ជនជាតិ​អូស្ត្រាលី​ស្ថិតក្នុង​ចំណោម​សកម្មជន​រាប់រយ​នាក់​ដែល​ត្រូវ​ចាប់ខ្លួន​នៅ​ប្រទេស​ឥណ្ឌូនេស៊ី​

ប៉ូលិស​និង​ក្រុម​សិទ្ធិមនុស្ស​បាន​និយាយ​កាលពី​ថ្ងៃ​ចន្ទ​ថា ជនជាតិ​អូស្ត្រាលី​ម្នាក់​គឺ​ស្ថិតក្នុង​ចំណោម​សកម្មជន​ឯករាជ្យ​គាំទ្រ​ជនជាតិ​ប៉ា​ពួ​រាប់រយ​នាក់​ដែល​ត្រូវបាន​ចាប់ខ្លួន​នៅ​ទូទាំងប្រទេស​ឥណ្ឌូនេស៊ី​កាលពី​ចុង​សប្ដាហ៍​។​
​
អ្នកនាំពាក្យ​ប៉ូលិស​ខេត្ត​ជ្វា​ខាងកើត​លោក Frans Barung Mangera បាន​ប្រាប់ AFP ថា សកម្មជន ចំនួន​២៣៣​នាក់​រួមទាំង​ជនជាតិ​អូស្ត្រាលី​ឈ្មោះ Ronda Amy Harman ផងដែរ​ត្រូវបាន​ឃុំខ្លួន​កាលពី​ថ្ងៃ​សៅរ៍​នៅ​ទីក្រុង Surabaya ដែលជា​ទីក្រុង​ធំ​លំដាប់​ទី​ពីរ​របស់​ប្រទេស​ឥណ្ឌូនេស៊ី​។​
​
ប្រព័ន្ធ​ផ្សព្វផ្សាយ​ក្នុងស្រុក​បាន​រាយការណ៍​ថា ការចាប់ខ្លួន​នេះ​ត្រូវបាន​ធ្វើឡើង​នៅ​អន្តេវាសិកដ្ឋាន​និស្សិត​មួយកន្លែង​។​
​
ពួកគេ​ស្ថិត​ក្នុងចំណោម​សកម្មជន​ជាង​៥០០​នាក់​ដែល​ត្រូវ​វាយលុក​នៅក្នុង​ការបង្ក្រាប​របស់​ប៉ូលិស​ទូទាំងប្រទេស​ហើយ​ស្របគ្នា​នឹង​ការប្រមូលផ្តុំ​ថ្ងៃទី​១​ខែធ្នូ​ដែលជា​កាលបរិច្ឆេទ​ប្រជាជន​ប៉ា​ពួ​ចាត់ទុកថា​ជា​ខួប​នៃ​ឯករាជ្យ​របស់​ពួកគេ​ពី​ប្រទេស​ហូ​ឡង់​។​
​
កោះ​ប៉ា​ពូ​បានប្រកាស​ខ្លួនឯង​ថា​ជា​ប្រទេស​ឯករាជ្យ​មួយ​នៅ​ឆ្នាំ​១៩៦១​ប៉ុន្តែ​ឥណ្ឌូនេស៊ី​ដែល​នៅ​ជិតខាង​បាន​ត្រួតត្រា​តំបន់​នេះ​ដោយ​កងកម្លាំង​នៅ​ឆ្នាំ​១៩៦៣​។ វា​បានកា​ត់យ​កកោះ​ប៉ា​ពួ​ជា​ផ្លូវការ​ក្នុង​ឆ្នាំ​១៩៦៩​ជាមួយនឹង​ការបោះឆ្នោត​គាំទ្រ​ដោយ​អង្គការសហប្រជាជាតិ​ដែល​ត្រូវបាន​គេ​មើលឃើញ​ជាទូទៅ​ថា​ជា​រឿង​ដ៏​អាម៉ាស់​មួយ​។​
​
លោក Mangera បាន​និយាយថា មិនមាន​នរណាម្នាក់​ត្រូវបាន​គេ​ចោទប្រកាន់​ជា​ផ្លូវការ​ទេ​ក្នុងការ​ចាប់ខ្លួន​នៅ Surabaya រួមទាំង​លោកស្រី Harman ផងដែរ​។ លោក​បាន​បន្ថែមថា ស្ត្រី​អាយុ​៣៥​ឆ្នាំ​រូបនេះ​ត្រូវបាន​រាយការណ៍​ទៅកាន់​មន្ត្រី​អន្តោប្រវេសន៍​។​
​
ស្របពេល​ជាមួយគ្នា​នោះដែរ អ្នកនាំពាក្យ​នៅ​ស្ថានទូត​អូស្ត្រាលី​ប្រចាំ​ទីក្រុង​ហ្សា​ការ​តា​មិនអាច​ទាក់ទង​បាន​ភ្លាមៗ​ដើម្បី​សុំ​ការបំភ្លឺ​បានឡើយ​។​
​
អង្គការ​លើកលែងទោស​អន្តរជាតិ​បាន​និយាយថា ការចាប់ខ្លួន​នេះ​បាន​ធ្វើឡើង​បន្ទាប់ពី​បាតុកម្ម​មួយ​ដែល​ក្នុងនោះ បាតុករ​មួយក្រុម​ទៀត​បាន​គប់​ដុំថ្ម​ដាក់​ជនជាតិ​ប៉ា​ពួ​ប្រហែល​៣០០​នាក់​និង​បណ្តាល​ឲ្យ​មនុស្ស​១៦​នាក់​រងរបួស​៕ AFP

​

Source: Kampuchea Thmey Daily