លោក Donald Trump កាលពីថ្ងៃអង្គារបានធ្វើការវាយប្រហារមិនធម្មតាមួយទៅលើលោក Emmanuel Macron ដោយចំអកដល់អត្រាគាំទ្ររបស់ប្រធានាធិបតីបារាំងរូបនេះនិងបានស្តីបន្ទោសគាត់ចំពោះសំណើការពារអ៊ឺរ៉ុបដែលបានទទួលការជំរុញថ្មីពីប្រទេសអាល្លឺម៉ង់។
នៅចុងបញ្ចប់នៃការធ្វើដំណើរទៅកាន់ទីក្រុងប៉ារីសដើម្បីរម្លឹកសង្គ្រាមលោកលើកទី១, លោក Trump បានបង្ហោះ Twitter ប្រឆាំងនឹងម្ចាស់ផ្ទះហើយបានបន្តការចោទប្រកាន់របស់គាត់ថា សម្ព័ន្ធមិត្តអឺរ៉ុបរបស់អាមេរិកនៅក្នុងអង្គការណាតូបានចំណាយតិចតួចណាស់លើការការពារ។
លោក Trump បានបង្ហោះ Twitter ថា “លោក Emmanuel Macron បានស្នើឲ្យបង្កើតកងទ័ពផ្ទាល់របស់ខ្លួនដើម្បីការពារទ្វីបអឺរ៉ុបប្រឆាំងសហរដ្ឋអាមេរិក ចិននិងរុស្ស៊ីប៉ុន្តែវាគឺអាល្លឺម៉ង់ទេនៅក្នុងសង្គ្រាមលោកលើកទី១និងទី២”។
លោកបានបន្តដោយយកពាក្យស្លោកយុទ្ធនាការ “MAKE FRANCE GREAT AGAIN!” មុនពេលបង្វែទៅរកអ្វីដែលគាត់រិះគន់ថាជាអ្នកគាំពារនិយមពន្ធបារាំងលើស្រាអាមេរិកដោយនិយាយថា “ពួកគេមិនសមរម្យទេ ត្រូវតែផ្លាស់ប្តូរ”។
ការបញ្ចេញកំហឹងនេះបានកើតឡើងនៅពេលអឺរ៉ុបបង្កើនសំណួរថាតើពួកគេគួរតែពឹងផ្អែកទៅលើលោក Trump និងសហរដ្ឋអាមេរិកដែរឬទេសម្រាប់ការការពារដែលត្រូវបានធានាក្នុងអំឡុងសង្គ្រាមត្រជាក់និងហួសពីនេះដោយសម្ព័ន្ធណាតូដែលលាតសន្ធឹងពីអាឡាស្កាទៅទួរគី។
ស្របពេលជាមួយគ្នានោះ អធិការបតីអាល្លឺម៉ង់លោកស្រី Angela Merkel កាលពីថ្ងៃអង្គារបានសម្តែងការគាំទ្រយ៉ាងច្បាស់លាស់ចំពោះគំនិតរបស់បារាំងក្នុងការការពារអឺរ៉ុបជារួម។
លោកស្រី Merkel បានប្រាប់សម័យប្រជុំសភាអឺរ៉ុបថា “ប្រសិនបើយើងក្រឡេកមើលអំពីការអភិវឌ្ឍន៍កាលពីឆ្នាំមុន អ្វីដែលពិតជាសំខាន់នោះគឺថា យើងត្រូវតែធ្វើការនៅលើចក្ខុវិស័យអំពីការបង្កើតកងទ័ពអឺរ៉ុបពិតប្រាកដនៅថ្ងៃណាមួយ”។
លោកស្រី Merkel បាននិយាយថា កងទ័ពអ៊ឺរ៉ុបនឹងដើរតួស្របទៅនឹងអង្គការណាតូហើយនឹងស្ថិតនៅក្រោមក្រុមប្រឹក្សាសន្តិសុខសហភាពអឺរ៉ុបដែលនឹងក្លាយជាគោលនយោបាយការពាររបស់ទ្វីបនេះ៕ AFP
Source: Kampuchea Thmey Daily
0 Comments