ក្លិបបាល់ទាត់អាស៊ីអឺរ៉ុប សមាជិកពានរង្វាន់លីគកំពូលកម្ពុជា (Metfone Cambodian League 2018) បានរៀបចំកម្មវិធីធ្វើតេស្ដសមត្ថភាពកីឡាករត្រៀមរដូវកាលថ្មី២០១៩ កាលពីថ្មីៗ ខណៈលោក សុក វាសនា គ្រូបង្វឹកប្រចាំក្រុមបានកំណត់កត្តា៤យ៉ាងដើម្បីជ្រើសរើសយកកីឡាករឆ្នើមដាក់ក្នុងបញ្ជី។
លោកគ្រូបង្វឹករូបនេះបន្តថា កត្តាទាំង៤នេះមានដូចជាទី១កម្លាំង,ទី២បច្ចេកទេស, ទី៣ កលល្បិច និងទី៤ គឺចិត្តសាស្ត្រ។ កម្មវិធីតេស្ដដំណាក់កាលទី២នេះមានរយៈពេល៤ថ្ងៃ ដោយពិនិត្យទាំងសមត្ថភាពបេក្ខជនថ្មីៗជាង២០នាក់ និងកីឡាករខ្មែរសល់ពីរដូវកាលមុនប្រមាណ១៣នាក់ទៀត ដើម្បីឈានទៅចម្រាញ់យកអ្នកមានគុណភាពត្រៀមរដូវកាលថ្មី២០១៩។
លោក សុក វាសនា បានពន្យល់ថា ៖ «យើងធ្វើតេស្ដដំណាក់កាលទី២ ហើយទាំងកីឡាករចាស់ និងអ្នកចូលមកធ្វើតេស្ដថ្មី មានជាង៣០នាក់។ អ៊ីចឹងយើងមានផែនការធ្វើតេស្ដ៤ថ្ងៃ យកកីឡាករជាង២០នាក់ត្រៀមរដូវកាលថ្មី។ ដំណាក់កាលទី២នេះ គឺយើងពិនិត្យលើកម្លាំង, បច្ចេកទេស, ទី៣ កលល្បិច និងទី៤ គឺចិត្តសាស្ត្រ។ សម្រាប់កីឡាករចាស់ ប្រសិនបើយើងពិនិត្យមើលថា អាចមានសមត្ថភាពលេងបាន យើងនឹងបន្តជាមួយពួកគេ។ ក្រោយចម្រាញ់បានកីឡាករខ្មែរអស់ហើយ យើងនឹងចាប់ផ្ដើមរកកីឡាករបរទេសម្ដងដើម្បីបង្គ្រប់សម្រាប់រដូវកាលថ្មី»។
ចំពោះកីឡាករថ្មីៗដែលជាប់ឈ្មោះក្រោយជម្រុះបឋមមានដូចជា ឌុន រស្មី, ខៀវ ប៊ុនហ្វុង,គង់ និមល,កុយ សម្បត្តិ,ដេក កាក់ឌីកា, ទឹម សុខា,ផុន សារ៉ាពេជ្រ,ពយ កក្កដា,ភុន សុជាតិ,ម៉ៅ សំបូរ,មាស សម្បត្តិ,មុត បូរី,សារី អេសស្តាវី,សាំង បញ្ញា, សិទ្ធ ម៉េងរិទ្ធិ,សួន ឈុនសេង, សំ វណ្ណនិត,ហេង ប៉ោងឡេង,ឡុង បូរាណ,អ៊ុំ ឧត្តម, សាស៊ីម កាម៉ាល់។
លោក សុក វាសនា គ្រូបង្វឹកក្រុមអាស៊ីអឺរ៉ុប បានលើកឡើងថា កូនក្រុមរបស់ខ្លួនកាលពីរដូវកាល២០១៨កន្លងទៅនៅសល់ប្រមាណជាង១០នាក់ប៉ុណ្ណោះ ដោយសារអ្នកខ្លះផ្លាស់ទ្រនំថ្មី និងមួយចំនួនទៀតបានបញ្ចប់អាជីព។ យុវជនដែលធ្វើតេស្តជាប់ខាងលើនឹងនឹងទទួលអត្ថប្រយោជន៍មួយចំនួនដូចជា នឹងក្លាយជាកីឡាកររបស់ក្លិបអាស៊ីអឺរ៉ុបយូណាយធីត មិនតែប៉ុណ្ណោះ នឹងទទួលបានអាហារូបករណ៍១០០ភាគរយ (រៀនមិនបង់ថ្លៃ) ពីសាកលវិទ្យាល័យអាស៊ីអឺរ៉ុប និងប្រាក់ឧបត្ថម្ភ១៥០ដុល្លារអាមេរិកឡើងទៅ។
បើនិយាយពីលទ្ធផលក្នុងពានរង្វាន់លីគកំពូលរបស់កម្ពុជា ក្រុមអាស៊ីអឺរ៉ុប បានបញ្ចប់រដូវកាលរបស់ខ្លួនដោយឈរចំណាត់ថ្នាក់លេខ៧ ក្នុងចំណោមសមាជិកទាំង១២ក្រុម គឺជាលទ្ធផលដ៏ល្អរបស់ក្លិបតាំងពីបង្កើតមក។ តាមរយៈកម្មវិធីប្រកួតសន្សំពិន្ទុ២២ប្រកួតក្រុមអាស៊ីអឺរ៉ុប បានយកឈ្នះគូប្រកួតបាន៨លើក ហើយស្មើគ្នាបាន៦លើកនិងចាញ់៨លើក ប៉ុណ្ណោះ។ បើនិយាយពីក្នុងពានរង្វាន់សម្តេចតេជោ ហ៊ុន សែន វិញក្រុមនេះបានធ្លាក់ចេញនៅវគ្គ១៦ក្រុមចុងក្រោយថ្នាក់ជាតិក្រោយចាញ់ក្រុមជើងឯកក្រសួងការពារជាតិ ដោយលទ្ធផលទាំង២ជើង ១០ទល់២៕
Source: Kampuchea Thmey Daily
0 Comments