លោកប្រធានាធិបតី Donald Trump បាននិយាយកាលពីថ្ងៃចន្ទថា ការបង់ប្រាក់បំបិទមាត់ដែលបានធ្វើឡើងចំពោះស្ត្រីមុនការបោះឆ្នោតឆ្នាំ២០១៦គឺជារឿងស្របច្បាប់ខណៈពេល ដែលគាត់ព្យាយាមបំពេញមុខតំណែងសំខាន់របស់នាយខុទ្ទកាល័យដែលបានបង្កចលាចលរយៈពេលពីរឆ្នាំក្នុងសេតវិមាន។
ខណៈពេលដែលវានៅតែមិនទាន់ច្បាស់ថាតើប្រធានាធិបតីកំពុងកាន់តំណែងម្នាក់ពិតជាអាចត្រូវបានចោទប្រកាន់មែនឬទេនោះ មេដឹកនាំអាមេរិករូបនេះបានដឹងខ្លួនឯងថាកំពុងស្ថិតនៅក្នុងការស៊ើបអង្កេតហិរញ្ញវត្ថុរបស់ FBI ។
ការស៊ើបអង្កេតនេះកាន់តែធ្វើអោយមានភាពតានតឹងនៅពេលដែលគាត់បញ្ចប់ឆ្នាំទី២នៃការកាន់តំណែងជាមួយនឹងការលាលែងរបស់មន្ត្រីកំពូលលោក John Kelly ហើយគណបក្សប្រជាធិបតេយ្យដែលជាគណបក្សប្រឆាំងត្រៀមខ្លួនចូលគ្រប់គ្រងសភាជាប់ទាប។
ឆ្លើយតបទៅនឹងការដាក់ពាក្យបណ្តឹងរបស់តុលាការកាលពីថ្ងៃសុក្រអំពីការទូទាត់ប្រាក់បំបិទមាត់ដែលផ្តល់អោយតារាម៉ូដែល Playboy ឈ្មោះ Karen McDougal និងតារាសិចឈ្មោះ Stormy Daniels, លោក Trump បានបញ្ឆេះកំហឹងជាថ្មីម្តងទៀតនៅលើ Twitter ដោយបង្ហោះថា គាត់គឺជាជនរងគ្រោះនៃ “ការតាមចាប់កំហុស!”។
នៅក្នុងស្ថានភាពបន្ទាន់ បញ្ហាមួយក្នុងចំណោមបញ្ហាបន្ទាន់បំផុតរបស់លោកប្រធានាធិបតីគឺត្រូវស្វែងរកនាយខុទ្ទកាល័យសេតវិមានថ្មីក្រោយពីប្រកាសថា លោក Kelly នឹងចាកចេញនៅបំណាច់ឆ្នាំនេះ។
លោក Nick Ayres ដែលជានាយខុទ្ទកាល័យរបស់លោកអនុប្រធានាធិបតី Mike Pence ត្រូវបានគេអះអាងថានឹងទទួលបានការងារនេះប៉ុន្តែលោកបានប្រកាសកាលពីថ្ងៃអាទិត្យថា លោកនឹងដកខ្លួនចេញពីការឈរឈ្មោះដែលនេះជាបញ្ហាប្រឈមមួយទៀតដល់លោកប្រធានាធិបតី។
អ្នកសាធារណរដ្ឋមកពីរដ្ឋ Carolina ខាងជើងឈ្មោះ Mark Meadows ដែលជាប្រធានអង្គការ Freedom Caucus ស្តាំនិយមនៅក្នុងសភាតំណាងរាស្ត្រក៏ទទួលបានការចាប់អារម្មណ៍យ៉ាងច្រើនផងដែរ៕ AFP
Source: Kampuchea Thmey Daily
0 Comments