កីឡាករ​ខ្មែរ​-​បារាំង វ៉ា សុថន ត្រឡប់មក​ចូលរួម​ជាមួយ​ក្លិប​ភ្នំពេញ​ក្រោ​ន ជា​លើក​ទី​២

ខ្សែបម្រើ​ខ្មែរ​-​បារាំង វ៉ា សុថន (​ឬ វ៉ា ឃ្វី​នទី​ន​) អតីត​កីឡាករ​របស់​ក្លិប​បាល់ទាត់​ភ្នំពេញ​ក្រោ​ន​អំឡុង​ឆ្នាំ​២០១៤-២០១៥ និង​សមាជិក​ក្រុម​ជម្រើសជាតិ​កម្ពុជា បាន​ត្រឡប់​ទៅ​រស់នៅ​ប្រទេស​បារាំង អស់​មួយ​រយៈ ខណៈ​ពេលនេះ​រូបគេ​បាន​ត្រឡប់​មក​ជួយ​ក្រុម​ចាស់​ខ្លួន​វិញ​ហើយ ដើម្បី​ត្រៀម​ប្រកួត​ក្នុង​រដូវ​កាល​ថ្មី​ឆ្នាំ​២០១៩ ខាងមុខ​។

យោង​តាម​ការ​បញ្ជាក់​របស់​ក្លិប​ភ្នំពេញ​ក្រោ​ន នៅ​ល្ងាច​ថ្ងៃ​ព្រ​ហ​ស្បតិ៍ ទី​១៣ ខែធ្នូ ឆ្នាំ​២០១៨ នេះ​បាន​ឲ្យ​ដឹង​ថា ​កីឡាករ​ខាងលើ​ក្លាយជា​សមាជិក​ពេញ​សិទ្ធិ​ឡើងវិញ ហើយ​ក្លិប​សង្ឃឹមថា​ក្នុង​ដំណើរ​នៃ​ការ​វិល​ត្រលប់​មកវិញ​នេះ រូបគេ​នឹង​សហការ​ជាមួយ​មិត្ត​រួម​ក្រុម​ដើម្បី​ជួយ​ក្លិប​ឲ្យ​បាន​ជោគជ័យ​នាពេលខាងមុខ​។ សូម​រំលឹក​ថា ​កីឡាករ វ៉ា សុថន សម្រេចចិត្ត​មិន​បន្ត​កិច្ចសន្យា​របស់​ខ្លួន​ជាមួយ​ក្លិប​ភ្នំពេញ​ក្រោ​ន ដែល​ផុត​នៅ​ដើមឆ្នាំ​២០១៦ ទៅ​នេះ​ទេ ដោយ​ត្រូវ​ត្រឡប់​ទៅ​រស់នៅ​ជួបជុំ​ក្រុមគ្រួសារ​នៅ​ប្រទេស​បារាំង​វិញ ជាមួយ​អ្នកចាំទី​បម្រុង ស្រ៊ី ដា​នី នៅ​គ្រានោះ​។



​ក្រោយ​មក​ទៀត​នៅ​ដើមឆ្នាំ​២០១៨​នេះ រូបគេ​បាន​ត្រឡប់​មក​ធ្វើតេស្ត​ជាមួយ​ក្លិប​ភ្នំពេញ​ក្រោន វិញ​ប៉ុន្តែ​ត្រូវ​បរាជ័យ​។ យ៉ាង​ណា​ក្តី​ក្រោយ​ត្រឡប់​ទៅ​ប្រទេស​បារាំង​រូបគេ​បាន​ចូលរួម​ជាមួយ​ក្លិប JO Le Creusot នៅ​ឆ្នាំ​២០១៥-២០១៦ ហើយ​បន្ត​លេង​នៅ​ក្លឹប UFC Torcy ឆ្នាំ​២០១៦-២០១៧ និង​ចុង​ក្រោយនេះ​លេង​នៅ​ក្លឹប US Saint-Sernin-du-Bois ឆ្នាំ​២០១៧-២០១៨​។

សូម​បញ្ជាក់​ថា​កីឡាករ វ៉ា សុខ​ថន បាន​ចូលរួម​លេង​ជាមួយ​ក្លិប​ភ្នំពេញ​ក្រោ​ន លើកដំបូង​កាលពី​ខែ កក្កដា ឆ្នាំ ២០១៤ ហើយ​កីឡាករ​វ័យ ៣១ ឆ្នាំ​រូប​នេះ​ជា​ផ្នែក​មួយ​ជួយ​ឲ្យ​ក្រុម​ភ្នំពេញ​ក្រោ​ន ឈ្នះ​ជើងឯក​ជា​លើក​ទី ៦​ក្នុង​លី​គ​កំពូល​កម្ពុជា ប្រចាំ​ប្រវត្តិសាស្ត្រ​ក្លិប​ផងដែរ​។ កីឡាករ​ដែល​រៀប​អាពាហ៍ពិពាហ៍​រួចហើយ​រូបនេះ​ធ្លាប់​លេង​នៅ ES Torcy, FC Montceau Bourgogne, US Motte Servolex, SO Chambery Foot 73 និង Le Creusot JO នៅ​ប្រទេស​បារាំង​។

​ក្រោយពី​ចូល​លេង​ក្នុង​ក្លិប​ភ្នំពេញ​ក្រោ​ន លើក​ទី​១​កីឡាករ​ដែល​និយាយ​ខ្មែរ​បាន​ច្បាស់​តិចៗ រូបនេះ​ត្រូវ​បាន​លោកគ្រូ​បង្វឹក​ក្រុម​ជម្រើសជាតិ​នៅ​គ្រានោះ​ទាំង​លោក Lee Tae Hoon និង​លោក Kazunori Ohara កោះហៅ​ឲ្យ​ជម្រើសជាតិ​ឈុត​ធំ​គ្រប់ពេល ផងដែរ ក្នុង​នោះ​មាន​ទាំង​ប្រកួត​ជម្រុះ World Cup 2018 ជើង​ទី​១ ប្រចាំ​ទ្វីបអាស៊ី ជាមួយ​ក្រុម​ម៉ា​កាវ ទាំង​២​ប្រកួត និង​ប្រកួត​ជាមួយ​សិង្ហ​បុរី ចន្លោះ​ដែលរូប​គេ​ស្នាក់​នៅ​ប្រទេស​កម្ពុជា​លើក​ដំបូង​ផង​ដែរ​៕

Source: Kampuchea Thmey Daily