ភ្នំពេញ ៖ ក្នុងកិច្ចប្រជុំនារសៀល ថ្ងៃទី០៧វិច្ឆិកា លោក សុខ សម្បត្តិ ប្រធានគណៈបញ្ជាការខណ្ឌព្រែកព្នៅ បានណែនាំដល់កងកម្លាំង ទាំងអស់ក្នុងខណ្ឌ រួមទាំងអាជ្ញាធរសង្កាត់ទាំង៥ ត្រូវបង្កើនការយកចិត្តទុកដាក់បន្ថែមទៀត លើបញ្ហាសន្តិសុខសណ្ដាប់ធ្នាប់ក្នុងមូលដ្ឋាន ពិសេសគឺនៅក្នុងឱកាសបុណ្យជាតិធំៗ ដែលប្រជាពលរដ្ឋ ក៏ដូចជាភ្ញៀវទេសចរណ៍ជាតិ និងអន្តរជាតិ ដើរលេងកំសាន្ដ។
លោក សុខ សម្បត្តិ បានលើកឡើងថា យើងមានបុណ្យជាតិធំៗជាបន្តបន្ទាប់ នាចុងឆ្នាំនេះហើយនៅក្នុងខែវិច្ឆិកានេះ មានបុណ្យ ឯករាជ្យ និង បុណ្យ អុំទូកដែលនឹងចូលមកដល់នាពេលឆាប់ៗនេះ ។
ក្នុងឱកាសនោះ បងប្អូនប្រជាពលរដ្ឋ នឹងធ្វើដំណើរសម្រុកមកកាន់រាជធានីភ្នំពេញ ដើម្បីចូលរួមទស្សនាការកម្មវិធីកំសាន្ដផ្សេងៗ និងទស្សនាការ ប្រណាំងទូកនៅមុខព្រះបរមរាជវាំង វាំងផងដែរ។
ដូចនេះ ក្នុងនាមជាអាជ្ញាធរ ត្រូវបង្កើនការយកចិត្តទុកដាក់ ថែរក្សាសន្តិសុខសុវត្ថិភាពជូនប្រជាពលរដ្ឋ ដោយចាត់ចែងកម្លាំង ដាក់យាមកាម ប្រចាំការតាមគោលដៅ និងកម្លាំងចេញល្បាតតាមច្រកល្ហកក្នុងមូលដ្ឋាន ដើម្បីធានាបាននូវសន្តិសុខសុវត្ថិភាពផង និង ជួយសម្រួលចរាចរណ៍តាមដងផ្លូវផង ក្នុងករណីដែលមានការកកស្ទះចរាចរណ៍កើតមានឡើង។
សម្រាប់គណៈបញ្ជាការឯកភាពសង្កាត់ ត្រូវរៀបចំផែនការដាក់វេនប្រចាំបញ្ជាពិសេស នៅស្នាក់ការរបស់ខ្លួន និងត្រូវបញ្ជូនឈ្មោះវេនប្រចាំការពិសេសនេះមកគណៈបញ្ជាការឯកភាពខណ្ឌ ហើយគ្រប់មន្ត្រីទាំងអស់មិនមានការអនុញ្ញាតច្បាប់ទេ គឺលើកលែងតែឈឺប៉ុណ្ណោះ។
ជាមួយនេះ កម្លាំងសរុបរបស់ខណ្ឌ ត្រូវបន្តយកចិត្តទុកដាក់សហការជាមួយ អង្គភាព ពាក់ព័ន្ធដើម្បីរក្សាឲ្យបាននូវសន្តិសុខសុវត្ថិភាពក្នុងមូលដ្ឋាន ដោយចុះត្រួតពិនិត្យការអនុវត្តច្បាប់ចរាចរណ៍ផ្លូវគោក ត្រៀមកម្លាំងទប់ស្កាត់រថយន្តធុនធ្ងន់ចូលក្រុង។ ឆែកឆេអាវុធជាតិផ្ទុះ តាមវេន និងកម្លាំងដែលបានបែងចែកស្រាប់ ទៅតាមគោលដៅពិសេសនៅតំបន់ដែលស្មុគស្មាញ ដែលជនល្មើសអាចធ្វើការឆ្លងកាត់ ការចុះល្បាត តាមមូលដ្ឋាន ព្រោះថាការងារសន្តិសុខសុវត្ថិភាពនេះ គឺជារឿងរបស់យើងទាំងអស់គ្នា បើយើងពឹងផ្អែកលើកងកម្លាំងតែ១មុខនោះមិនទាន់គ្រប់គ្រាន់នៅឡើយ។
កិច្ចការនេះ ទាល់តែយើងរួមគ្នាធ្វើទើបសម្រេចបាន ជោគជ័យធ្វើឲ្យប្រជាពលរដ្ឋមានភាពកក់ក្ដៅ មានទំនុកចិត្តមកលើអាជ្ញាធរ។
លោកអភិបាលខណ្ឌមានប្រសាសន៍ថា ទោះជាកន្លងមកកម្លាំងសមត្ថកិច្ចយើងបានបំពេញតួនាទីរបស់ខ្លួនបានយ៉ាងល្អក្ដី ប៉ុន្តែយើងនៅតែបន្តប្រឹងប្រែងបន្ថែមទៀត ដោយឈរលើស្មារតី ប្រុងប្រយ័ត្ន ខ្ពស់ ទើបធានាបាននូវភាព សុខសាន្តជូនប្រជាពលរដ្ឋ៕
Source: Kampuchea Thmey Daily
0 Comments