ប្រទេស​ចិន​ស៊ើបអង្កេត​ជនជាតិ​កាណាដា​ពីបទ​សង្ស័យថា ធ្វើអោយប៉ះពាល់​ដល់​សន្តិ​សុខ​ជាតិ​

ជនជាតិ​កាណាដា​ទី​ពីរ​ត្រូវបាន​គេ​រាយការណ៍​ថា​កំពុង​ស្ថិតក្រោម​ការស៊ើបអង្កេត​ពីបទ​សង្ស័យថា បង្ក​ផលប៉ះពាល់​ដល់​សន្តិសុខ​ជាតិ​។ សេចក្តីរាយការណ៍​នេះ​បានធ្វើអោយ​មាន​ភាព​តានតឹង​បន្ថែមទៀត​បន្ទាប់ពី​ការចាប់ខ្លួន​នាយក​ប្រតិបត្តិ​ទូរគមនាគមន៍​កំពូល​របស់​ចិន​ដោយ​ប្រទេស​កាណាដា​តាម​សំណើ​របស់​សហរដ្ឋអាមេរិក​។​
​
ទីភ្នាក់ងារ​ព័ត៌មាន​ផ្លូវការ​របស់​ខេត្ត Liaoning បាន​និយាយ​កាលពី​ថ្ងៃ​ព្រហស្បតិ៍​ថា លោក Michael Spavor ដែលជា​អ្នកពិគ្រោះ​យោបល់​ផ្នែក​ជំនួញ​មាន​មូលដ្ឋាន​នៅ​ប្រទេស​ចិន​ដែល​សម្របសម្រួល​ការធ្វើ​ដំណើរ​ទៅ​ប្រទេស​កូរ៉េខាងជើង​ត្រូវ​បានដាក់​នៅក្រោម​ការស៊ើបអង្កេត​កាលពី​ថ្ងៃ​ចន្ទ​ដោយ​សន្តិសុខ​រដ្ឋ​នៅក្នុង​ទីក្រុង Dandong ភាគ​ឦសាន​។​
​
ព័ត៌មាន​អំពី​ការបាត់​ខ្លួន​របស់គាត់​បាន​លេចឡើង​បន្ទាប់ពី​អតីត​អ្នកការទូត​កាណាដា​លោក Michael Kovrig ត្រូវបាន​ឃុំឃាំង​ដោយ​សន្តិសុខ​រដ្ឋ​ក្នុងអំឡុង​ពេលធ្វើ​ទស្សនកិច្ច​នៅ​ទីក្រុង​ប៉េកាំង​ក្រោម​ការសង្ស័យ​ស្រដៀង​គ្នា​នេះ​។​
​
ការចាប់ខ្លួន​លោក Kovrig ត្រូវបាន​អ្នកជំនាញ​មើលឃើញថា ជាការ​សងសឹក​ចំពោះ​ការចាប់ខ្លួន​ដោយ​ប្រទេស​កាណាដា​លើ​លោកស្រី Meng Wanzhou ដែលជា​មន្ត្រី​ហិរញ្ញវត្ថុ​ជាន់ខ្ពស់​របស់​ក្រុមហ៊ុន​ទូរគមនាគមន៍ Huawei ដ៏​ធំ​របស់​ចិន​តាម​សំណើ​របស់​ទីក្រុង​វ៉ាស៊ីនតោន​លើ​ការចោទប្រកាន់​ទាក់ទង​នឹង​ការបំពាន​ទណ្ឌកម្ម​អ៊ីរ៉ង់​។​
​
ភ្នាក់ងារ​ព័ត៌មាន​ចិន​បាន​បន្ថែមថា លោក Spavor ត្រូវបាន​គេ​សង្ស័យថា​បាន​ចូលរួម​នៅក្នុង​សកម្មភាព​ដែល​ប៉ះពាល់​ដល់​សន្តិសុខ​ជាតិ​របស់​ប្រទេស​ចិន​។​
​
ដោយមាន​មូលដ្ឋាន​នៅ​ខេត្ត Liaoning ដែល​ជាប់​ព្រំដែន​កូរ៉េខាងជើង លោក​បាន​ជួប​ជាមួយ​មេដឹកនាំ​កូរ៉េខាងជើង​លោក​គីម​ជុង​អ៊ុន​ហើយ​បាន​រៀប​ដំណើរ​ទស្សនកិច្ច​របស់​លោក Dennis Rodman ដែលជា​អតីត​កីឡាករ​បាល់បោះ NBA ចូលនិវត្តន៍​។​
​
រដ្ឋាភិបាល​កាណាដា​បាន​រាយការណ៍​ពីមុន​ថា លោក Spavor បាន​បាត់​ខ្លួន​នៅក្នុង​ប្រទេស​ចិន​បន្ទាប់ពី​ត្រូវបាន​គេ​សាកសួរ​។​
​
រដ្ឋមន្ត្រីការបរទេស​កាណាដា​លោកស្រី Chrystia Freeland បាន​និយាយថា រដ្ឋាភិបាល​កាណាដា​បានលើកឡើង​អំពី​ករណី​របស់គាត់​ជាមួយ​អាជ្ញាធរ​ចិន​។​
​ក្រសួងការបរទេស​ចិន​មិនបាន​ឆ្លើយតប​ភ្លាមៗ​ទេ​ចំពោះ​ការសាកសួរ​៕ AFP

​

Source: Kampuchea Thmey Daily