ជួងព្រះវិហារដែលត្រូវបានរឹបអូសយកពីហ្វីលីពីនដោយអាមេរិកក្នុងនាមជាពានរង្វាន់សង្គ្រាមកាលពីជាងមួយសតវត្សរ៍មុនគឺត្រូវបានបញ្ជូនត្រលប់មកវិញកាលពីថ្ងៃអង្គារក្នុងគោលបំណងមួយដើម្បីបើកទំព័រនៃជំពូកដ៏លំបាកមួយរវាងសម្ព័ន្ធមិត្តជាប្រវត្តិសាស្ត្រទាំងពីរ។
ការប្រគល់មកវិញនូវជួង Balangiga ចំនួន៣គឺជាការបំពេញតាមតម្រូវការមួយទសវត្សរ៍ពីអតីតអាណានិគមអាមេរិកស្របពេលដែលទំនាក់ទំនងរវាងប្រទេសទាំងពីរត្រូវរង្គោះរង្គើដោយសារតែលោកប្រធានាធិបតី Rodrigo Duterte បានងាកទៅរកប្រទេសចិនវិញ។
យន្តហោះយោធាអាមេរិកមួយគ្រឿងបាននាំជួងនេះទៅព្រលានយន្តហោះក្រុងម៉ានីលដែលនៅទីនោះមន្ត្រីហ្វីលីពីននិងអាមេរិកបានប្រមូលផ្តុំគ្នាសម្រាប់ពីពិធីប្រគល់ជានិមិត្តរូបមួយ។
ជួងនេះត្រូវបានគេនិយាយថាបានបង្ហាញពីការវាយប្រហារគួរអោយភ្ញាក់ផ្អើលមួយដោយពួកបដិវត្តន៍ហ្វីលីពីនប្រដាប់ដោយកាំបិតដែលបានសម្លាប់ទាហានអាមេរិកចំនួន៤៨នាក់នៅថ្ងៃទី២៨ខែកញ្ញាឆ្នាំ១៩០១ក្នុងទីប្រជុំជន Balangiga ភាគកណ្តាល។
ដើម្បីជាការសងសឹក មេបញ្ជាការអាមេរិកលោក Jacob Smith បានបញ្ជាអោយប្រែក្លាយជុំវិញកោះ Samar ទៅជា “វាលរហោស្ថាន” ហើយថា បុរសហ្វីលីពីនទាំងអស់ដែលមានអាយុចាប់ពី១០ឆ្នាំឡើងទៅត្រូវតែសម្លាប់ចោល។
ជនជាតិហ្វីលីពីនរាប់ពាន់នាក់ត្រូវបានសម្លាប់ ទីប្រជុំជននេះត្រូវបានបំផ្លាញហើយជួងត្រូវបានកាត់យកដើម្បីធ្វើជាពានរង្វាន់។ ជួងចំនួនពីរត្រូវបានគេដាក់តាំងបង្ហាញនៅឯមូលដ្ឋានអាកាសអាមេរិកក្នុងរដ្ឋ Wyoming និងមួយទៀតនៅប្រទេសកូរ៉េខាងត្បូង។
ការប្រគល់ត្រលប់នៃជួងនេះបាននាំអោយមានការជំទាស់ជាមួយអតីតយុទ្ធជននិងសមាជិកសភាអាមេរិកមួយចំនួនដែលយល់ថា ជួងនេះគឺជាកិត្តិយសចំពោះទាហានអាមេរិកដែលពលីជីវិតខណៈហ្វីលីពីនសរសើរថា វាជានិមិត្តរូបមួយនៃការតស៊ូរបស់ខ្លួនដើម្បីឯករាជ្យភាព។
ទោះបីជាយ៉ាងណាក៏ដោយ មន្ត្រីអាមេរិកបានសង្កត់ធ្ងន់ថា ការប្រគល់នេះគឺជាជំហានដ៏សំខាន់ក្នុងការបិទជំពូកដ៏ឈឺចាប់មួយរវាងប្រទេសទាំងពីរដែលមានទំនាក់ទំនងជិតស្និទ្ធផ្នែកយោធា វប្បធម៌និងពាណិជ្ជកម្ម។
ការជំរុញរបស់ក្រុងម៉ានីលចំពោះការធ្វើមាតុភូមិនិវត្តន៍របស់ជួងទាំងនេះបានចាប់ផ្តើមនៅក្នុងទសវត្សរ៍ឆ្នាំ១៩៩០និងមានការគាំទ្រពីប្រធានាធិបតីហ្វីលីពីនមុនៗក៏ដូចជាពីព្រះវិហារកាតូលិកនិងប្រវត្តិវិទូផងដែរ៕ AFP
Source: Kampuchea Thmey Daily
0 Comments