ម៉ន សា​ម៉េ​ត ជួប ឯម សុធី​, សៅ ប៊ុនធឿន ជួប រឿន សុខលី នៅ​TV5

•​វៀត ប៊ុន​ឌឿ​ន ប៉ះ Phich Khaov
​ប្រដាល់ ៖ ការប្រកួត​ប្រដាល់​ដណ្ដើម​ខ្សែក្រវាត់​ជើងឯក​TV5 Knosk Out Series by K.Cement ទម្ងន់​៥៧​គីឡូក្រាម លើ​ស​ង្វៀន​TV5 ព្រែកកំពឹស នៅ​ថ្ងៃ​សៅរ៍​ ទី​០១ ខែ​​ធ្នូ​ ឆ្នាំ​២០១៨​នេះ ជាការ​ប្រកួត​លើក​ទី​៦ ក្នុង​ជម្រុះ​ជុំ​ទី​១ ដែលមាន​អ្នក​ប្រដាល់​៤​រូប ដើម្បី​ប្រជែង​យក​កៅអី ​សម្រាប់​ដំណាក់កាល​ទី​២​បន្តទៀត។​ សម្រាប់​ការប្រកួត​ជម្រុះ​លើក​ទី​៦​នេះ ម៉ន សា​ម៉េ​ត អ្នក​ប្រដាល់​ក្លិប​កងចក្រ​កីឡា នឹង​ជួប​ប្រកួត​ជា​មួយ​ ឯម សុធី អ្នក​ប្រដាល់​ក្លិប​ថ្មគោល​ពោធិ​សែន​ជ័យ។
​
​រវាង ​ម៉ន សា​ម៉េ​ត និង ឯម សុធី នេះ ពួកគេ​មិន​ធ្លាប់​ជួបគ្នា​ទេ​កន្លងមក ព្រោះ​ពួកគេ​ទាំងពីរ​ពីមុន​មាន​ទីតាំង​ខុសគ្នា ពោលគឺ​ ម៉ន ​សា​ម៉េ​ត មាន​កម្រិត​សមត្ថភាព​បច្ចេកទេស​ខ្ពស់​ជាង ​ឯម សុធី តែ​យ៉ាងណា​ ឯម សុធី បច្ចុប្បន្ន​គេ​ក៏​មាន​ការវិវត្តន៍​រីកចម្រើន​ខ្លាំង​ណាស់ដែរ។


​
ទោះជា​យ៉ាងណា ការជួបគ្នា​រវាង ​ម៉ន សា​ម៉េ​ត និង ឯម សុធី​នេះ តាម​ក្រុមអ្នកវិភាគ​ប្រដាល់​អះអាង​នោះ​ថា ឯម សុធី​ បើទោះបីជា​ល្អ​ និង​ខ្លាំង​ជាង​មុន​ក្ដី ក៏​ទំនងជា​មិន​ឈ្នះ ​ម៉ន សា​ម៉េ​ត​ ដែរ។ ព្រោះ​ម៉ន សា​ម៉េ​ត មាន​កាយសម្បទា​រឹងមាំ វាយ​បុក​ខ្លាំង ​និង​មាន​ផ្លែ​ល្អ​ជាង ​ឯម សុធី។ ចាំមើល តើ ម៉ន សា​ម៉េ​ត អាច​យកឈ្នះ​ ឯម សុធី បាន​មែន​ឬ​អត់ ​សម្រាប់​ការ​ជួបគ្នា​ក្នុង​ជម្រុះ​ខ្សែក្រវាត់​ជើងឯក​TV5 Knoc k Out Series ទម្ងន់​៥៧​គីឡូក្រាម​ជុំ​ទី​១​នេះ។
​
សូម​បញ្ជាក់​ថា ការប្រកួត​ក្នុង​ដំណាក់​ទី​១​នេះ ប្រកួត​តែ​បី​ទឹក​ទេ ហើយ​អ្នក​ដែល​ឈ្នះ​បាន​ឡើង និង​អ្នក​ដែល​ចាញ់​ត្រូវ​ជ្រុះ​ធ្លាក់​ត្រឹមនេះ។​
​
ចំពោះ​ការប្រកួត​មួយគូ​ទៀត​នោះ ជាការ​ជួបគ្នា​រវាង​អ្នក​ប្រដាល់​ជើងចាស់​ សៅ ប៊ុនធឿន ក្លិប​តា​ព្រហ្ម​មានជ័យ និង ជើង​ខ្លាំង​ស្រករ​ក្រោយ ​រឿន សុខលី អ្នក​ប្រដាល់​ក្លិប​ការិយាល័យ​ទី​៥ កងទ័ព​ជើង​គោក។ ពីរ​នាក់​នេះ ក៏​មិន​ធ្លាប់​ប៉ះគ្នា​ដែរ​កន្លងមក។
​
សម្រាប់​ការជួបគ្នា​លើក​នេះ មិនដឹងថា​ជើងចាស់ ​សៅ ប៊ុនធឿន អាច​យកឈ្នះ​ រឿន សុខលី បាន​ឬ​អត់​នោះទេ? ព្រោះថា​ រឿន សុខលី គេ​វាយ​ល្អ​ និង​ខ្លាំង​គ្រាន់បើ​ដែរ​។ ដូច្នេះ​ពុំ​ដឹងថា ​ប៊ុនធឿន​ អាច​វាយ​ឈ្នះ​គេ​ ឬ​អត់​នោះឡើយ?។​
​តែ​យ៉ាងណា រឿន សុខលី ប៉ះចំ​ជើង​ខ្លាំង ​សៅ ប៊ុនធឿន ដែល​វាយ​មិន​ប្រណី​ដៃ​នោះ ទំនងជា​រាង​យ៉ាប់​បន្តិច​ហើយ។ ប៉ុន្តែ សៅ ប៊ុនធឿន ក៏​មិនអាច​ធ្វេសប្រហែស ​ឬ​មើលស្រាល ​រឿន សុខលី បានដែរ។ យ៉ាងណា​ការប្រកួត​រវាង​អ្នក​ប្រដាល់​ទាំងពីរ ទោះជា​អ្នកណា​ឈ្នះ ក៏​ឈ្នះ​ដោយ​វេទនា​ដែរ ។ ចាំមើល រវាង ​សៅ ប៊ុនធឿន និង រឿន សុខលី តើន​រណា​នៅ នរណា​ដើរ​ចេញពី​ការប្រកួត​នេះ?។​
​ ​
ព្រឹត្តិការណ៍​ប្រកួត​ដណ្ដើម​ពាន​រង្វាន់​ជើងឯក​TV5 Knock Out Series by K.Cement ទម្ងន់​៥៧ គីឡូ​ក្រាម​នេះ មាន​អ្នក​ប្រដាល់​ចំនួន​៣២​នាក់​ចូលរួម ហើយ​ចែកចេញជា​៤​ជុំ និង​មាន​រូបមន្ត​ប្រកួត​គឺ ជុំ​ទី​១​ ជាការ​ប្រកួត​ជម្រុះ​ក្នុងចំណោម​៣២​នាក់ ទុក​តែ​១៦​នាក់។ ជុំ​ទី​២ ជាការ​ជម្រុះ​ក្នុងចំណោម​១៦​នាក់ ទុក​៨​នាក់ ហើយ​ជុំ​ទី​៣ គឺ​ជម្រុះ​ក្នុង​៨​នាក់​ទុក​៤​នាក់ និង​ជុំ​ទី​៤​ និង​ទី​៥ ជាការ​ប្រកួត​ដំណាក់កាល​ផ្ដាច់ព្រ័ត្រ គឺ​ពាក់កណ្ដាល​ផ្ដាច់ព្រ័ត្រ ​និង​ផ្ដាច់ព្រ័ត្រ​។​
​
គួរ​បញ្ជាក់ថា ក្នុងការ​ប្រកួត​ចម្រាញ់​៥​លើក​កន្លងមកនេះ គេ​រកឃើញ​អ្នក​ប្រដាល់​ខ្លាំង​បាន​ចំនួន​១០​រូប​ហើយ គឺ ឆាយ មាស ក្លិប​សំរោង​កោង​ខេត្ត​បាត់ដំបង​, បឺត សង្ឃឹម ក្លិប​រ៉ា​ហាប់​ស្វាយប៉ាក , អេ រដ្ឋា ក្លិប​អេ​ភូ​ថង​កីឡា ,​វ៉ាន់ វឿន​ក្លិប​ឃ្លាំងមឿង​កីឡា​ខេត្ត​ពោធិ៍សាត់​, សៀវ ង៉ុ​យ ក្លិប​កងពលធំ​អន្តរាគមន៍​លេខ​២ ,សេក គឹម​សាន្ត ក្លិប​អង្គរ​មានជ័យ​ ខេត្ត​សៀមរាប , ធន់ អៀង​ឡៃ សមាគម​កីឡា​ប្រដាល់​ក្រសួងការពារជាតិ ,​យុគ យក្ស​ផ្លែ ក្លិប​បូរី​រាជសីហ៍​មាន​រិ​ទ្ធ និង សេន កុសល ក្លិប​មោងឬស្សី​មរតក​គុន​ខ្មែរ។​
​
ចំពោះ​ការប្រកួត​ជា​លក្ខណៈ​មិត្តភាព​អន្តរជាតិ​វិញ វៀត ប៊ុន​ឌឿ​ន អ្នក​ប្រដាល់​ក្លិប​មជ្ឈមណ្ឌល​កីឡា​កងយោធពលខេមរភូមិន្ទ ត្រូវគេ​ផ្គូ​ឲ្យ​ជួប​ប្រកួត​ជាមួយ​អ្នក​ប្រដាល់​ថៃ​Phich Khaov។ ពីរ​នាក់​នេះ ជួប​គ្នា​ក្នុង​ប្រភេទ​ទម្ងន់​៦០​គីឡូក្រាម។​
​
រវាង ​វៀត ប៊ុន​ឌឿ​ន និង Phich Khaov នេះ បើ​តាម ​លោក ​សេង ក​ដិ​កា អ្នកចាត់ចែង​កម្មវិធី​ប្រដាល់​ប្រចាំ​នៅ​សង្វៀន​TV5 នេះ ឲ្យ​ដឹង​នោះ​ថា អ្នក​ប្រដាល់​ថៃ​រូប​នេះ គេ​ជា​ជើង​ខ្លាំង​នៅ​ស្រុក​ថៃ តែ​មិន​ដែល​មក​ប្រកួត​នៅ​ស្រុក​ខ្មែរ​នោះ​ទេ។ លោក​អះអាង​ថា យ៉ាងណា​Phich Khaov ​នេះ វាយ​ល្អ​ និង​ខ្លាំង ។​
​
វៀត ប៊ុន​ឌឿ​ន គេ​ក៏​ល្អ​និង​ខ្លាំង​ដែរ។ គេ​ជួប​ប្រកួត​ថៃ​លើកចុងក្រោយ​នេះ វាយ ​ឈ្នះ ​Phat Prachao ដោយ​ពិន្ទុ កាលពី​ថ្ងៃ​ទី​០១ ខែ​កញ្ញា​ ឆ្នាំ​២០១៨​កន្លងទៅនេះ៕

​



Source: Kampuchea Thmey Daily