បន្ទាយមានជ័យ ៖ ក្មេងប្រុសទើបតែអាយុ៤ឆ្នាំម្នាក់ ត្រូវឪពុកវាយធ្វើបាប និង បង្ខំឲ្យដើរសុំទានតាមផ្សារ ដើម្បីយកលុយមកឲ្យខ្លួនទិញស្រា និងម៉ាជក់។
ក្នុងនោះដែរ ឪពុកចិត្តអប្រិយខាងលើ ត្រូវបានកម្លាំងអាវុធហត្ថក្រុងប៉ោយប៉ែត ដឹកនាំដោយលោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត ចុះបង្ក្រាបឃាត់នៅវេលាម៉ោង៤រសៀល ថ្ងៃទី៩ ខែធ្នូ ឆ្នាំ២០១៨ ចំណុចភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
លោកវរសេនីយ៍ត្រី នួន នីណារ៉ូ បានប្រាប់អ្នកយកព័ត៌មានឲ្យដឹងថា ដោយលោកមើលឃើញព័ត៌មានផ្សព្វផ្សាយតាមបណ្ដាញទំនាក់ទំនងសង្គម ដែលបង្ហាញវីដេអូ១ក្លិបរបស់កុមារារងគ្រោះមានឈ្មោះ ធី នុល ហៅ ប៉ូយ អាយុ៤ឆ្នាំ ៨ខែ ត្រូវឪពុកវាយធ្វើបាប បង្ខំឲ្យដើរសុំទានតាមផ្សារ និងទីប្រជុំជននានាក្នុងក្រុងប៉ោយប៉ែត លោកបានដឹកនាំកម្លាំងចុះឃាត់ឪពុកចិត្តតិរច្ឆានបានភ្លាមៗតែម្ដង។
លោកបានបញ្ជាក់ឲ្យដឹងទៀតថា ជនសង្ស័យមាន ឈ្មោះ ហ៊ុ រ៉ា ភេទប្រុស អាយុ៣៦ឆ្នាំ រស់នៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ហើយបានបញ្ជូនមកទីបញ្ជាការដ្ឋានកងរាជអាវុធហត្ថខេត្ត ដើម្បីសាកសួរបន្ត។
លោកវរសេនីយ៍ឯក ម៉ែន ភិរម្យ មេបញ្ជាការរងទទួលការងារយុត្តិធម៌បានប្រាប់អ្នកយកព័ត៌មានឲ្យដឹងថា បន្ទាប់ពីកម្លាំងជំនាញសាកសួរ ជនសង្ស័យបានឆ្លើយសារភាពថា ខ្លួនពិតជាបានវាយធ្វើបាបកូនពិតប្រាកដមែន នៅពេលដែលកូនខ្លួនសុំទានមិនបាន ព្រោះខ្លួនត្រូវការលុយយកទៅទិញគ្រឿងញៀនជក់ និងទិញស្រាផឹក។
ផ្អែកលើចម្លើយសារភាពរបស់ជនសង្ស័យ ត្រូវបានកម្លាំងជំនាញបានកសាងសំណុំរឿងបញ្ជូនទៅតុលាការ ដើម្បីដាក់ទោសទៅតាមផ្លូវច្បាប់។
ចំណែកក្មេងរងគ្រោះ អាវុធហត្ថបានប្រគល់ទៅឲ្យជីដូនបង្កើតរបស់កុមាររងគ្រោះ មានឈ្មោះ សោម សារ៉េត អាយុ៦៤ឆ្នាំ រស់នៅភូមិក្បាលកោះ សង្កាត់ប៉ោយប៉ែត ក្រុងប៉ោយប៉ែត។
ដោយមើលឃើញពីស្ថានភាពជីវភាពរបស់ជីដូនកុមាររងគ្រោះជួបការលំបាក លោក នួន នីណារ៉ូ និងសហការី បាននាំយកអំណោយ រួមមាន អង្ករ ៥០គ.ក ទឹកត្រី០១យួរ ទឹកស៊ីអ៊ីវ០១យួរ ត្រីខ១០កំប៉ុង អំបិល០១គ.ក ស្ករស០១គ.ក និងថវិកា១០០.០០០រៀល ផងដែរ៕
Source: Kampuchea Thmey Daily
0 Comments