ភ្នំពេញ ៖ លោក កឹម សុខា អតីតប្រធានអតីតគណបក្សសង្គ្រោះជាតិ ហើយបច្ចុប្បន្នកំពុងដាក់ឲ្យស្ថិតនៅក្រោមការត្រួតពិនិត្យតាមផ្លូវតុលាការនោះ បានប្រកាសច្រានចោលសន្និសីទមួយ ដែលរៀបចំដោយក្រុមអ្នកគាំទ្រលោក សម រង្ស៊ី នៅសហរដ្ឋអាមេរិក កាលពីថ្ងៃទី១ និងទី២ ខែធ្នូ ឆ្នាំ២០១៨ ដែលសន្និសីទនោះ បានសម្រេចឲ្យលោក សម រង្ស៊ី ធ្វើជាប្រធានស្តីទី ដោយសំអាងថា ដើម្បីដឹកនាំខ្មោចគណបក្សនេះបណ្តោះអាសន្ន ខណៈដែលលោក កឹម សុខា ជាប់ទោសមិនអាចធ្វើអីបាន។
លោក កឹម សុខា ប្រកាសបែបនេះ កាលពីថ្ងៃទី០២ ខែធ្នូ ឆ្នាំ២០១៨ តាមរយៈសេចក្ដីថ្លែងការណ៍របស់សហមេធាវី និងបន្ទាប់ពីក្រុមអ្នកគាំទ្រលោក សម រង្ស៊ី បានធ្វើការជួបជុំគ្នាដ៏ធំមួយដែលគេអះអាងថា មានតំណាងអតីតគណបក្សសង្គ្រោះជាតិមកពីគ្រប់តាមបណ្តាប្រទេសនានា កាលពីថ្ងៃទី០១ ទី០២ ខែធ្នូ នៅក្រុងអាត់ត្លង់តា (Atlanta) រដ្ឋGeorgia នៃសហរដ្ឋអាមេរិក ហើយកិច្ចប្រជុំនេះ បានសម្រេច១០ ចំណុច។
សេចក្តីថ្លែងការណ៍របស់សហមេធាវីការពារក្តីឲ្យលោក កឹម សុខា បានលើកឡើងថា កាលពីថ្ងៃទី០២ ខែធ្នូ ឆ្នាំ២០១៨ នៅចំពោះមុខសហមេធាវីការពារក្តី លោក កឹម សុខា នៅតែរក្សាជំហរដដែល គឺមិនទទួលដឹងឮ និងមិនគាំទ្រនូវការរៀបចំ និងការសម្រេចណាមួយនៃសន្និសីទថ្ងៃទី ០១ ទី០២ ខែធ្នូ ឆ្នាំ២០១៨ នៅទីក្រុងអាអាតាឡង់តា សហរដ្ឋអាមេរិក របស់ក្រុមអ្នកគាំទ្រលោក សម រង្ស៊ី ប្រធានចលនាសង្គ្រោះជាតិនោះឡើយ ហើយការបញ្ចេញទស្សនៈរបស់លោក កឹម សុខា នេះមិនឋិតនៅក្រោមការបង្ខិតបង្ខំរបស់បុគ្គលណាមួយឡើយ។
ជាមួយគ្នានោះ សហមេធាវីលោក កឹម សុខា បានបញ្ជាក់ថា ទោះបីជាលោក កឹម សុខា ស្ថិតក្រោមការត្រួតពិនិត្យតាមផ្លូវតុលាការក៏ដោយ លោក កឹម សុខា នៅតែមានសិទ្ធិក្នុងការតវ៉ាការពារ ទាមទារ និងបដិសេធនូវអ្វីដែលប៉ះពាល់ដល់សិទ្ធិស្របច្បាប់របស់ខ្លួន។ លោក កឹម សុខា មានសិទ្ធិបញ្ចេញមតិដោយខ្លួនឯងផ្ទាល់ ឬតាមរយៈមេធាវីស្របច្បាប់តាមបញ្ញត្តិច្បាប់។ សហមេធាវីបានបញ្ជាក់ទៀតថា ក្នុងនាមជាមេធាវី ដែលទទួលសិទ្ធិការពារក្តី គឺអនុវត្តស្របតាមក្របខណ្ឌវិជ្ជាជីវៈ តាមឆន្ទៈកូនក្តី និងមានការទទួលខុសត្រូវ។ ក្នុងករណីសហមេធាវីបំពេញបេសកកម្មណាមួយដោយបំពានឆន្ទៈរបស់លោក កឹម សុខា ដែលជាកូនក្តី គាត់មានសិទ្ធិពេញលេញក្នុងការបញ្ឈប់បេសកម្មរបស់មេធាវីបានគ្រប់ពេលវេលា ហើយបច្ចុប្បន្នសហមេធាវីនៅតែជាសហមេធាវីការពារក្តីឲ្យលោក កឹម សុខា ដដែល។
ដោយឡែកអតីតគណបក្សសង្គ្រោះជាតិ ដែលបានត្រូវតុលាការកំពូលប្រកាសរំលាយទៅហើយនោះក៏បានចេញសេចក្តីថ្លែងការណ៍មួយផងដែរ នៅថ្ងៃទី០៣ ខែធ្នូ ឆ្នាំ២០១៨ ដោយបានអះអាងថា ការសម្រេចណាមួយរបស់សន្និសីទនៅថ្ងៃទី០២ ខែធ្នូ ឆ្នាំ២០១៨ នៅសហរដ្ឋអាមេរិក ដោយក្រុមអ្នកគាំទ្រលោក សម រង្ស៊ី ហើយរុញលោក សម រង្ស៊ី ឲ្យធ្វើជាប្រធានស្តីទីគណបក្សសង្គ្រោះជាតិនោះ គឺផ្ទុយទាំងស្រុងពីលក្ខន្តិកៈគណបក្សសង្គ្រោះជាតិនិងមិនអាចទទួលយកបានជាដាច់ខាត។ អតីតគណបក្សបញ្ជាក់ថា អ្នកដែលអាចក្លាយទៅជាប្រធានស្ដីទីបានមានចែងនៅក្នុងប្រការ៤៥ថ្មី នៃលក្ខន្តិកៈរបស់គណបក្សសង្គ្រោះជាតិ ដែលមានខ្លឹមសារថា “នៅពេលអវត្តមានប្រធាន អនុប្រធានត្រូវបានទទួលស្គាល់ជាប្រធានស្ដីទី និងបើអវត្តមានអនុប្រធាន ការទទួលស្គាល់សិទ្ធិនេះ ត្រូវធ្វើទៅតាមឋានានុក្រមបន្តបន្ទាប់ ដែលមានចែងនៅក្នុងប្រការនេះ”។ ដូច្នេះមិនមានអ្នកណា ក្រៅពីថ្នាក់ដឹកនាំក្នុងឋានានុក្រមបន្តបន្ទាប់នេះ មកធ្វើជាប្រធានស្ដីទីបានទេ។ មានតែអង្គសមាជ ឬអង្គសន្និបាតគណបក្សដែលមានសមាជិកក្រុមប្រឹក្សាជាតិ របស់គណបក្សចូលរួមទេ ទើបអាចស្នើអ្នកផ្សេងបញ្ចូលមកក្នុងឋានានុក្រមថ្នាក់ដឹកនាំបាន។
តាមអតីតគណបក្សសង្គ្រោះជាតិ ចំពោះការសម្រេចរបស់សន្និសីទនេះ មិនអាចចាប់បង្ខំ ឬតម្រូវឲ្យគណបក្សសង្គ្រោះជាតិ ឬគណៈកម្មាធិការអចិន្ត្រៃយ៍គណបក្សត្រូវតែធ្វើតាមនោះទេ ព្រោះអ្នកចូលរួមធ្វើសេចក្តីសម្រេចនេះ មិនមាននីតិសម្បទា ដែលមានសិទ្ធិជាអ្នកស្នើ ឬអ្នកសម្រេចជ្រើសរើស ឬជ្រើសតាំងប្រធានស្ដីទីគណបក្សឡើយ ដូច្នេះសេចក្តីសម្រេចនេះគ្រាន់តែជាមតិយោបល់របស់មនុស្សមួយក្រុមតែប៉ុណ្ណោះ។
ទាក់ទងបញ្ហានេះ លោក សុខ ឥសាន អ្នកនាំពាក្យគណបក្សប្រជាជនកម្ពុជាបានអះអាងថា ការប៉ុនប៉ងចង់ធ្វើឲ្យខ្មោចគណបក្សសង្គ្រោះជាតិរស់ឡើងវិញ គឺមិនអាចទៅរួចទេ ហើយការប្រោសព្រំយកទណ្ឌិតសម រង្សី មកដឹកនាំវិញនោះ ក៏អត់បានការអីដែរ។
លោក សុខ ឥសាន បញ្ជាក់យ៉ាងនេះថា “អតីតបក្សប្រឆាំងនៅកម្ពុជា ត្រូវបានតុលាការកំពូលសម្រេចរំលាយចោលតាំងពីខែវិច្ឆិកាឆ្នាំ២០១៧ មកម្ល៉េះ ដោយសារទង្វើល្មើសច្បាប់ធ្ងន់ធ្ងរ។
ម្យ៉ាងទៀតទណ្ឌិតសម រង្សី ដែលជាអតីតមេបក្សប្រឆាំងនេះ ក៏បានលាលែងពីសមាជិកបក្សនិងពីប្រធានបក្សជាយូររួចហើយដែរ។ ដូច្នេះឧបាយកលប៉ុនប៉ងចង់ធ្វើឲ្យខ្មោចអតីតបក្សប្រឆាំងនេះរស់ឡើងវិញ គឺមិនអាចទៅរួចទាល់តែសោះ ហើយឧបាយកលចង់ប្រោះព្រំយកទណ្ឌិតសម រង្សីមកដឹកនាំអតីតបក្សនេះក៏អត់បានការដែរ។ ហេតុនេះ ទោះប្រើមធ្យោបាយណា និងឧបាយកលណា ក៏មិនអាចប្រោសព្រំ ធ្វើឲ្យអតីតបក្សប្រឆាំងនេះអាចរស់ឡើងវិញបានឡើយ ហើយចង់យកមនុស្សមិនមែននៅក្នុងបក្សមកដឹកនាំបក្ស ក៏កាន់តែមិនអាចទៅរួចជាដាច់ខាតដែរ”៕
Source: Kampuchea Thmey Daily
0 Comments