មហា​ទស្សនីយភាព​បែប​កំណាព្យ​ប្រវត្តិសាស្ត្រ​ដ៏​ធំ​មួយ​ «​អាណាចក្រ​អង្គរ​» ​សម្ពោធ​បើក​ឲ្យ​ប្រើ​ប្រាស់​ជា​ផ្លូវការ​

សៀមរាប ​៖ គម្រោង​វប្បធម៌​សំខាន់​មួយ​ «​ផ្លូវ​មួយ ​ខ្សែ​ក្រវាត់​មួយ​»​ និង​គម្រោង​កិច្ចសហប្រតិបត្តិការ​ទេសចរណ៍​វប្បធម៌​កម្ពុជា ចិន បានដាក់​សម្តែង​ជា​ផ្លូវការ​លើកដំបូង នៃ​មហា​ទស្សនីយភាព​បែប​កំណាព្យ​ប្រវត្តិសាស្ត្រ​ដ៏​ធំ​មួយ ​«​អាណាចក្រ​អង្គរ​» នា​រសៀល​ថ្ងៃទី​៦ ខែធ្នូ ឆ្នាំ​២០១៨​នេះ​។​
​
សម្ដេច​រាជបុត្រី​ព្រះរាម នរោត្តម បុប្ផា​ទេវី ឧត្ដម​ប្រឹក្សា​ផ្ទាល់​ព្រះមហាក្សត្រ នៃ ព្រះរាជាណាចក្រ​កម្ពុជា ឯកឧត្ដម​បណ្ឌិត ឃឹម​ប៊ុន សុង អភិបាលខេត្ត​សៀម​រាម លោក​ឧកញ៉ា ពុង​ខៀវ​សែ លោក Cao Yun De ប្រធាន​ក្រុម​ហ៊ុម khmer Resources Investment Holding Group Co,Ltd លោក ​Liu Jie​អនុប្រធាន​គណៈកម្មាធិការ​អចិន្ត្រៃយ៍ ​នៃ​សភា​ប្រជាជន​ចិន​ស៊ី​ឈួន និង​ជា​ប្រធាន ​នៃ​សមាគម លើក​កម្ពស់​ស៊ី​ឈួន លោក Liu Zhi Jie នាយក​ស្ថានទូត​ចិន​ប្រចាំ​នៅ​ខេត្តសៀមរាប ប្រទេស​កម្ពុជា ព្រមទាំង​ប្រធាន​មន្ទីរ​វប្បធម៌ ប្រធាន​មន្ទីរ​ទេសចរណ៍ និង​ភ្ញៀវ​ជាតិ និង​អន្តរជាតិ​ដទៃ ​បាន​អញ្ជើញ​ចូល​រួម​ជា​ភ្ញៀវកិត្តិយស​។​
​
លោក Liu Zhi Jie បាន​មាន​ប្រសាសន៍​ថា «​អាណាចក្រ​អង្គរ​»​គឺជា​គម្រោង​វប្បធម៌​សំខាន់​មួយ​ នៃ​គម្រោង ​«​ផ្លូវ​មួយ​​ ខ្សែ​ក្រវាត់​មួយ​» ​ហើយក៏​ជា​បណ្តុំ ទេសចរណ៍​វប្បធម៌​ចំណាស់​រវាង​ប្រទេស​ទាំងពីរ គឺ​កម្ពុជា និង​ចិន ដែលមាន​ទំហំធំធេង​មួយ​ ដែល​យើង​បាន​សហការ​ចាប់ដៃគ្នា​។

លោក​បន្តថា «​កម្ពុជា និង​ចិន គឺជា​ប្រទេសជិតខាង​ក្នុង​តំបន់​ដែលមាន​ទំនាក់ទំនង​ល្អ​នឹង​គ្នា​ ជា​ប្រវត្តិ​សាស្ត្រ​ មិន​ថា​ទំនាក់ទំនង​ខាង​ការទូត វប្បធម៌​ និង​ប្រពៃណី​។ ក្នុង​រយៈពេល​ជាច្រើន​ឆ្នាំ​កន្លងមកនេះ​ទំនាក់ទំនង​រវាង​ប្រទេស​ទាំងពីរ បាន​រីកចម្រើន​យ៉ាង​ខ្លាំងក្លា​គួរ​ឲ្យ​កត់សំគាល់​ រវាង​ភាគី នៃ​ប្រទេស​ទាំងពីរ ជាពិសេស​លើ​វិស័យ​សេដ្ឋកិច្ច នយោបាយ វប្បធម៌​ប្រពៃណី និង​វិស័យ​ផ្សេងៗ​ទៀត​»​។

ក្រោយពី ​«​អាណាចក្រ​អង្គរ​»​ បាន​បន្តធ្វើ​ការអនុវត្ត​​វប្បធម៌​ដ៏​ធំ និង​កម្រ​មួយ​ជាមួយ ​«​ស្នាមញញឹម​អង្គរ​»​រួចមក​នេះ​ គឺជា​វេទិកា​ដ៏​សំខាន់​មួយទៀត ​ដែល​នាំមក​នូវ​អារ្យធម៌​អង្គរ​ និង​វប្បធម៌​ដ៏​យូរអង្វែង​មួយ​ដែល​មិន​ធ្លាប់មាន​ពីមុនមក​។​
​
លោក​ឧកញ៉ា ពុង ខៀវ សែ ប្រធាន​ក្រុមប្រឹក្សាភិបាល​ក្រុមហ៊ុន​កា​ហេង​ បាន​មាន​ប្រសាសន៍​ថា «​សាល មហោស្រព​ គឺជា​មជ្ឈមណ្ឌល​វប្បធម៌​ទេសចរណ៍​ដ៏​សំខាន់​មួយ​ ដែល​ផ្តោត​លើ​ការ​សម្ដែង និង​បានធ្វើ​ឲ្យ​ក្រុង​សៀមរាប​កាន់តែ​ប្រសើរ​ឡើង ហើយ​គឺជា​គម្រោង ទេសចរណ៍​ថ្មី​មួយ​នៅ​ក្នុង​ព្រះរាជាណាចក្រ​កម្ពុជា​យើង​ផង​ដែរ​»​។

ការ​វិនិយោគ ប្រកបដោយ​ភាព​ជោគជ័យ នៃ គម្រោង​«​អាណាចក្រ​អង្គរ​» ​បានធ្វើ​ឲ្យ​មាន​ប្រសិទ្ធភាព​ការងារ ចេញ​ជា​លទ្ធផល បង្ហាញ​មក​យ៉ាង​ល្អ ជាពិសេស​នៅ​ថ្ងៃ​អនាគត ​នឹងមាន​ក្រុមហ៊ុន​ចិន​កាន់​តែ​ច្រើន​ចូលរួម ក្នុងការ​វិនិយោគ និង​សាងសង់​សំណង់​នៅក្នុង​ព្រះរាជាណាចក្រ​កម្ពុជា​។

លោក​បាន​បញ្ជាក់ថា គម្រោង​នេះ ​មាន​ទីតាំង​ស្ថិតនៅក្នុង​ទីក្រុង​សៀមរាប នៃ​ព្រះរាជាណាចក្រ​កម្ពុជា មាន​ចម្ងាយ​ត្រឹម​៥​គីឡូម៉ែត្រ​ ពី​ប្រាសាទអង្គរវត្ត ដែលជា​អច្ឆរិយ​មួយ​ក្នុងចំណោម​អច្ឆរិយ​ទាំង​ប្រាំពីរ​ដ៏​ល្បី​លើ​ពិភពលោក ​វា​ជា​កន្លែង​តែមួយគត់ នៅក្នុង​ក្រុង​សៀមរាប ​ដែល​ត្រូវ​ឆ្លងកាត់ មុននឹង​ទៅ​ដល់​ប្រាសាទអង្គរវត្ត​។ នេះ​គឺជា​គម្រោង​ការអនុវត្ត​វប្បធម៌ ​«​ផ្លូវ​មួយ​​ខ្សែ​ក្រវាត់​មួយ​»​ ដំបូងបង្អស់​របស់​ប្រទេស​ចិន ដែល​បាន​ទៅដល់​ដែនដី​ខាងក្រៅ​។ រោង​មហោស្រព​អង្គរ ​ត្រួវបាន​សាងសង់​លើ​ទំហំ​ដី​៦.០០០​ម៉ែត្រការ៉េ អាច​ផ្ទុក​ទស្សនិកជន​បាន​ជាង​១.៣០០​នាក់​ ក្នុងពេល​តែមួយ ដែល​បច្ចុប្បន្ន​នេះ​គឺជា​មហោស្រព​សំដែង​មាន​លក្ខណៈ​ទូលំទូលាយ​បំផុត​នៅ​ក្នុង​ប្រទេស​កម្ពុជា និង​អាស៊ីអាគ្នេយ៍ និង​មាន​ស្តង់ដារ​អន្តរជាតិ​។
​
លោក​zhou xiaoheng អ្នកចាត់ការ ទូទៅ​ នៃ​ក្រុមហ៊ុន​កា​ហេង អន្តរជាតិ​បាន និយាយថា គម្រោង​នេះ​គឺជា​គម្រោង​អចិន្ត្រៃយ៍​ដំបូង​គេ​បង្អស់​ នៃ​គម្រោង​កិច្ច​សហ​ប្រតិបត្តិការ​អន្តរជាតិ​មួយ ​«​ផ្លូវ​មួយ​​ខ្សែ​ក្រវាត់​មួយ​»​។ វា​ក៏​ជា​វេទិកា​ដ៏​សំខាន់​មួយ​សម្រាប់​ខេត្ត​ស៊ី​ឈួន​ ដើម្បី​លើកកម្ពស់​ការអភិវឌ្ឍន៍​វប្បធម៌​នៅ​ក្នុង​ប្រទេស​កម្ពុជា​ និង​អាស៊ីអាគ្នេយ៍ ​បច្ចុប្បន្ន​នេះ ​ជា​មហោស្រព​សម្ដែង ​ដែល​ទំនើប​បំផុត​នៅ​អាស៊ីអាគ្នេយ៍​។​
​
សម្ដេច​រាជបុត្រី​ព្រះរាម នរោត្តម បុប្ផា​ទេវី ឧត្ដម​ប្រឹក្សា​ផ្ទាល់​ព្រះមហាក្សត្រ ថ្លែង​ថា កម្ពុជា​យើង និង​ចិន មាន​ទំនាក់ទំនង​ជាច្រើន​សតវត្ស​មកហើយ​។

ឆ្នាំនេះ​គឺជា​ខួប​លើក​ទី​៦០ នៃ​ទំនាក់ទំនង​ការទូត​កម្ពុជា និង​ចិន ហើយ​បច្ចុប្បន្ន​ទំនាក់ទំនង​នេះ បាន​ក្លាយ​ទៅជា​ដៃគូ​យុទ្ធសាស្ត្រ​គ្រប់​ជ្រុងជ្រោយ​។ តាមរយៈ​កិច្ចសហ​ប្រតិបត្តិការ​ផ្លូវ​មួយ ​ខ្សែ​ក្រវាត់​មួយ បច្ចុប្បន្ន​ក្រុមហ៊ុន​វិនិយោគ​ទេសចរណ៍​វប្បធម៌​ចិន បាន​សហការ​រួមគ្នា​ជាមួយ​ក្រុមហ៊ុន​កា​ហែង​ កម្ពុជា បាន​បង្កើតឡើង​នូវ​គម្រោង​ទេសចរណ៍​វប្បធម៌​អាណាចក្រ​អង្គរ ដោយ​បាន​បង្កើត​ស្នាដៃ​ថ្មី​នៅ​ក្នុង​ការ​ផ្លាស់ប្ដូរ​វប្បធម៌​ទេសចរណ៍ នៃ​ប្រទេស​ទាំងពីរ​។

សម្ដេច​រាជបុត្រី​ព្រះរាម​សង្ឃឹមថា ការសហការ​គ្នា​រវាង​អាណាចក្រ​អង្គរ និង​ក្រសួង​វប្បធម៌ និង​វិចិត្រ​សិល្បៈ និង​អាជ្ញាធរ​ខេត្ត​សៀមរាប ​នឹង​បន្ត​ការ​សហការ​គ្នា​ឲ្យ​បាន​ល្អ​ ប្រកបដោយ​ជោគជ័យ​ថែម​ទៀត​៕

 

​

Source: Kampuchea Thmey Daily