អ៊ឹម ជីវ៉ា ធ្វើខួបកំណើតលើករាសីឆ្នាំចុងក្រោយ ដោយមានភ្ញៀវចូលរួមលើសពីការរំពឹងទុក !

ភ្នំពេញ ៖ តារាប្រុស លោក អ៊ឹម ជីវ៉ា ដែលមហាជនតែងឃើញបង្ហាញវត្តមានតាមរយៈការសម្តែងរឿង និង សកម្មភាពមនុស្សធម៌ជួយសង្គម បានអះអាងនាឱកាសថ្ងៃខួបកំណើតរបស់ខ្លួន កាលពីយប់ថ្ងៃទី០៩ ខែធ្នូ ឆ្នាំ២០១៨ ថា ខួបកំណើតឆ្នាំនេះ គឺជាឆ្នាំចុងក្រោយហើយ ខណៈឆ្នាំកន្លងមកលោកតែងតែរៀបចំពិធីជប់លៀង ដោយអញ្ជើញភ្ញៀវចូលរួមអបអរជាបន្តបន្ទាប់។

តារាសម្ដែងប្រុស លោក អ៊ឹម ជីវ៉ា នាឱកាសថ្ងៃខួបកំណើតរបស់ខ្លួន ដែលធ្វើឡើងនៅភោជនីយដ្ឋានវីហ្វ្រេន បឹងត្របែក ក្រៅតែបង្ហាញពីគោលបំណងរបស់ខ្លួនអរគុណដល់ភ្ញៀវកិត្តិយសទាំងមិត្តភ័ក្ដិរួមអាជីពសិល្បៈ និងបងប្អូនសាច់ញាតិហើយនោះ លោកក៏បានបញ្ជាក់ថា នៅឆ្នាំក្រោយៗទៀត លោកនឹងលែងមានពិធីជប់លៀងអបអរខួបកំណើតទៀតហើយ។

លោក អ៊ឹម ជីវ៉ា បានរៀបរាប់ថា ខួបកំណើតយប់មិញ គឺជាការបញ្ចប់ធ្វើខួបតទៀតហើយ ចំនួនភ្ញៀវចូលរួមមាន៣១តុ។ ខ្ញុំបាទ អ៊ឹម ជីវ៉ា ពិតជារំភើបសប្បាយចិត្តរីករាយឥតឧបមា ខ្ញុំបាទមិននឹកស្មានថា មានវត្តមានភ្ញៀវកិត្តិយសផ្តល់កិត្តិយសយ៉ាងច្រើនកុះករដូច្នោះឡើយ។ ខ្ញុំបាទ សូមថ្លែងអំណរអគុណចំពោះវត្តមានឯកឧត្ដម លោកឧកញ៉ា លោកជំទាវ លោក លោកស្រី អ្នកនាង កញ្ញា សិល្បករ សិល្បៈការិនី និងបណ្ដាសារព័ត៌មានទាំងអស់ ដែលបានអាណិតស្រលាញ់រាប់អានខ្ញុំ ផ្តល់វត្តមានចូលរួមក្នុងពិធីខួបកំណើតរបស់ខ្ញុំ។

តារាប្រុស លោក អ៊ឹម ជីវ៉ា បន្តថា ខ្ញុំបាទមិននឹកស្មានថា មានវត្តមានភ្ញៀវកិត្តិយសផ្តល់កិត្តិយសយ៉ាងច្រើនកុះករដូច្នោះឡើយ ហើយខ្ញុំក៏សូម ខន្តីអភ័យទោស ចំពោះការទទួលរបស់ខ្ញុំបាទមិនបានត្រឹមត្រូវ មិនបានដិតដល់ ការយឺតយ៉ាវ ឬភាពខ្វះខាតនៅចន្លោះណាមួយក្នុងពិធី សូមភ្ញៀវកិត្តិយសមេត្តាខន្តីអភ័យទោសដល់ខ្ញុំបាទដោយក្តីយោគយល់ និងអនុគ្រោះដល់ខ្ញុំផង ហើយខ្ញុំ នឹងចងចាំអនុស្សាវរីយ៍ ពេលវេលាដ៏មានន័យ និងភាពកក់ក្តៅនេះអស់មួយជីវិតខ្ញុំ។

លើសពីនេះ តារាប្រុស លោក អ៊ឹម ជីវ៉ា ក៏បានបន្ថែមទៀតថា សូមគោរពជូនពរចំពោះឯកឧត្ដមលោកឧកញ៉ា លោកជំទាវ លោក លោកស្រី អ្នកនាង កញ្ញា សិល្បករ សិល្បៈការិនី និងបណ្តាសារព័ត៌មានទាំងអស់ មានសុខភាពល្អ រកទទួលទានមានបាន មានសុខសុវត្ថិភាពក្នុងការរស់នៅ និងធ្វើដំណើរ ជោគជ័យ សម្រេចគ្រប់កិច្ចការងារទាំងអស់៕