ភ្នំពេញ ៖ រហូតមកដល់ពេលនេះ មានប្រតិបត្តិករទូរគមនាគមន៍ចំនួនតែ ៨៧% ដែលបានចូលរួមអនុវត្តកាតព្វកិច្ចបង់វិភាគទាន ចូលមូលនិធិកាតព្វកិច្ចសេវាសកលទូរគមនាគមន៍(មូលនិធិ ក.ស.ទ.) ដែលស្មើនឹងទឹកប្រាក់ប្រមាណ ៩លាន ដុល្លារអាមេរិក នេះបើយោងតាមការប្រកាសឲ្យដឹងពី លោកបណ្ឌិត កាន ច័ន្ទមេត្តា រដ្ឋលេខាធិការ ក្រសួងប្រៃសណីយ៍ និងទូរគមនាគមន៍ និងជា និងជាអនុប្រធានទី១ នៃ ក្រុមប្រឹក្សាភិបាល មូលនិធិកាតព្វកិច្ចសេវាសកល ទូរគមនាគមន៍ (ក.ម.ក.ស.ទ.) តំណាងដ៏ខ្ពង់ខ្ពស់ លោក ត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍ និងជាប្រធាននៃ ក.ម.ក.ស.ទ. នៅក្នុងសន្និសីទសារព័ត៌មាន ស្តីពីវឌ្ឍនភាពការងាររបស់ មូលនិធិ ក.ស.ទ. កាលពីល្ងាចថ្ងៃទី១២ ខែធ្នូ ឆ្នាំ២០១៨ កន្លងទៅនេះ នៅទីស្តីការក្រសួង។
លោកបណ្ឌិត កាន ច័ន្ទមេត្តា បានមានប្រសាសន៍ថា “ជាលទ្ធផលនៃការអនុវត្តច្បាប់ស្តីពីទូរគមនាគមន៍ ដែលបានបង្កើតមូលនិធិ ក.ស.ទ. និងការបង្កើតក្រុមប្រឹក្សាភិបាលមូលនិធិកាតព្វកិច្ចសេវាសកល-ទូរគមនាគមន៍ ដោយអនុក្រឹត្យលេខ១១១ អនក្រ.បក ចុះថ្ងៃទី២១ ខែកក្កដា ឆ្នាំ២០១៧ ស្តីពីការកំណត់យន្តការ សម្រាប់អនុវត្តកម្មវិធីកាតព្វកិច្ចសេវាសកល វិស័យទូរគមនាគមន៍ ក្នុងឆ្នាំ២០១៧ មានប្រតិបត្តិករទូរគមនាគមន៍ចំនួន ៨៧% (២៧/៣១ ក្រុមហ៊ុន) បានចូលរួមអនុវត្តកាតព្វកិច្ចបង់វិភាគទានចូលមូលនិធិ ក.ស.ទ. និងប្រមូលបានមូលនិធិសរុប ៧០ % ស្មើនឹងទឹកប្រាក់ប្រមាណ ៩ លានដុល្លារអាមេរិក” ។
លោកបណ្ឌិត បានបញ្ជាក់ផងដែរថា ក្នុងឆ្នាំ២០១៧ នេះ ក.ម.ក.ស.ទ. បានអនុម័តគម្រោងពង្រីកវិសាលភាពគ្របដណ្តប់សេវាទូរស័ព្ទចល័តជំនាន់ទី៣/៤ (3G/4G)សរុបចំនួន ១៣១ ស្ថានីយ ដោយអនុញ្ញាតឲ្យធ្វើការសាងសង់ស្ថានីយថ្មីចំនួន ៤១ ស្ថានីយ និងការធ្វើ Upgrade និង Reconfiguration ទៅលើស្ថានីយ៍ដែលមានស្រាប់ចំនួន ៩០ ស្ថានីយ។
យោងតាមសេចក្ដីប្រកាសព័ត៌មាន ដែលកម្ពុជាថ្មីទទួលបាន វឌ្ឍនភាពចុងក្រោយចំពោះគម្រោងសាងសង់ថ្មីរួមមាន គម្រោង/ស្ថានីយបានសាងសង់រួចរាល់មានចំនួន៧ ស្ថានីយ នាខែវិច្ឆិកា ឆ្នាំ២០១៨, គម្រោង/ស្ថានីយដែលបាននឹងកំពុងសាងសង់ មានចំនួន ១៩ ស្ថានីយ និងត្រូវបញ្ចប់រួចរាល់នៅយ៉ាងយូរត្រឹមខែកុម្ភៈ ឆ្នាំ២០១៩ និងគម្រោង/ស្ថានីយដែលយឺតយ៉ាង ក្នុងការសាងសង់ដោយសារទឹកជំនន់ និងកំពុងដោះស្រាយទីតាំងសាងសង់ មានចំនួន១៥ ស្ថានីយ ដែលរំពឹងថា នឹងត្រូវបានដោះស្រាយរួចរាល់ឆាប់ៗ និងកាលបរិច្ឆេទគ្រោងបញ្ចប់រួចរាល់យ៉ាងយូរត្រឹមខែមេសា ឆ្នាំ២០១៩។
ចំណែកវឌ្ឍនភាពចុងក្រោយចំពោះគម្រោងធ្វើការ Upgrade និង Reconfiguration ទៅលើស្ថានីយដែលមានស្រាប់រួមមាន ចំនួន៨៣ ស្ថានីយ ត្រូវបានចប់ជាស្ថាពរ នាខែវិច្ឆិកា ឆ្នាំ២០១៨ និង ចំនួន៧ ស្ថានីយ ត្រូវរំពឹងថានឹងត្រូវបញ្ចប់ត្រឹមខែមករា ឆ្នាំ២០១៩។
នាឱកាសនេះ លោកបណ្ឌិត កាន ច័ន្ទមេត្តា តំណាងលោករដ្ឋមន្ត្រី ត្រាំ អ៊ីវតឹក ក៏បានកោតសរសើរ វាយតម្លៃខ្ពស់ និងថ្លែងអំណរគុណដល់ប្រតិបត្តិការ ទូរគមនាគមន៍ទាំងអស់ដែលបានចូលរួមបង់វិភាគទាន និងសហការក្នុងការអនុវត្តសកម្មភាពការងារ របស់មូលនិធិកាតព្វកិច្ចសេវាសកលទូរគមនាគមន៍ និងសូមលើកទឹកចិត្ត និងសង្ឃឹមយ៉ាងមុតមាំថា ប្រតិបត្តិករទូរគមនាគមន៍មួយចំនួនតូច ដែលមិនទាន់បានបំពេញកាតព្វកិច្ច បង់វិភាគទានមូលនិធិ ក.ស.ទ. នៅក្នុងឆ្នាំ២០១៧ រួសរាន់បង់វិភាគទាន មុននឹងក្រុមប្រឹក្សាមូលនិធិ ក.ស.ទ. ចាត់វិធានការបន្ទាប់៕
Source: Kampuchea Thmey Daily
0 Comments