ប្រដាល់ ៖ អ្នកប្រដាល់ជើងខ្លាំងកម្ពុជាផល សោភ័ណ្ឌ ក្លិបតាឡីដំរីមានរិទ្ធ ត្រូវគេផ្គូផ្គងឲ្យជួបប្រកួតជាមួយអ្នកប្រដាល់ថៃ Lek Phit នាយប់ថ្ងៃសៅរ៍ ទី១៧ ខែវិច្ឆិកា ឆ្នាំ២០១៨នេះ នៅក្នុងកម្មវិធីប្រដាល់Ganzberg Top Fighter របស់ទូរទស្សន៍អាស៊ីអាគ្នេយ៍។
Lek Phit ជាអ្នកប្រដាល់ថៃចំណូលថ្មី ពុំធ្លាប់មកប្រកួតនៅស្រុកខ្មែរនោះទេកន្លងមក។ អ្នកប្រដាល់ថៃរូបនេះ មានកំណត់ត្រាប្រកួតចំនួន៧៥លើក ឈ្នះ៦៧លើក ចាញ់០៨លើក មិនដែលស្មើ ហើយធ្លាប់ផ្ដួលដៃគូប្រកួតឲ្យសន្លប់បានចំនួន១៥លើក។ អ្នកប្រដាល់ថៃម្នាក់នេះ មានកាយសម្បទារឹងមាំ មានកម្ពស់ប្រហាក់ប្រហែល សោភ័ណ្ឌ ដែរ គឺ១,៧០ម៉ែត្រ ហើយ សោភ័ណ្ឌ១,៦៨ម៉ែត្រ។ តែយ៉ាងណា Lek Phit មិនដឹងថា អាចវាយឈ្នះអ្នកប្រដាល់ជើងខ្លាំងកម្ពុជា ផល សោភ័ណ្ឌ បានឬអត់នោះទេ?។
ផល សោភ័ណ្ឌ ជាអ្នកប្រដាល់ជើងខ្លាំង ដែលធ្លាប់ប្រកួតជាមួយអ្នកប្រដាល់ថៃច្រើននាក់មកហើយនាពេលកន្លងមក ដោយវាយចាញ់តិចតួចបំផុត ដែលការជួបថៃចុងក្រោយគេនោះ ផល សោភ័ណ្ឌ វាយឈ្នះ Luk Yord ក្នុងទឹកទី៣ កាលពីថ្ងៃទី១៩ ខែតុលា ឆ្នាំ២០១៨កន្លងទៅនេះ។
និយាយជារួម ក្នុងការប្រកួតចំនួន១១៩លើក ផល សោភ័ណ្ឌ វាយឈ្នះ៩៩លើកហើយ ដោយចាញ់តែ១៩លើក និងស្មើ០១លើក ហើយធ្លាប់ផ្ដួលគូប្រកួតឲ្យសន្លប់លើរេញចំនួន៤១លើក។ យ៉ាងណា សម្រាប់ការជួបLek Phitលើកនេះ គេនៅតែមានជំនឿទុកចិត្តលើ ផល សោភ័ណ្ឌ ថានឹងអាចយកឈ្នះអ្នកប្រដាល់ថៃនេះបានមិនខាន។
ឌុន រដ្ឋា អ្នកប្រដាល់ជើងខ្លាំង នៃក្លិបអេភូថងកីឡា នឹងត្រូវឡើងតស៊ូជាមួយអ្នកប្រដាល់ម៉ាឡេស៊ីMajid Hossein។ ពីរនាក់នេះ ជួបគ្នាក្នុងប្រភេទទម្ងន់៧១គីឡូក្រាម។
Majid Hossein ជាអ្នកប្រដាល់ហ្វឹកហាត់នៅប្រទេសថៃ ហើយគេធ្លាប់មកប្រកួតនៅស្រុកខ្មែរម្ដងហើយ កាលពីថ្ងៃទី០៣ ខែវិច្ឆិកា ឆ្នាំ២០១៨ ដោយបានផ្ដួល ហេង វិឆ័យ អ្នកប្រដាល់ក្លិបអេភូថង ឲ្យសន្លប់ក្នុងទឹកទី៣។ អ្នកប្រដាល់ជនជាតិម៉ាឡេស៊ីរូបនេះ គេប្រកួតមានប្លង់តាមលក្ខណៈបច្ចេកទេសទាំងកណ្ដាប់ដៃ ទាំងជើងទាត់ ជង្គង់កែង គឺមានកំប្លេតែម្ដង។
ឌុន រដ្ឋា អ្នកប្រដាល់កម្ពុជាយើងវិញ ជាអ្នកប្រដាល់ចាស់វស្សា។ គេមានស្នៀតប្រដាល់ល្អ និង មានចិត្តប្រដាល់ធំ ហើយហ៊ានប្ដូរជាមួយគូប្រកួតដោយមិនខ្លាចញញើតឡើយ។
សម្រាប់ការជួបប្រកួតជាមួយMajid Hossein នេះ មិនដឹងថា ឌុន រដ្ឋា អាចយកឈ្នះបានឬអត់នោះទេ ?។ ឌុន រដ្ឋា មានកំណត់ត្រាប្រកួត៨៧លើក ឈ្នះ៦៤លើក ចាញ់១៨លើក និងស្មើ៥លើក ខណៈដែលMajid Hossein មានកំណត់ត្រាប្រកួតតែ២២លើកប៉ុណ្ណោះ ក្នុងនោះវាយឈ្នះ១៨លើក ចាញ់០៣លើក និងស្មើ០១លើក។
ទោះជាយ៉ាងណា អ្នកប្រដាល់ ឌុន រដ្ឋា គេមិនសូវជួបសំណាងល្អប៉ុន្មានទេ ក្នុងការជួបប្រកួតជាមួយបរទេសនោះ។ ដូច្នេះ ចាំមើលរវាង ឌុន រដ្ឋា និង Majid Hossein ជួបគ្នាលើកទី១នេះ តើនរណាជាអ្នកឈ្នះនោះ?៕
Source: Kampuchea Thmey Daily
0 Comments