ផ្លូវជាតិលេខ៤៨ ចាប់ពីផ្លូវបំបែកស្រែអំបិល-ទីរួមខេត្តកោះកុង ត្រូវបានបញ្ចប់ការជួសជុលជាស្ថាពរ

កោះកុង ៖ កាលពីថ្ងៃពុធ ៥កើត ខែមិគសិរ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១២ ខែធ្នូ ឆ្នាំ២០១៨ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំគណៈប្រតិភូជិះកង់ពិនិត្យ គុណភាព នៃការជួសជុលថែទាំផ្លូវជាតិលេខ៤៨ បន្ទាប់ពីការងារជួសជុលថែទាំផ្លូវនេះត្រូវបានបញ្ចប់ទាំងស្រុង។

ផ្លូវនេះមានប្រវែង សរុប១៥០គីឡូម៉ែត្រ ចាប់ពីផ្លូវបំបែកស្រែអំបិលទៅដល់ទីរួមខេត្តកោះកុង ដែលក្នុងនោះកំណាត់ផ្លូវប្រវែង៦៣គីឡូម៉ែត្រ ត្រូវទទួលរងការខូចខាតដោយជំនន់ទឹកភ្លៀង ការដឹកជញ្ជូនលើសទម្ងន់កម្រិតកំណត់ និងកត្តាធម្មជាតិផ្សេងៗ។

លោកទេសរដ្ឋមន្ត្រី ស៊ុន ចាន់ថុល បានបញ្ជាក់ថា ផ្លូវនេះត្រូវបានជួសជុលចប់សព្វគ្រប់១០០%ហើយ តាមការសន្យា ដែលអាចឲ្យប្រជាពលរដ្ឋធ្វើចរាចរណ៍ និងដឹកទំនិញទៅកាន់ទីផ្សារកាន់តែឆាប់រហ័ស ជាពិសេសភ្ញៀវទេសចរណ៍ ជាតិ និងអន្តរជាតិ អាចធ្វើដំណើរទៅទស្សនាពិធីបុណ្យសមុទ្រ ដែលគ្រោងនឹងប្រារព្ធឡើងនៅលើទឹកដី ខេត្តកោះកុង ចាប់ពីថ្ងៃទី១៤ ដល់១៦ ខែធ្នូ ឆ្នាំ២០១៨ ខាងមុខនេះ ក្រោមប្រធានបទ «ឆ្នេរស្អាត ពលរដ្ឋរមណីយ។

ថ្លែងទៅកាន់ក្រុមអ្នកសារព័ត៌មាន លោកទេសរដ្ឋមន្ត្រីបានបន្ថែមថា ផ្លូវនេះនឹងត្រូវស្តា និងលើកកម្រិតគុណភាពពី DBST ទៅជាផ្លូវបេតុង កៅស៊ូ (AC) ពី ១០ម៉ែត្រទៅ១១ម៉ែត្រ ក្រោមឥណទានប្រាក់កម្ចីរបស់សាធារណរដ្ឋកូរ៉េ (EDCF) ដែលគ្រោងនឹងបើកការដ្ឋាននៅឆ្នាំ២០២០នេះ។

ឆ្លៀតក្នុងឱកាសនោះផងដែរ លោកទេសរដ្ឋមន្ត្រី ស៊ុន ចាន់ថុល បានជម្រាបជូនអំពីគម្រោងដាក់ឲ្យដំណើរការជាផ្លូវការ នូវកម្មវិធីថែទាំផ្លូវ (ROAD CARE mobile app) នៅថ្ងៃទី១៣ ខែធ្នូ ឆ្នាំ២០១៨។

កម្មវិធីលើស្មាតហ្វូននេះ អនុញ្ញាតឲ្យប្រជាពលរដ្ឋថតរូបភាពជង្ហុកសំបុកមាន់ផ្ញើមកកាន់ក្រុមការងារក្រសួង ដើម្បីចុះទៅជួសជុល បានទាន់ពេលវេលា បង្ការកុំឲ្យខូចរាលដាលកាន់តែធំ។

ជាមួយគ្នានេះផងដែរ លោកទេសរដ្ឋមន្ត្រី ក៏បានអំពាវនាវឲ្យប្រជាពលរដ្ឋ ក៏ដូចជាម្ចាស់ក្រុមហ៊ុនដឹកជញ្ជូន សូមកុំផ្ទុកទំនិញលើសទម្ងន់កម្រិតកំណត់ដែលបណ្ដាលឲ្យឆាប់ខូចផ្លូវ និងខាតបង់ថវិកាជាតិ ដែលរាជរដ្ឋាភិបាលខិតខំរកបានដោយលំបាកយកមកកសាងផ្លូវ និងបានក្រើនរំលឹកដល់អ្នកប្រើប្រាស់ផ្លូវទាំងអស់ ឲ្យចូលរួមគោរពច្បាប់ចរាចរណ៍ និងជួយថែរក្សាផ្លូវរបស់យើងឲ្យប្រើប្រាស់ជាប់បានយូរ៕