ស្វាយរៀង ៖ អាជីវករដែលទទួលបានសិទ្ធិវិនិយោគផ្សារប្រសូត្រថ្មី ចាក់ដីរំលោភចូលដីព្រែកនៅខាងក្រោយទីតាំងសំណង់ផ្សារនោះ ស្ថិតក្នុងភូមិប្រសូត្រ ឃុំប្រសូត្រ ស្រុកស្វាយទាប ខេត្តស្វាយរៀង ត្រូវបានអាជ្ញាធរខេត្តស្វាយរៀង ចុះចាត់វិធានការភ្លាមៗ ដោយបញ្ជាម្ចាស់ផ្សារ ប្រសូត្រឈ្មោះ ជា សុខា ដែលចាក់ដីរំលោភចូលព្រែកនោះ កាយដីចេញឲ្យដូចដើមឡើងវិញហើយ។
កាលពីរសៀលថ្ងៃទី៩ ខែធ្នូ ឆ្នាំ២០១៨នេះ លោក ហែម ពិសិទ្ធ អភិបាលរងខេត្តបានបញ្ជាក់ ក្នុងធ្វើសន្និសីទសារព័ត៌មានមួយថា កន្លងមក ក្រោយពីអាជ្ញាធរស្រុក ខេត្ត និងអាជ្ញាធរមូលដ្ឋាន បានដឹងពីករណីចាក់ដីរំលោភនេះ គណៈកម្មការចម្រុះ ដោះស្រាយដីធ្លី បានចុះទៅហាមឃាត់ឲ្យបញ្ឈប់សកម្មភាព និងធ្វើការដោះស្រាយ ដោយឲ្យម្ចាស់ផ្សារដែលចាក់ដីលើសចូលព្រែកនោះ កាយមកខាងលើឲ្យដូចដើមវិញ ហើយការអនុវត្ត វិធានការនោះ បាននិងកំពុងចាប់ផ្ដើមនៅពេលនេះតែម្តង។
លោកស្រី ជា សុខា ដែលទទួលបានច្បាប់វិនិយោគផ្សារប្រសូត្របានឲ្យដឹងថា ធម្មតាការងារអភិវឌ្ឍន៍វាតែងតែប៉ះពាល់បន្តិចបន្តួច ខ្ពស់ ទាប ពុំខានឡើយ។
លោកស្រីបានបន្តថា ពីមុនផ្សារនេះ ដូចអណ្ដូងអញ្ចឹង អាជីវករលក់ដូរមានតូបតូចៗ ក្នុងភក់ជ្រាំវេទនាណាស់ ដោយឃើញការលំបាកបែបនេះ លោកស្រីមានលទ្ធភាពធ្វើវិនិយោគ ត្រូវចាក់ដីឲ្យស្មើផ្លូវជាតិលេខ១ ទើបសាងសង់សំណង់ផ្សារប្រសូត្ររួចរាល់ និងចាក់ផ្លូវបេតុងជុំវិញផ្សារបានស្អាត និងស្រួលហើយ។
លោកស្រី សូមសំណូមពរដល់បងប្អូនប្រជាពលរដ្ឋដែលមានលំនៅឋានជាប់ជុំវិញសំណង់ផ្សារសុំអធ្យាស្រ័យ មេត្តាយោគយល់ពេលផ្សារសាងសង់រួចរាល់ ផ្លូវចេញចូលផ្ទះបានស្រួលឡើងវិញពុំខានឡើយ។ ចំពោះចាក់ដីហៀចូលចំណីព្រែកនោះ អាជ្ញាធរខេត្តឲ្យខាងក្រុមហ៊ុនកាយចេញនោះ ឥឡូវបានរួចរាល់ហើយ៕
Source: Kampuchea Thmey Daily
0 Comments