ភ្នំពេញ ៖ ប៉ូលិសអន្តរាគមន៍ក្រុងម្នាក់ ជិះម៉ូតូជាមួយប្រពន្ធ ធ្វើដំណើរចុះពីលើស្ពានជ្រោយចង្វា បានទៅប៉ះជាមួយនឹងរថយន្ត មួយគ្រឿង ម៉ាក ហាយលែនឌ័រ រួចបានចុះពីលើម៉ូតូទៅទះកំផ្លៀងម្ចាស់រថយន្តចំនួន២ដៃ និងរកវាយខ្នោះថែមទៀត ដែលហេតុការណ៍នេះបង្កការភ្ញាក់ផ្អើលឡើង កាលពីវេលាម៉ោង១១និង៣០នាទីព្រឹក ថ្ងៃទី២៧ ខែវិច្ឆិកា ឆ្នាំ២០១៨ ចំណុចរង្វង់មូលកួចកាណុង ជិតគោលដៅចរាចរណ៍ ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។
ប្រភពព័ត៌មាននៅកន្លែងកើតហេតុបានឲ្យដឹងថា នៅមុនពេលកើតហេតុ គេឃើញរថយន្តមួយគ្រឿងម៉ាកហាយលែនឌ័រ ពណ៌ខៀវ ពាក់ស្លាកលេខ កំពង់ចាម 2A-5458 ធ្វើដំណើរក្នុងទិសដៅស្របគ្នាជាមួយម៉ូតូជនបង្ក ដោយមិនចាំម៉ាក ក្នុងទិសដៅពីត្បូងទៅជើង ខណៈពេលធ្វើដំណើរមកដល់ចំណុចកើតហេតុ រថយន្ត និងម៉ូតូ ក៏បានប៉ះគ្នាបន្តិច រួចមកក៏បានឈ្លោះទាស់ទែងសំដីគ្នាយ៉ាងខ្លាំង ធ្វើឲ្យភាគីជាម្ចាស់ម៉ូតូបានដើរមកទះទៅលើម្ចាស់រថយន្តចំនួនពីរកំផ្លៀង ថែមទាំងរកវាយខ្នោះ និងបោកទូរស័ព្ទជនរងគ្រោះឲ្យខូចខាតទៀតផង។
ប្រភពព័ត៌មានបានបន្តទៀតថា ក្រោយពេលកើតហេតុ សមត្ថកិច្ចដែលឈរប្រចាំការនៅគោលដៅចរាចរណ៍ខាងលើ បានទាក់ទងទៅសមត្ថកិច្ចមូលដ្ឋានប៉ុស្តិ៍ស្រះចក ដើម្បីចុះមកយកជនបង្ក និងជនរងគ្រោះយកទៅប៉ុស្តិ៍ ធ្វើការសួរនាំរកដំណោះស្រាយ។
បន្ទាប់ពីសមត្ថកិច្ចបានសួរនាំ និងសម្របសម្រួលរួចមក ភាគីទាំងសងខាងព្រមបញ្ចប់រឿង ដោយសារភាគីជនបង្កព្រមសងថ្លៃខូចខាតចំនួន២៥០ដុល្លារ ទៅឲ្យជនរងគ្រោះ និងព្រមសំពះសុំទោសជនរងគ្រោះ ដើម្បីបញ្ចប់រឿង៕
Source: Kampuchea Thmey Daily
0 Comments