លោកប្រធានាធិបតី Emmanuel Macron នឹងថ្លែងទៅកាន់ជនរួមជាតិអំពីវិបត្ដិ “អាវកាក់ពណ៌លឿង” នៅថ្ងៃចន្ទ ហើយនឹងជួបជាមួយពួកសហជីពនិងអ្នកដឹកនាំអាជីវកម្មដើម្បីស្វែងរកមធ្យោបាយបញ្ចប់ការតវ៉ាដែលបង្កភាពចលាចលក្នុងប្រទេសបារាំង។
ការិយាល័យ Elysee បានប្រកាសថា លោកប្រធានាធិបតីនឹងថ្លែងទៅកាន់ប្រជាជនបារាំង។ នេះជាការនិយាយជាសាធារណៈលើកដំបូងរបស់គាត់បន្ទាប់ពីផ្ទុះការធ្វើបាតុកម្មប្រឆាំងរដ្ឋាភិបាលរយៈពេល៤សប្តាហ៍ដែលបានប្រែក្លាយទៅជាអំពើហិង្សាជាថ្មីម្តងទៀតកាលពីថ្ងៃសៅរ៍ក្នុងទីក្រុងប៉ារីសនិងនៅទីក្រុងដទៃទៀត។
មន្ត្រីរដ្ឋាភិបាលបាននិយាយថា អ្នកនិយមកណ្តាលវ័យ៤០ឆ្នាំរូបនេះនឹងប្រកាសពីវិធានការរឹងមាំភ្លាមៗដើម្បីឆ្លើយតបទៅនឹងទុក្ខកង្វល់របស់ក្រុមបាតុករ។
ការអំពាវនាវបានកើនឡើងនៅទូទាំងវិសាលភាពនយោបាយអោយមានសកម្មភាពខ្លាំងក្លាខណៈពេលដែលអតីតគូប្រជែងប្រធានាធិបតីស្តាំនិយមលោកស្រី Marine Le Pen បានជំរុញអោយលោក Macron ទទួលស្គាល់ការឈឺចាប់របស់សង្គមនិងមានការឆ្លើយតបខ្លាំងក្លាភ្លាមៗ។
អ្នកនាំពាក្យរដ្ឋាភិបាលលោក Benjamin Griveaux បានប្រាប់វិទ្យុ Europe 1 កាលពីថ្ងៃអាទិត្យថា “វាច្បាស់ណាស់ថា យើងមើលងាយតម្រូវការរបស់ប្រជាពលរដ្ឋដើម្បីអោយពួកគេស្តាប់”។
ទន្ទឹមនោះដែរ រដ្ឋមន្ដ្រីក្រសួងហិរញ្ញវត្ថុលោក Bruno Le Maire បាននិយាយថា សប្តាហ៍នៃភាពចលាចលគឺជា “មហន្តរាយសេដ្ឋកិច្ច” សម្រាប់ប្រទេសបារាំងដែលបណ្តាលអោយមានការបំផ្លិចបំផ្លាញនៅលើផ្លូវហើយរាំងស្ទះអ្នកទិញឥវ៉ាន់និងភ្ញៀវទេសចរមុនពិធីបុណ្យណូអែល។
គួរបញ្ជាក់ជាថ្មីថា ក្រុម “អាវកាក់ពណ៌លឿង” បានចាប់ផ្តើមបិទផ្លូវនៅទូទាំងប្រទេសកាលពីថ្ងៃទី១៧ខែវិច្ឆិកាក្នុងការតវ៉ាប្រឆាំងនឹងការដំឡើងពន្ធដែលធ្វើអោយតម្លៃប្រេងឥន្ធនៈកើនឡើង។
ចាប់តាំងពីពេលនោះមក ការធ្វើបាតុកម្មរបស់ពួកគេបានរាលដាលទៅជាចលនាដ៏ធំមួយប្រឆាំងនឹងលោក Macron ដែលក្រុមអ្នកតវ៉ាចោទប្រកាន់ថា មិនទាក់ទងជាមួយប្រជាជនសាមញ្ញនៅក្នុងប្រទេសបារាំង៕ AFP
Source: Kampuchea Thmey Daily
0 Comments