ភ្នំពេញ ៖ គូស្នេហ៍វ័យក្មេងដ៏ស្រស់សោភាមួយគូ ខណៈបន្លំលួចលូកហោប៉ៅយកទូរស័ព្ទគេ ក្នុងកម្មវិធីប្រគំតន្ត្រីផ្សេងៗ បានសម្រេចមួយហើយ ឈានទៅបន្ដសកម្មភាពបន្ថែមទៀត ទើបត្រូវបែកការ ត្រូវបានប្រជាពលរដ្ឋឃាត់ឲ្យសមត្ថកិច្ច កាលពីវេលាម៉ោង៧និង២០ទីយប់ ថ្ងៃទី៩ ខែធ្នូ ឆ្នាំ២០១៨ ចំណុចកន្លែងតាំងពិព័រណ៍ប្រគំតន្ត្រីភូមិព្រៃព្រីងខាងត្បូង សង្កាត់ចោមចៅ២ ខណ្ឌពោធិ៍សែនជ័យ។
ជនសង្ស័យទី១ ឈ្មោះ នួន វិបុល ភេទប្រុស អាយុ១៧ឆ្នាំ មុខរបរមិនពិតប្រាកដ ស្នាក់នៅបុរីសន្តិភាព២ ភូមិដំណាក់ត្រយឹង សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ មានស្រុកកំណើតនៅសង្កាត់បឹងកក់ ខណ្ឌទួលគោក រាជធានីភ្នំពេញ។ ជនសង្ស័យ ទី២ ឈ្មោះ នី ស្រីពុំ ភេទស្រី អាយុ១៧ឆ្នាំ មុខរបរមិនពិតប្រាកដ ស្នាក់នៅបុរីសន្ដិភាព២ ភូមិដំណាក់ត្រយឹង សង្កាត់ចោមចៅ២ ខណ្ឌពោធិ៍សែនជ័យ មានទីកន្លែងកំណើត សង្កាត់បឹងកក់ ខណ្ឌទួលគោក។
ជនរងគ្រោះឈ្មោះ កង វត្តី ភេទស្រី អាយុ២២ឆ្នាំ មុខរបរបុគ្គលិក ក្រុមហ៊ុន ផ្លាហ្សា ស្នាក់នៅភូមិអង្គត្រគៀតសង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ។ ទូរស័ព្ទដែលជនសង្ស័យលួច ម៉ាក អាយហ្វូនសេវែនភ្លឺស តម្លៃជាង៥០០ដុល្លារ។
តាមប្រភពព័ត៌មានពីជនរងគ្រោះបាននិយាយថា មុនពេលកើតហេតុ រូបគាត់ ព្រមទាំងក្រុមគ្រួសារបាននាំគ្នាទៅមើលការដាក់តាំងពិព័រណ៍ និងប្រគំតន្ត្រី បន្ទាប់មកជនសង្ស័យ ជាបុរសខាងលើ បានលូកយកទូរស័ព្ទរបស់ជនរងគ្រោះ និងបណ្ដោះឲ្យទៅជនសង្ស័យម្នាក់ផ្សេងទៀត ហើយជនរងគ្រោះដឹងខ្លួនពេលដឹងថាបាត់ ហើយក៏បានដើររកជនសង្ស័យ ក៏ប្រទះឃើញ ជនសង្ស័យខាងលើ កំពុងធ្វើសកម្មភាព លូកលួចយកទូរស័ព្ទពីជនរងគ្រោះម្នាក់ទៀត ហើយនៅពេលនោះដែរ ត្រូវបានជនរងគ្រោះ និងប្រជាពលរដ្ឋ ឃាត់បាន២នាក់ ហើយប្រគល់ឲ្យសមត្ថកិច្ចភ្លាមៗតែម្ដង។
ប្រជាពលរដ្ឋនៅក្នុងក្រុង ឬនៅតាមទីប្រជុំជននានា គួរមានការប្រុងប្រយ័ត្នខ្ពស់ចំពោះក្រុមជនខិលខូចមួយចំនួនដែលតែងឆ្លៀតឱកាសលួចឆក់នៅតាមផ្សារ និងនៅតាមកម្មវិធីប្រគំតន្ត្រីផ្សេង។
ពួកនេះមានបក្ខពួកច្រើននាក់ និងអាចមានមនុស្សមានលទ្ធភាពគ្រប់គ្រាន់នៅពីក្រោយខ្នងចាំជួយរត់ការដោះស្រាយនៅពេលមានបញ្ហាដូចជាពេលគេចាប់ខ្លួនបានជាដើមក្ដី ហើយក្រុមនេះច្រើនតែយកមនុស្សវ័យក្មេង និងមានរូបសម្ផស្សស្អាតសមរម្យ ព្រោះគេមិនសូវចាប់អារម្មណ៍ពេលបន្លំខ្លួនចូលក្នុងហ្វូងមហាជន។
ក្រោយពេលកើតហេតុ បន្ទាប់ពីឃាត់បានជនសង្ស័យលួចទូរស័ព្ទដៃបាន២នាក់ហើយ ជនរងគ្រោះបានមកដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលចោមចៅទី២ ដើម្បីឲ្យសមត្ថកិច្ចជួយស៊ើបអង្កេតរកមុខសញ្ញាលួចបន្ថែមទៀត និងបន្តចាត់ការតាមនីតិវិធីច្បាប់៕
Source: Kampuchea Thmey Daily
0 Comments