ពោធិ៍សាត់ ៖ បុរសចោលម្សៀតម្នាក់ បានផឹកស៊ីស្រវឹងអួទីនួ ដល់ផ្ទះហិង្សាដាក់ប្រពន្ធ រួចហើយប្រមូលសម្ភារៈនៅក្នុងផ្ទះបោះចោលទៅដី ហើយដុតកម្ទេចចោល តែមួយសន្ទុះ ត្រូវនគរបាលក្របួចយកទៅប៉ុស្តិ៍។
ហេតុការណ៍ខាងលើនេះ បានកើតឡើងកាលពីវេលាម៉ោង១២និង១៥នាទី ថ្ងៃទី១០ ខែធ្នូ ឆ្នាំ២០១៨ ស្ថិតនៅក្នុងភូមិព្រៃយៀង ឃុំតាលោ ស្រុកបាកាន ខេត្តពោធិ៍សាត់។
ជនសង្ស័យក្នុងអំពើហិង្សានេះ ត្រូវ លោក រ៉ង សុវណ្ណារឿង នាយប៉ុស្តិ៍មូលដ្ឋានឃុំតាលោ ប្រាប់ងាឈ្មោះ គឺម វឿន អាយុ៤០ឆ្នាំ ដោយស្ត្រីរងគ្រោះជាប្រពន្ធឈ្មោះ ភុល តើយ អាយុ៥២ឆ្នាំ អ្នកទាំង២រស់នៅភូមិកើតហេតុខាងលើ។
សម្ភារៈដែលជនសង្ស័យប្រមូលដុតចោលនោះរួមមាន មុង ភួយ សំលៀកបំពាក់ ស្រូវបីការុង កង់១គ្រឿង អង្ករ២០គីឡូក្រាម សៀវភៅកំណើត សៀវភៅគ្រួសារ និងប័ណ្ណក្រីក្រ។
លោកបន្តថា មុនពេលកើតហេតុ បុរសនោះ បានដើរផឹកស៊ីស្រវឹងអួទីនួ មិនធ្វើការងារអីទេ ហើយក៏បានចូលមកដល់ផ្ទះរករឿងហិង្សាដាក់ប្រពន្ធ រួចទៅប្រមូលសម្ភារៈក្នុងផ្ទះបោះទៅលើដី ដុតកម្ទេចចោលតែម្ដង។
ក្រោយពេលមានហិង្សានេះកើតឡើងភ្លាម កម្លាំងមូលដ្ឋានរបស់លោក បានចុះទៅឃាត់ខ្លួនមកកាន់មូលដ្ឋានប៉ុស្តិ៍ ដើម្បីចាត់ចែងនីតិវិធី តែដោយខាងស្ត្រីជាប្រពន្ធ បានសុំអង្វរដល់សមត្ថកិច្ច និងដកពាក្យបណ្ដឹង ឲ្យយកប្តីទៅអប់រំលើកទីមួយ ទុកឱកាសឲ្យកែខ្លួន ទើបសមត្ថកិច្ច ធ្វើលក្ខខណ្ឌត្រឹមត្រូវ រួចឲ្យទៅផ្ទះវិញ ដោយបញ្ចប់ហិង្សាក្នុងគ្រួសារ៕
Source: Kampuchea Thmey Daily
0 Comments