មជ្ឈមណ្ឌល​នាឡិកា​ស្វី​ស និង ជប៉ុន បានរៀបចំ​កម្មវិធី​គម្រប់​ខួប​៣៥​ឆ្នាំ​របស់ G-SHOCK នៅ​កម្ពុជា

ភ្នំពេញ ៖ នាឡិកា G-SHOCK មាន​ដើមកំណើត​ក្នុង​ឆ្នាំ​១៩៨៣ រហូតមកដល់​ពេលនេះ​គឺ​មាន​រយៈពេល​៣៥​ឆ្នាំ ហើយ​តាម​បណ្តា​ប្រទេស​ដែល​ជា​តំណាង​ចែកចាយ​ផ្តាច់មុខ​របស់​នាឡិកា G-SHOCK ទាំងអស់​ក៏បាន​ប្រារព្ធ​ខួប​៣៥​ឆ្នាំនេះ​ផង​ដែរ រួម​ទាំង​ប្រទេស​កម្ពុជា​ដែលមាន​មជ្ឈមណ្ឌល​នាឡិកា​ស្វី​ស​និង​ជប៉ុន របស់​ក្រុមហ៊ុន​LDI Enterprise ។

កម្មវិធី​គំរប់​ខួប​៣៥​ឆ្នាំ​របស់ G-SHOCK បាន​ធ្វើឡើង​ជាមួយនឹង​សន្និសីទ​សារព័ត៌មាន Shock The World 2018​ រួម​នឹង​ការ​ប្រគំ​តន្ត្រី នៅ​ទល់មុខ​សាល​មហោស្រព​កោះ​ពេជ្រ​កាលពី​រាត្រី​ថ្ងៃទី​១០​ខែវិច្ឆិកា​ឆ្នាំ​២០១៨​។

លោក គាំង សុង ប្រធាន​គ្រប់គ្រង​ទូទៅ​ក្រុមហ៊ុន​LDI Enterprise បាន​ឲ្យ​ដឹង​អំពី​ប្រវត្តិ​ខ្លះៗ​របស់​ក្រុមហ៊ុន​ដំបូង​ដែល​មាន​លោក គួច ទាង​ងួន ជា​អគ្គនាយក នៅ​ថ្ងៃទី​៨​ ខែសីហា​ ឆ្នាំ​១៩៩៣​រហូតមកដល់​បច្ចុប្បន្ន​នេះ​បាន​២៥​ឆ្នាំ​ហើយ ព្រមទាំង​បានទទួល​នូវ​ទំនុកចិត្ត​ចំពោះ​ផលិតផល​ដែល​ក្រុមហ៊ុន​ធ្វើ​ចរាចរណ៍ ទំនិញ​ជូន​អតិថិជន​នៅក្នុង​ប្រទេស​ដែល​បាន​គាំទ្រ​និង​ទទួល​ស្គាល់​ថា ជា​ផលិតផល​ពិត​១០០% មិន​មានការ​ក្លែងបន្លំ​ដូច​ក្រុមហ៊ុន​មួយ​ចំនួន​ទៀត​។ ព្រមទាំង​មាន​បណ្តា​ក្រុមហ៊ុន​ម៉ាក​នាឡិកា ដៃ​ល្បីៗ លើ​ពិភពលោក បាន​មក​ទំនាក់ទំនង​ផ្តល់​សិទ្ធិ​ផ្តាច់មុខ​ដូចជា​ក្រុមហ៊ុន​ធំ​CASIO COMPUTER របស់​ប្រទេស​ជប៉ុន ជាដើម បាន​ផ្តល់​សិទ្ធិផ្តាច់មុខ​នាឡិកា​ម៉ាក CASIO​តាំង​ពី​ដើម ​ខែមេសា​ ឆ្នាំ​២០១៤ រយៈពេល​៤​ឆ្នាំ​មកនេះ​ក្រុមហ៊ុន​LDI Enterprise បាន​បើក​សាខា​CASIO ចំនួន​១១​សាខា​នៅក្នុង​រាជធានី​ភ្នំពេញ និង​ខេត្តសៀមរាប និង​មាន​ក្នុង​ពេល​ឆាប់​នៅ​ខេត្ត​កំពង់សោម​។

លោក គាំង សុង បាន​ឲ្យ​ដឹង​បន្ថែម​ថា នាឡិកាដៃ​ម៉ាក G-SHOCK , CASIO ត្រូវ​បាន​ផលិត​ឡើង នៅក្នុង​ប្រទេស​ជប៉ុន ឆ្នាំ​១៩៨៣។ ​មក​ទល់ពេលនេះ​មាន​អាយុកាល​៣៥​ឆ្នាំ​ ហើយ​ដែល​ត្រូវ​បាន​គេ​និយម​ប្រើប្រាស់​ពាសពេញ​ពិភពលោក​។​ ”​ក្រុមហ៊ុន​យើងខ្ញុំ សូម​ធានា​អះអាង​ថា រាល់​ផលិតផល​នាឡិកាដៃ ដែល​បាន​តាំង​លក់​នៅក្នុង​ហាង​CASIO របស់​យើងខ្ញុំ ទាំងអស់​គឺជា​នាឡិកា​ដែល​ផលិត​នៅក្នុង​ប្រទេស​ជប៉ុន​ពិតៗ​១០០%​ឥត​ក្លែងបន្លំ ព្រមទាំង​មានការ​ធានា​ជា​លក្ខណៈ​អន្តរជាតិ​រយៈពេល​មួយឆ្នាំ​ផងដែរ​៕

Source: Kampuchea Thmey Daily