូក្រាម​នេះ មាន​អ្នក​ប្រដាល់​ជើង​ខ្លាំង​កម្ពុជា​៥​រូប និង អ្នក​ប្រដាល់​ជើង​ខ្លាំង​ថៃ​-​ឡាវ ៥ រូប ចូលរួម​វាយ​ដណ្ដើម​យក​ខ្សែក្រវាត់​នេះ។​
​
អ្នក​ប្រដាល់​មួយរូបៗ ទាំង​ខ្មែរ ទាំង​ថៃ និង​ឡាវ គឺ​ត្រូវ​ឆ្លងកាត់​ការប្រកួត​ក្នុង​ម្នាក់ៗ ចំនួន​៤​ប្រកួត​ម្នាក់ ហើយ​អ្នក​ដែល​មាន​ពិន្ទុ​ច្រើន​២​រូប​ក្នុង​មួយ​ពូ​ល ទាំង​ពូ​ល​ខ្មែរ និង ពូ​ល​ថៃ​-​ឡាវ នឹង​ត្រូវ​បាន​ឡើង​ទៅ​ប្រកួត​វគ្គ​ពាក់កណ្ដាល​ផ្ដាច់ព្រ័ត្រ និង ផ្ដាច់ព្រ័ត្រ។​
​ដោយឡែក ការប្រកួត​រវាង​អ្នក​ប្រដាល់​រួម​ជាតិ​វិញ ជ័រ ពៅ អ្នក​ប្រដាល់​ក្លិប​ថ្មគោល​ពោធិ​សែន​ជ័យ បាន​ប្រកួត​ឈ្នះ ​មាឃ វណ្ណា​រ៉ា អ្នក​ប្រដាល់​ក្លិប​រាជសីហ៍​ខេត្ត​រតនគិរី ដោយ​ពិន្ទុ ហើយ​អេ​លី​ត សុខ​ទៀង អ្នក​ប្រដាល់​ក្លិប​ឆ្មា​ស​សែន​សុខ​គុន​ខ្មែរ បាន​ផ្ដួល​យកឈ្នះ ម៉ិ​ល សារុន អ្នក​ប្រដាល់​ក្លិប​អា​ណា​ចក្រ​គុន​ខ្មែរ ក្នុង​ទឹក​ទី​៣៕



Source: Kampuchea Thmey Daily