ភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានណែនាំពីកិច្ចសហប្រតិបត្តិការរវាងរាជរដ្ឋាភិបាល និងរដ្ឋបាលថ្នាក់ក្រោមជាតិ ជាមួយសមាគម និងអង្គការមិនមែនរដ្ឋាភិបាល ព្រមទាំងសហគមន៍នានានៅមូលដ្ឋាន ដើម្បីធានាដល់ការធ្វើសកម្មភាពក្នុងការចូលរួមអភិវឌ្ឍន៍ប្រទេសលើគ្រប់វិស័យ ក៏ដូចជាការលើកកម្ពស់កិច្ចសហប្រតិបត្តិការ។
ការណែនាំនេះ បានធ្វើឡើងតាមរយៈសេចក្ដីណែនាំមួយ កាលពីថ្ងៃទី៣១ ខែតុលា ឆ្នាំ២០១៨ ដោយបានបញ្ជាក់ថា សមាគម និងអង្គការមិនមែនរដ្ឋាភិបាល ដែលបានចុះបញ្ជីស្របតាមច្បាប់ស្ដីពីសមាគម និងអង្គការមិនមែនរដ្ឋាភិបាល ព្រមទាំងសហគមន៍នានានៅមូលដ្ឋាន មានសិទ្ធិសេរីភាពពេញលេញ ក្នុងការធ្វើសកម្មភាពក្នុងព្រះរាជាណាចក្រកម្ពុជា ស្របតាមច្បាប់ស្ដីពីសមាគម និងអង្គការមិនមែនរដ្ឋាភិបាល ច្បាប់ និងលិខិតបទដ្ឋាននានាជាធរមាន និងស្របតាមលក្ខន្តិកៈរបស់ខ្លួន ដែលបានតម្កល់ទុកនៅក្រសួងមហាផ្ទៃ ដោយគ្មានការរារាំង និងរំលោភបំពានបានឡើយ។
សេចក្ដីណែនាំដដែលបានបញ្ជាក់ទៀតថា សមាគម និងអង្គការមិនមែនរដ្ឋាភិបាល ដែលបានចុះបញ្ជីស្របតាមច្បាប់ ស្ដីពីសមាគម និងអង្គការមិនមែនរដ្ឋាភិបាល ព្រមទាំងសហគមន៍នានានៅមូលដ្ឋាន នៅពេលធ្វើសកម្មភាពនៅតាមមូលដ្ឋាន ហើយមានការរារាំង ឬរឹតត្បិតពីអាជ្ញាធរមូលដ្ឋាន សមាគម អង្គការមិនមែនរដ្ឋាភិបាល និងសហគមន៍ នៅមូលដ្ឋាននោះ ត្រូវរាយការណ៍អំពីករណីនេះជូនអភិបាល នៃគណៈអភិបាលរាជធានី-ខេត្ត ឬក្រសួងមហាផ្ទៃ ដើម្បីជួយសម្របសម្រួល និងដោះស្រាយ។
តាមសេចក្ដីណែនាំរបស់សម្ដេចក្រឡាហោម ស ខេង ដើម្បីលើកកម្ពស់ការចូលរួម និងកិច្ចសហការជាមួយសមាគម អង្គការមិនមែនរដ្ឋាភិបាល និងសហគមន៍នានានៅមូលដ្ឋាន រដ្ឋបាលថ្នាក់ក្រោមជាតិគ្រប់ថ្នាក់ត្រូវសហការសម្របសម្រួល រៀបចំវេទិកាពិគ្រោះយោបល់ជាមួយសមាគម អង្គការមិនមែនរដ្ឋាភិបាល និងសហគមន៍នានា ដែលធ្វើសកម្មភាព ក្នុងដែនសមត្ថកិច្ចរបស់ខ្លួន ឲ្យបានទៀងទាត់រាល់ឆមាស ឬតាមការចាំបាច់។
អភិបាល នៃគណៈអភិបាលខេត្ត-រាជធានី ត្រូវធ្វើការបូកសរុបអំពីការរៀបចំវេទិកាពិគ្រោះយោបល់នេះ រួមទាំងបញ្ហានានាមិនអាចដោះស្រាយបាន ក្នុងសមត្ថកិច្ចរបស់ខ្លួនមកក្រសួងមហាផ្ទៃ និងក្រសួងស្ថាប័នពាក់ព័ន្ធនានា ដើម្បីជួយគាំទ្រ និងសហការក្នុងការដោះស្រាយ។
សេចក្ដីណែនាំរបស់សម្ដេចក្រឡាហោមបានគូសបញ្ជាក់ថា ”រដ្ឋបាលរាជធានី-ខេត្ត ត្រូវធ្វើការផ្សព្វផ្សាយបន្តដល់អាជ្ញាធរមានសមត្ថកិច្ចពាក់ព័ន្ធ និងរដ្ឋបាលក្រុង ស្រុក ឃុំ សង្កាត់ ឲ្យបានជ្រួតជ្រាប ដើម្បីចូលរួមអនុវត្តឲ្យបានត្រឹមត្រូវ និងមានប្រសិទ្ធភាពខ្ពស់”។
សូមជម្រាបថា សេចក្ដីណែនាំនេះ ធ្វើឡើងដើម្បីធានាឲ្យសមាគម និងអង្គការមិនមែនរដ្ឋាភិបាល ដែលបានចុះបញ្ជីត្រឹមត្រូវស្របតាមច្បាប់ ស្ដីពីសមាគម និងអង្គការមិនមែនរដ្ឋាភិបាល ព្រមទាំងសហគមន៍នានានៅមូលដ្ឋាន ធ្វើសកម្មភាពក្នុងការចូលរួមអភិវឌ្ឍប្រទេសលើគ្រប់វិស័យ ក៏ដូចជាការលើកកម្ពស់កិច្ចសហប្រតិបត្តិការ និងភាពជាដៃគូរវាងរាជរដ្ឋាភិបាល និងរដ្ឋបាលថ្នាក់ក្រោមជាតិ ជាមួយសមាគម និងអង្គការមិនមែនរដ្ឋាភិបាល និងរដ្ឋបាលថ្នាក់ក្រោមជាតិ ជាមួយសមាគម និងអង្គការមិនមែនរដ្ឋាភិបាល និងសហគមន៍នានានៅមូលដ្ឋាន៕
Source: Kampuchea Thmey Daily
0 Comments