ក្លិបបាល់ទាត់ព្រះខ័នរាជស្វាយរៀង សមាជិកក្នុងពានរង្វាន់លីគកំពូលកម្ពុជា (Metfone Cambodian League 2018) បានប្រកាសបន្តកិច្ចសន្យាឆ្នើមចំនួន៣នាក់ រហូតដល់ឆ្នាំ២០២១ ខាងមុខ ដោយក្នុងនោះមានខ្សែប្រយុទ្ធ ណុប តុលា ខ្សែបម្រើកណ្តាល ជា សំណាង និងអ្នកចាំទី អាំ សុវណ្ណារ៉ាត់ ខណៈអ្នកទាំង៣ធ្លាប់ជាតួរអង្គរសំខាន់សម្រាប់ក្រុមនៅរដូវកាល២០១៨កន្លងទៅ។
ចំពោះខ្សែប្រយុទ្ធ ណុប តុលា បានចូលរួមជាមួយក្រុមក្រសួងការពារជាតិ តាំងពីឆ្នាំ២០១៣ មកម្ល៉េះហើយរូបគេមិនធ្លាប់ផ្លាស់ប្តូរក្លិបនៅឡើយនោះទេ ទោះពេលខ្លះត្រូវប្តូរទម្រង់លេងពីខ្សែប្រយុទ្ធមកជាខ្សែការពារ ឬពីខ្សែការពារមកជាខ្សែបម្រើក៏ដោយ។ រូបគេត្រូវបានបណ្តុះចេញពីក្រុមយុវជនថ្នាលរបស់ក្រុមមួយនេះ។ មិនតែប៉ុណ្ណោះ តុលា ធ្លាប់មានឈ្មោះក្នុងក្រុមជម្រើសជាតិតាំងពីឈុតយុវជន U16 រហូតដល់ឈុតធំផងដែរ។
ចំណែកខ្សែបម្រើកណ្តាល ជា សំណាង វិញត្រូវបានលោកគ្រូបង្វឹកConor Nestor ឲ្យកាន់តំណែងជាប្រធានក្រុមពេញមួយរដូវកាលឆ្នាំ២០១៨។ ម្ចាស់អាវលេខ៨ក្នុងក្រុមនេះបានចូលរួមជាមួយព្រះខ័នរាជស្វាយរៀង តាំងពីឆ្នាំ២០១០ មកម្ល៉េះដោយកាលនោះលោក រិទ្ធី ឌីកា ជាគ្រូបង្វឹកបានជម្រើសរើសរូបគេចេញពីក្រុមយុវជនថ្នាល។ រូបគេក៏ត្រូវបានកោះហៅឱ្យចូលក្នុងក្រុមជម្រើសជាតិកម្ពុជា ម្តងម្កាលផងដែរ។
ដោយឡែកអ្នកចាំទី អាំ សុវណ្ណារ៉ាត់ វិញជាអ្នកចាំទីម្នាក់ក្នុងចំណោម២នាក់ដែលឆ្នើមនៅក្នុងក្រុមពោលគឺជាមួយដៃគូ អោម ឧត្តម បន្ទាប់ពីអ្នកចាំទីDmitry Asnin ជនជាតិបេឡារ៉ុស ចាកចេញក្រោយចប់រដូវកាល។ យ៉ាងណាក្តីកាលពីរដូវកាលឆ្នាំ២០១៨ រូបគេត្រូវបានសហព័ន្ធកីឡាបាល់ទាត់កម្ពុជា ពិន័យមិនឲ្យចូលប្រកួតចំនួន៣ខែក្រោយមានបញ្ហាលើទីលានពេលប៉ះក្រុមក្រសួងការពារជាតិ លើទឹកដីកីឡដ្ឋានខេត្តស្វាយរៀង។
ក្រុមព្រះខ័នរាជស្វាយរៀង ដែលដឹកនាំដោយលោក Conor Nestor ទទួលចំណាត់ថ្នាក់មិនសូវបានល្អនោះទេប្រចាំរដូវកាល២០១៨ កន្លងទៅទាំងក្នុងពានរង្វាន់លីគកំពូលកម្ពុជា និងពានរង្វាន់សម្តេចតេជោ ហ៊ុន សែន បើធៀបនឹងលទ្ធផលតាមឆ្នាំកន្លងមក។ ចំពោះលីគកំពូលកម្ពុជា វិញក្រោយប្រកួតបាន២២លើក ឈ្នះបាន១០លើក ហើយស្មើគ្នាបាន៣លើក និងបរាជ័យរហូតដល់៩លើក ឈរចំណាត់ថ្នាក់លេខ៦បណ្តោះអាសន្នក្នុងចំណោមក្លិបជាសមាជិកទាំង១២។ ចំណែកពានរង្វាន់សម្តេចតេជោ ហ៊ុន សែន វិញក្រុមនេះបានធ្លាក់ត្រឹមវគ្គ៨ក្រុមចុងក្រោយបន្ទាប់ពីចាញ់អង្គរថាយហ្គឺរ៕
Source: Kampuchea Thmey Daily
0 Comments