នៅថ្ងៃអង្គារ យោធាអាមេរិកបានប្រកាសថា ទាហានម៉ារីនដែលបាត់ខ្លួនចំនួន៥នាក់គឺបានស្លាប់ហើយនិងបានបញ្ចប់ប្រតិបត្តិការរុករករយៈពេលជិតមួយសប្តាហ៍បន្ទាប់ពីយន្តហោះយោធាអាមេរិកពីរគ្រឿងបានធ្លាក់ក្នុងប្រទេសជប៉ុន។
សេចក្តីប្រកាសនេះបានធ្វើអោយចំនួនអ្នកស្លាប់ចុងក្រោយនៅក្នុងការធ្លាក់កាលពីថ្ងៃទី៦ខែធ្នូកើនដល់៦នាក់ខណៈអាកាសយានិកទី៧ត្រូវបានជួយសង្គ្រោះបន្ទាប់ពីឧបទ្ទវហេតុនេះ។
គ្រោះថ្នាក់នៃយន្តហោះចម្បាំង F/A-18 ជាមួយអាកាសយានិកពីរនាក់និងយន្តហោះចាក់បំពេញប្រេង KC-130 ជាមួយអាកាសយានិក៥នាក់បានកើតឡើងនៅព្រឹកព្រលឹមក្នុងចម្ងាយប្រហែល១០០គីឡូម៉ែត្រពីជ្រោយ Muroto ភាគនិរតីនៃប្រទេសជប៉ុន។
វាបានជំរុញអោយមានប្រតិបត្តិការរុករកនិងជួយសង្គ្រោះដ៏ធំសម្បើមមួយដែលយោធាអាមេរិកនិយាយថា ឥឡូវនេះត្រូវបានបញ្ឈប់ហើយ។
គ្រោះថ្នាក់នេះត្រូវបានគេរាយការណ៍ជាលើកដំបូងថាបានកើតឡើងក្នុងអំឡុងពេលប្រតិបត្តិការចាក់បំពេញប្រេងប៉ុន្តែយោធាបាននិយាយកាលពីថ្ងៃអង្គារថា រឿងនេះមិនទាន់ត្រូវបានបញ្ជាក់ទេហើយថា កាលៈទេសៈនៅតែស្ថិតក្នុងការស៊ើបអង្កេតនៅឡើយ។
មានកងទ័ពអាមេរិកប្រហែល៥០,០០០នាក់កំពុងឈរជើងនៅប្រទេសជប៉ុនហើយគ្រោះថ្នាក់បែបនេះមិនមែនជារឿងចម្លែកទេ។
កាលពីខែវិច្ឆិកា យន្តហោះចម្បាំងរបស់កងទ័ពជើងទឹកអាមេរិកមួយគ្រឿងបានធ្លាក់ចូលក្នុងសមុទ្រជិតកោះអូគីណាវ៉ាភាគខាងត្បូងប្រទេសជប៉ុនហើយអាកាសយានិកពីរនាក់ត្រូវបានជួយសង្គ្រោះទាំងនៅរស់។
ហើយនៅក្នុងខែវិច្ឆិកាឆ្នាំ២០១៧ យន្តហោះ C-2A “Greyhound” ដែលមានមនុស្ស១១នាក់ជិះក្នុងនោះបានធ្លាក់ចូលសមុទ្រហ្វីលីពីន។ មនុស្សប្រាំបីនាក់ត្រូវបានគេជួយសង្គ្រោះហើយការស្វែងរកសម្រាប់មនុស្សបីនាក់ផ្សេងទៀតត្រូវបានបញ្ឈប់បន្ទាប់ពីការស្វែងរករយៈពេលពីរថ្ងៃ៕ AFP
Source: Kampuchea Thmey Daily
0 Comments