រតនគិរី ៖ រថយន្តឡង់គ្រីស័រកាត់ទ្រុងកែច្នៃដឹកឈើប្រណិតពេញប្រៀប បើកចេញពីភូមិសមុទ្រលើឃុំសេដា ស្រុកលំផាត់ ខេត្តរតនគិរី ឆ្លងកាត់ក្បែរស្នាក់ការប៉េអឹមស្រុកបរកែវ ឆ្ពោះមកចូលតាមច្រករបៀងក្បែរច្រកទ្វារអន្តរជាតិអូរយ៉ាដាវ បានយ៉ាងរលូន។
ជាក់ស្ដែងកាលពីព្រឹកព្រលឹមថ្ងៃទី២៧ ខែធ្នូ ឆ្នាំ២០១៨នេះ មានរថយន្តដឹកឈើមួយគ្រឿងម៉ាកឡង់គ្រីស័រកែច្នៃ ដែលត្រូវបានគេស្គាល់ឈ្មោះ ទី ភេទប្រុស ជាឈ្មួញដឹកឈើជាយូរឆ្នាំមកហើយ មិនត្រូវបានស្ថាប័នសមត្ថកិច្ចជំនាញពាក់ព័ន្ធទប់ស្កាត់ និងបង្ក្រាបឡើយ ដោយសារជាឆ្នាំងបាយរបស់ខ្លួនទើបមិនធ្វើការបង្ក្រាបបែបនេះ។ បើរថយន្តដឹកឈើមួយគ្រឿងនេះមិនបានចូលទៅបង់លុយឲ្យសមត្ថកិច្ចវិញនោះ គេនឹងធ្វើការបង្ក្រាបភ្លាមៗ ដើម្បីយកស្នាដៃឲ្យថ្នាក់លើបានដឹងថា ខ្លួនបានធ្វើការទប់ស្កាត់បង្ក្រាបរថយន្តដឹកឈើនេះ។
លោកញ៉ែម ស៊ីណាត កម្លាំងប៉េអឹមលើផ្ទៃប្រទេសប្រចាំទិសនៅខេត្តរតនគិរី កាលពីព្រឹកថ្ងៃទី២៧ធ្នូនេះ កម្ពុជាថ្មី បានទំនាក់ទំនងតាមប្រព័ន្ធទូរស័ព្ទ ដោយលោកមិនលើកទូរស័ព្ទ។
ចំណែកលោក ស៊ឹម លិន អភិបាលរងស្រុកអូរយ៉ាដាវ ជាប្រធានគណៈកម្មាធិការទប់ស្កាត់បទល្មើសព្រៃឈើ កម្ពុជាថ្មី មិនអាចទំនាក់ទំនងតាមប្រព័ន្ធទូរស័ព្ទ កាលពីព្រឹកព្រលឹមថ្ងៃទី២៧ធ្នូនេះបានទេ ដោយលោកមិនលើកទូរស័ព្ទដូចគ្នា។
បើតាមប្រភពពីក្រុមឈ្មួញដឹកឈើបន្តិចបន្តួចបានត្អូញត្អែរថា ពួកគាត់រកស៊ីដឹកឈើសព្វថ្ងៃនេះមិនចំណេញទេ ដោយសារសមត្ថកិច្ចយាមតាមដងផ្លូវយកច្រើនពេក បើគាត់ឲ្យតិចមិនយកទេ សមត្ថកិច្ចនិយាយថា បើមិនរកចំណេញទេ ឈប់រកស៊ីទៅ។
សូមបញ្ជាក់ថា សមត្ថកិច្ចដែលយាមនៅតាមដងផ្លូវជាតិលេខ៧៨ ចាប់ពីក្រុងបានលុងរហូតដល់ច្រកទ្វារអន្តរជាតិអូរយ៉ាដាវ មានប្រមាណ៧០ស្ថាប័ន ដែលសមត្ថកិច្ចទាំងនេះ បានទទួលលាភសក្ការៈពីក្រុមឈ្មួញដឹកជញ្ជូនឈើយកទៅលក់នៅប្រទេសវៀតណាម ប៉ុន្តែរថយន្តណាមិនបានចូលបង់លុយឲ្យ ហើយបើកគេចពីសមត្ថកិច្ចដែលយាមនៅតាមដងផ្លូវនោះ គេនឹងធ្វើការចុះបង្ក្រាបភ្លាមៗតែម្ដង៕
Source: Kampuchea Thmey Daily
0 Comments