ភ្នំពេញ ៖ ប្រធានផ្នែកផ្សព្វផ្សាយរបស់កម្មវិធីពិព័រណ៍សៀវភៅបានឲ្យដឹងថា កម្មវិធីពិព័រណ៍សៀវភៅកម្ពុជា លើកទី៧ ឆ្នាំ២០១៨ ក្រោមប្រធានបទ «សៀវភៅរស់ ចំណេះរីក» ដែលរៀបចំរយៈពេល៣ថ្ងៃ នៅបណ្ណាល័យជាតិមានមនុស្សចូលរួមប្រមាណជាង១៣ម៉ឺននាក់ កើនឡើងជាងឆ្នាំ២០១៧ ដែលមានត្រឹមតែជាង៥ម៉ឺននាក់ប៉ុណ្ណោះ។
កញ្ញា ស៊ុន សិទ្ធិគុណ ប្រធានផ្នែកផ្សព្វផ្សាយរបស់កម្មវិធីពិព័រណ៍សៀវភៅបានប្រាប់សារព័ត៌មានក្នុងស្រុកឲ្យដឹងថា កម្មវិធីពិព័រណ៍សៀវភៅឆ្នាំនេះ មានអ្នកចូលរួមកើនឡើងលើសពីការរំពឹងទុក គឺមានអ្នកចូលរួមរហូតដល់១៣១.៤០០នាក់ ខណៈអ្នករៀបចំកម្មវិធីរំពឹងថា កម្មវិធីនេះមានអ្នកចូលរួមត្រឹមតែ៧ម៉ឺននាក់ប៉ុណ្ណោះ។
កញ្ញាបានបន្តថា សម្រាប់នៅក្នុងថ្ងៃទី២ និងទី៣ នៃកម្មវិធីពិព័រណ៍សៀវភៅនេះមានអ្នកចូលរួមច្រើនជាងគេរហូតដល់៥ម៉ឺននាក់ ក្នុង១ថ្ងៃ ដោយសារតែពិព័រណ៍សៀវភៅឆ្នាំនេះ មានរៀបចំកម្មវិធីពិសេសៗជាច្រើន រួមមាន ការចែកសៀវភៅឥតគិតថ្លៃ, កាដូសៀវភៅចាស់ៗ និងកម្មវិធីកម្សាន្តបែបអប់រំដល់អ្នកចូលរួមជាច្រើន។
លោកស្រី ខ្លូត វីបុលឡា ប្រធានបណ្ណាល័យជាតិកម្ពុជាបានឲ្យដឹងថា ពិព័រណ៍សៀវភៅនៅឆ្នាំនេះក៏ដូចជាឆ្នាំមុន បានផ្ដោតសំខាន់ទៅលើកុមារដើម្បីឲ្យពួកគេមានទម្លាប់អានតាំងតែពីក្មេង តាមរយៈការយកចិត្តទុកដាក់ពីឪពុក ម្ដាយ។ ដូច្នេះហើយ ទើបពិព័រណ៍សៀវភៅបានរៀបចំវេទិកាសម្រាប់កុមារដាច់ដោយឡែកតាមរយៈការគូររូប ផាត់មុខ និង ការច្រៀងរាំជាដើម ដើម្បីទាញការចាប់អារម្មណ៍ពីកុមារ។
លោកស្រីប្រធានបណ្ណាល័យជាតិបានឲ្យដឹងទៀតថា ប្រមុខរដ្ឋាភិបាលកម្ពុជា សម្ដេចនាយករដ្ឋមន្ត្រី ហ៊ុន សែន បានឧបត្ថម្ភសៀវភៅចំនួន១០ម៉ឺនក្បាល ចែកជូនអ្នកទស្សនាដោយឥតគិតថ្លៃ។
ថ្លែងក្នុងពិធីបើកពិព័រណ៍សៀវភៅកម្ពុជា អ្នកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈបានថ្លែងឲ្យដឹងថា ពិព័រណ៍នេះ ជាការខិតខំរបស់ក្រសួងវប្បធម៌ និងវិចិត្រសិល្បៈ រួមជាមួយនឹងស្ថាប័នជាច្រើនទៀត ដើម្បីលើកកម្ពស់ក្មេងៗជំនាន់ក្រោយឲ្យមានទម្លាប់នៅក្នុងការអាន និងពង្រីកចំណេះដឹងរបស់ខ្លួន។
លោកស្រីបានបន្តថា សៀវភៅ គឺជាមធ្យោបាយមួយសំខាន់បំផុត នៅក្នុងជីវិតរបស់យើងទាំងអស់គ្នា ក៏ដូចជាជីវិតរបស់ក្មេងៗជំនាន់ក្រោយ ដើម្បីដើរបានឆ្ងាយទៅមុខ។
លោកស្រី ភឿង សកុណា បានជំរុញឲ្យឪពុកម្ដាយគួរចាប់ផ្ដើមអានសៀវភៅ ដើម្បីជាការត្រួសត្រាយផ្លូវដល់កូនៗ របស់ខ្លួន នៅក្នុងការចាប់ផ្ដើមបណ្ដុះទម្លាប់នេះការអាន។
សូមបញ្ជាក់ថា ពិព័រណ៍សៀវភៅកម្ពុជា លើកទី៧ ឆ្នាំ២០១៨នេះ រៀបចំរយៈពេល៣ថ្ងៃ ពីថ្ងៃទី៧-៩ ខែធ្នូ ដែលមានស្តង់ចំនួន១១០នាក់ ខណៈឆ្នាំ២០១៧ មានត្រឹម៨០ស្តង់ប៉ុណ្ណោះ។
ជាមួយគ្នានេះ ក្នុងកម្មវិធីពិព័រណ៍សៀវភៅឆ្នាំនេះ មានយុវជនស្ម័គ្រចិត្តចូលរួមប្រមាណ២០៤នាក់ ដែលចូលរួមសម្របសម្រួលក្នុងកម្មវិធីនេះផងដែរ។
ពិព័រណ៍សៀវភៅដែលរៀបចំឡើងជារៀងរាល់ឆ្នាំ ចាប់តាំងពីឆ្នាំ២០១១ មកនេះ ធ្វើឡើងដើម្បីលើកកម្ពស់ការយល់ដឹងអំពីសៀវភៅដែលមានជាភាសាខ្មែរ ឬភាសាដទៃ ជាពិសេសនោះ គឺសៀវភៅអំពីកម្ពុជា និងសៀវភៅកុមារ។
ពិព័រណ៍សៀវភៅនេះ ក៏រៀបចំឡើងដើម្បីគាំទ្រទៅដល់អ្នកនិពន្ធខ្មែរ វិស័យឧស្សាហកម្មបោះពុម្ពនៅកម្ពុជា ជំរុញចំណង់ចំណូលចិត្តយុវជនជំនាន់ក្រោយៗ ឲ្យស្រលាញ់ការនិពន្ធ ព្រមទាំងបណ្ដុះទម្លាប់នៃការអានផងដែរ៕
Source: Kampuchea Thmey Daily
0 Comments