ពាក់មួកសុវត្ថិភាព ដើម្បីការពារអាយុជីវិតអ្នក មិនមែនដើម្បីការពារប៉ូលិសផាកនោះទេ

Cambodia News December 27, 2018

ឧត្តរមានជ័យ ៖ នាព្រឹកទី២៦ ខែធ្នូ ឆ្នាំ២០១៨នេះ អនុគណៈកម្មការសុវត្ថិភាពចរាចរណ៍ផ្លូវគោកខេត្តឧត្តរមានជ័យ បានបើកយុទ្ធនាការរឹតបន្តឹងការអនុវត្តច្បាប់ចរាចរណ៍ផ្លូវគោក និងចែកមួកសុវត្ថិភាពជូនប្រជាពលរដ្ឋចំនួន២០០មួក ដែលពិធីនេះបានប្រារព្ធធ្វើឡើងនៅបរិវេណផ្លូវរង្វង់មូលជ័យវរ្ម័នទី៧ ក្រោមអធិបតីភាពឯកឧត្ដម លឹម សុខតូ អភិបាលខេត្តឧត្តរមានជ័យស្តីទី។

ក្នុងនោះផងដែរ ក៏មានការអញ្ជើញចូលរួម លោក សាំង ប៊ុនថេន ប្រធានមន្ទីរសាធារណការ និងប៉ូលិសចរាចរណ៍ផ្លូវគោក នៃស្នងការដ្ឋាននគរបាលខេត្តឧត្តរមានជ័យ ព្រមទាំងមន្ត្រីអ្នកពាក់ព័ន្ធជាច្រើនរូបផងដែរ។

នៅក្នុងយុទ្ធនាការនេះ ឯកឧត្ដម សុខតូ បានស្នើសុំឲ្យប្រជាពលរដ្ឋចូលរួមអនុវត្តច្បាប់ចរាចរណ៍ផ្លូវគោកទាំងអស់គ្នា និងបើកបរម៉ូតូត្រូវពាក់មួកសុវត្ថិភាពគោរពច្បាប់ចរាចរណ៍ ដើម្បីការពារនូវអាយុជីវិត។ ឯកឧត្ដម ក៏បានណែនាំដល់កម្លាំងចរាចរណ៍ត្រូវមានឥរិយាបថទន់ភ្លន់ចំពោះប្រជាពលរដ្ឋ ដោយត្រូវអប់រំណែនាំអំពីសារប្រយោជន៍ពាក់មួកសុវត្ថិភាព និងច្បាប់ចរាចរណ៍ផ្លូវគោកជាគោលសំខាន់ៗដល់ពួកគាត់ ដោយមិនត្រូវប្រើប្រាស់អាកប្បកិរិយាណាមួយមិនសមរម្យនោះឡើយ ។

ដោយឡែក រាល់អ្នកបើកបរត្រូវគិតថា ការពាក់មួកសុវត្ថិភាព គឺដើម្បីការពារអាយុជីវិតរបស់អ្នក មិនមែនពាក់ដើម្បីការពារប៉ូលិសផាកនោះឡើយ។

នៅក្នុងយុទ្ធនាការនេះ មន្ទីរសាធារណការខេត្តឧត្តរមានជ័យ បានចែកមួកសុវត្ថិភាពប្រមាណ២០០មួកជូនដល់ប្រជាពលរដ្ឋ សិស្សានុសិស្ស និងបិទចំណាំងប្លាតតាមម៉ូតូជូនពួកគាត់ផងដែរ៕