ស្វាយរៀង ៖ ក្រុមចោរលួចចោរឆក់យ៉ាងសកម្ម នៅក្នុងខេត្តស្វាយរៀង ត្រូវបានកងរាជអាវុធហត្ថខេត្តស្វាយរៀង បង្ក្រាប និងធ្វើការបង្ហាញមុខ នៅព្រឹកថ្ងៃទី២៨ ខែវិច្ឆិកា ឆ្នាំ២០១៨នេះ នៅទីបញ្ជាការដ្ឋានកងរាជអាវុធហត្ថខេត្តស្វាយរៀង ហើយកន្លងមកក្រុមនេះ បានធ្វើសកម្មភាពជាច្រើនលើកផងដែរ ក្នុងភូមិសាស្ត្រទឹកដីខេត្តស្វាយរៀង។
បើតាម លោកវរសេនីយ៍ឯក ស្រី វុន្ថា មេបញ្ជាការរងកងរាជអាវុធហត្ថខេត្តស្វាយរៀងបានដឹងថាយោងតាមពាក្យបណ្ដឹងរបស់ជនរងគ្រោះ ឈ្មោះ ឡុង ហ្គីម ភេទប្រុស អាយុ៣០ឆ្នាំ ជនជាតិវៀតណាម ស្នាក់នៅបន្ទប់ជួលលេខ៨ ស្ថិតក្នុងភូមិបាវិតកណ្ដាល សង្កាត់បាវិត ក្រុងបាវិត ខេត្ត ស្វាយរៀងគឺ នៅវេលាម៉ោង២១និង៣០នាទី ថ្ងៃទី២៣ ខែវិច្ឆិកា ឆ្នាំ២០១៨ មានឈ្មោះ ហេង ឈ្មោះ ត្រា ឈ្មោះ ចន្តា និងបក្ខពួកមួយចំនួនទៀត បានធ្វើសកម្មភាពឆក់កាបូបរបស់ខ្លួន។
លោកបានបន្តទៀតថា ក្រោយពីទទួលបានព័ត៌មាន និងពាក្យបណ្ដឹង ភ្លាមនោះ ឯកឧត្ដម ឧត្តមសេនីយ៍ត្រី សែ វុទ្ធី មេបញ្ជាការកងរាជអាវុធហត្ថខេត្តស្វាយរៀង បានដាក់បទបញ្ជាយ៉ាងម៉ឺងម៉ាត់ទៅកម្លាំងមន្ទីរយុត្តិធម៌ សហការជាមួយកម្លាំងមូលដ្ឋានកងរាជអាវុធហត្ថក្រុងបាវិត ដឹកនាំដោយលោកវរសេនីយ៍ឯក ស្រី វុន្ថា មេបញ្ជាការរងកងរាជអាវុធហត្ថខេត្ត ព្រមទាំងមានការសម្របសម្រួលពី លោក គង់ ច័ន្ទខេមរិទ្ធ ព្រះរាជអាជ្ញាអមសាលាដំបូងខេត្តស្វាយរៀង ចុះស្រាវជ្រាវបង្ក្រាប និងឃាត់ខ្លួនក្រុមចោរលួចចោរឆក់បានជាបន្តបន្ទាប់ រួមនឹងអ្នកទទួលទិញផលចោរកម្មនៅវេលាម៉ោង២និង១០នាទី ថ្ងៃទី២៥ ខែវិច្ឆិកា ឆ្នាំ២០១៨ បានចំនួន១១នាក់ ក្នុងនោះឃាត់ខ្លួនអ្នកទទួលទិញផលចោរកម្មម្នាក់ផងដែរ ដែលមានឈ្មោះ អ៊ួ ឌី ភេទប្រុស អាយុ២៦ឆ្នាំ មុខរបរអាជីវករ មានទីលំនៅភូមិ បាវិតកណ្តាល សង្កាត់បាវិត ក្រុងបាវិត ខេត្តស្វាយរៀង។
រីឯវត្ថុតាងដែលសមត្ថកិច្ចយើងដកហូតបានរួមមាន ៖
ទី១.ទូរស័ព្ទដៃ ចំនួន២៨គ្រឿង
ទី២.ម៉ូតូ ចំនួន៧គ្រឿង
ទី៣.កាបូបចំនួន១
ទី៤.អាយផេត១គ្រឿង
បច្ចុប្បន្ន ជនសង្ស័យជាមុខសញ្ញា និងអ្នកទទួលផលចោរកម្ម ព្រមទាំងវត្ថុតាង ត្រូវបានសមត្ថកិច្ចកងរាជអាវុធហត្ថ ខេត្តស្វាយរៀង បញ្ជូនទៅសាលាដំបូងខេត្តស្វាយរៀង ចាត់ការតាមនីតិវិធី នៃច្បាប់ នៅព្រឹកថ្ងៃទី២៨ ខែវិច្ឆិកា ឆ្នាំ២០១៨នេះ៕
Source: Kampuchea Thmey Daily
0 Comments