ភ្នំពេញ ៖ ជនសង្ស័យជួញដូរ និងប្រើប្រាស់គ្រឿងញៀនចំនួន២នាក់ទៀត ត្រូវបានកម្លាំងនគរបាលខណ្ឌដូនពេញបានបើកប្រតិបត្តិការឆ្មក់បង្ក្រាបក្នុង២ករណីផ្សេងពីគ្នា ព្រមទាំងហូតថ្នាំញៀនជាច្រើនកញ្ចប់ផងដែរ។
ប្រតិបត្តិការចុះបង្ក្រាបលើកទី១ ធ្វើឡើងកាលពីវេលាម៉ោង១៤និង៤០នាទីរសៀល ថ្ងៃទី២៦ ខែធ្នូ ឆ្នាំ២០១៨ ដែលស្ថិតនៅតាមបណ្ដោយផ្លូវរថភ្លើង សង្កាត់ស្រះចក ខណ្ឌដូនពេញ រាជធានីភ្នំពេញ។
ជនសង្ស័យខាងលើមានឈ្មោះ ឡុង បញ្ញា ភេទប្រុស អាយុ២២ឆ្នាំ មុខរបរ រត់ម៉ូតូ (ជួញដូរគ្រឿងញៀន) ស្នាក់នៅភូមិក្រាំងស្វាយ សង្កាត់ទួលពង្រ ខណ្ឌពោធិ៍សែនជ័យ រាជធានីភ្នំពេញ។
នៅក្នុងប្រតិបត្តិការនោះ កម្លាំងនគរបាលបានដកហូតថ្នាំញៀនចំនួន៣០កញ្ចប់តូច ថង់ច្រកគ្រឿងញៀនមួយចំនួន និងម៉ូតូមួយគ្រឿង ម៉ាកគុបមូល ពណ៌ស្លែ ពាក់ស្លាកលេខ ភ្នំពេញ 1AH-3590។
សមត្ថកិច្ចបានឲ្យទៀតថា ករណីបង្ក្រាបលើកទី២ នៅថ្ងៃទី២៦ ខែធ្នូ ឆ្នាំ២០១៨ វេលាម៉ោង១៧ល្ងាច ដោយអនុវត្តន៍តាមគោលការណ៍ដឹកនាំរបស់ លោក សុខ ពេញវុធ អភិបាល នៃគណៈអភិបាលខណ្ឌដូនពេញ អធិការដ្ឋាន ប៉ុស្តិ៍ បានបើកការស្រាវជ្រាវបង្ក្រាបករណីរក្សាទុកដោយខុសច្បាប់នូវសារធាតុញៀន ស្ថិតនៅចំណុចផ្លូវ៩០ កែងផ្លូវ៧៥ ក្រុម១០១ ភូមិ១០ សង្កាត់វត្តភ្នំ ជាលទ្ធផល នៃកិច្ចប្រតិបត្តិការនេះ កម្លាំងសមត្ថកិច្ចបានធ្វើការឃាត់ខ្លួនជនសង្ស័យម្នាក់ ឈ្មោះ សែម កក្កដា ភេទប្រុស អាយុ២៦ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅផ្ទះលេខ៣៩E០ ផ្លូវ១៣៤ សង្កាត់ផ្សារដេប៉ូ២ ខណ្ឌទួលគោក (រក្សាទុកគ្រឿងញៀន)។ រីឯវត្ថុតាងចាប់យករួមមាន ១/ក្រាមពណ៌សថ្លាសង្ស័យជាគ្រឿងញៀនចំនួន០៣កញ្ចប់
២/ថង់សម្រាប់ច្រកគ្រឿងញៀនមួយចំនួន។
៣/ឧបករណ៍ប្រើប្រាស់មួយចំនួន។
៤/ម៉ូតូម៉ាកវីវា ពណ៌ខ្មៅ ពាក់ស្លាកលេខ 1FF0223។
សមត្ថកិច្ចបញ្ជាក់ថា ចំពោះមុខកម្លាំងជំនាញខណ្ឌ ប៉ុស្តិ៍ កំពុងយកចម្លើយបន្តស្រាវជ្រាវរកបក្ខពួកនិង ក្រុមដទៃផ្សេងទៀត ព្រមទាំងកសាងសំណុំរឿងដើម្បីបញ្ជូនទៅសាលាដំបូងរាជធានីភ្នំពេញអនុវត្តតាមនីតិវិធី។ ទិសដៅបន្ត អធិការដ្ឋាននគរបាលខណ្ឌដូនពេញ និងប៉ុស្តិ៍រដ្ឋបាលទាំង១១ បន្តជំរុញការស្រាវជ្រាវដើម្បីបើកការបង្ក្រាបជាប់ជាប្រចាំឲ្យទាន់ពេល៕
Source: Kampuchea Thmey Daily
0 Comments