ភ្នំពេញ ៖ រថយន្តមិនស្គាល់ម៉ាក បុកបុរសចំណាស់ដើរថ្មើរជើងម្នាក់ បណ្តាលឲ្យស្លាប់ភ្លាមៗ នៅកន្លែងកើតហេតុ រួចគេចខ្លួនបាត់ នាវេលាម៉ោង១៨និង៣០នាទី កាលពីថ្ងៃទី១០ ខែធ្នូ ឆ្នាំ២០១៨ ត្រង់ចំណុចមុខក្រុមហ៊ុន MH (រោងចក្រអាល់កុល) លើផ្លូវជាតិលេខ៥ ភូមិឌួង សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។
រថយន្តបង្ក (គេចខ្លួនពីកន្លែងកើតហេតុមិនស្គាល់អត្តសញ្ញាណ ) ធ្វើដំណើរលើផ្លូវជាតិលេខ៥ ក្នុងទិសដៅពីត្បូងទៅជើង បើកបរដោយឈ្មោះ (គេចខ្លួនពីកន្លែងកើតហេតុ) លុះមកដល់កន្លែងកើតហេតុ ក៏បានបុកអ្នកថ្មើរជើងម្នាក់ ដើរក្នុងទិសដៅពីលិចទៅកើត ឈ្មោះ សំ សឿន ភេទប្រុស អាយុ៦៥ឆ្នាំ ជនជាតិខ្មែរ ស្នាក់នៅភូមិព្រៃល្វា ឃុំពញាឮ ស្រុកពញាឮ ខេត្តកណ្តាល។
សមត្ថកិច្ចបានឲ្យដឹងថា ក្នុងករណីនេះបណ្តាលឲ្យស្លាប់មនុស្សម្នាក់នៅកន្លែងកើតហេតុ ហើយមូលហេតុបណ្តាលមកពីរថយន្ត បើកបរលឿនខ្វះការប្រុងប្រយ័ត្ន។
ក្រោយកើតហេតុ សព ត្រូវបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ហើយក្នុងករណីខាងលើ សមត្ថកិច្ចយើងកំពុងធ្វើការស្រាវជ្រាវបន្ត៕
Source: Kampuchea Thmey Daily
0 Comments