ភ្នំពេញ ៖ ស្បៀងអាហារ និងសម្ភារៈប្រើប្រាស់ និងថវិកាមួយចំនួន ដែលជាអំណោយមនុស្សធម៌ដ៏ថ្លៃថ្លា របស់ កាកបាទក្រហមកម្ពុជា ដឹកនាំដោយសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ត្រូវបានផ្តល់ជូនដល់កម្មករ កម្មការិនី របស់ក្រុមហ៊ុនស៊ិនទ្រី និងកម្មករ កម្មការិនីនៃមន្ទីរសាធារណការ និងដឹកជញ្ជូនរាជធានីភ្នំពេញ សរុបចំនួន២២៦៥នាក់ កាលពីព្រឹកថ្ងៃទី១២ ខែធ្នូ ឆ្នាំ២០១៨ តាមរយៈលោកស្រីឃួន សុដារី អនុប្រធានកាកបាទក្រហមកម្ពុជា តំណាងដ៏ខ្ពង់ខ្ពស់របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា។
តាមរបាយការណ៍របស់លោកឃួង ស្រេង អភិបាលនៃគណៈអភិបាលរាជធានីភ្នំពេញ និងជាប្រធានកិត្តិយសសាខាកាកបាទក្រហមកម្ពុជា រាជធានីភ្នំពេញ បានឲ្យដឹងថា ក្នុងរយៈពេលបីថ្ងៃនៃពិធីបុណ្យអុំទូក នៅរាជធានីភ្នំពេញ ថ្ងៃទី២១ ,២២ ,២៣ ខែវិច្ឆិកាកន្លងទៅនេះ បានប្រព្រឹត្តទៅក្នុងបរិយាកាសសប្បាយរីករាយនិងអធិកអធមយ៉ាងក្រៃលែង ដែលមានប្រជាពលរដ្ឋ និងភ្ញៀវទេសចរណ៍ជាតិអន្តរជាតិ ចូលរួមយ៉ាងច្រើនកុះករក្នុងប្រមាណជិត៤លាន៥សែននាក់ បានកើនឡើង១៨,ងភាគរយ បើធៀបទៅនឹងឆ្នាំ២០១៧កន្លងទៅនេះ។
លោកបន្តថា ក្នុងនោះចំពោះអនាម័យបរិស្ថានក្នុងព្រះរាជពិធីបុណ្យអុំទូកនេះ សំរាមប្រមូលបានលឿនជាងឆ្នាំមុន និងមានរហូតដល់៨ពាន់៣២១តោន កើនឡើងជាង២ពាន់តោន បើធៀបនឹងឆ្នាំ២០១៧កន្លងទៅនេះដែរ។ ការប្រមូលនិងគ្រប់គ្រងសំរាមដ៏ច្រើនបែបនេះរដ្ឋបាលរាជធានីភ្នំពេញ បានរៀបចំដាក់ចេញនូវកម្មករគ្រប់ផ្នែក សរុប២២៦៥នាក់ដើម្បីធ្វើការប្រមូលវិចខ្ចប់ ដឹកជញ្ជូនសំរាម លៀងសំអាតផ្លូវ និងថែទាំសួនច្បារក្រោយពីបញ្ចប់ពិធីជារៀងរាល់ថ្ងៃ។ ការងារនេះអាជ្ញាធរមូលដ្ឋាន បងប្អូនកម្មករកម្មការិនីយើង បានលះបង់ពេលវេលាក្នុងការសម្រាកពេលយប់ ដើម្បីបំពេញការងារឲ្យបានទាន់ពេលវេលា ធ្វើឲ្យបញ្ហាអនាម័យបរិស្ថាន មានភាពល្អប្រសើរជាងបណ្តាឆ្នាំកន្លងមក និងទទួលបានការគាំទ្រ និងលើកទឹកចិត្តពីសំណាក់បងប្អូនប្រជាពលរដ្ឋនៅគ្រប់មជ្ឈដ្ឋាន។ យ៉ាងណាមិញ ដើម្បីជាការលើកទឹកចិត្តដល់ការខិតខំប្រឹងប្រែងរបស់បងប្អូនបុគ្គលិកកម្មករ ដែលបានខំប្រឹងប្រែងធ្វើអនាម័យបរិស្ថាននៅថ្ងៃនេះ កាកបាទក្រហមកម្ពុជា ស្នាក់ការកណ្តាល បានផ្ដល់អំណោយមនុស្សធម៌ ដើម្បីចែកជូនដល់បងប្អូនកម្មករកម្មការិនីយើង តាមរយៈអំណោយដ៏ថ្លៃថ្លានេះ នឹងអាចជួយសម្រួលការលំបាកនិងខ្វះខាតជីវភាពរបស់បងប្អូនកម្មករកម្មការិនី បានមួយកម្រិត និងជាការលើកទឹកចិត្តដ៏ធំធេងរបស់បងប្អូនបុគ្គលិកកម្មករកម្មការនីយើងផងដែរ។ យើងទាំងអស់គ្នា ក្នុងនាមជាកម្មករកម្មការិនីនិងប្រជាពលរដ្ឋទាំងអស់ក្នុងរាជធានីភ្នំពេញ ពិតជាមានក្តីរំភើបរីករាយឥតឧបមាសូមគោរពដឹងគុណជូនចំពោះសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលតែងតែបានយកចិត្តទុកដាក់ និងដាក់ជាប់មនោសញ្ចេតនា រួមសុខរួមទុក្ខជាមួយនឹងបងប្អូនប្រជាពលរដ្ឋគ្រប់ទីកន្លែង គ្រប់កាលៈទេសៈស្របតាមទិសដៅទីណាមានការលំបាក ទីនោះមានកាកបាទក្រហមកម្ពុជា។
នៅក្នុងឱកាសជួបសំណេះសំណាលជាមួយបងប្អូនកម្មការ កម្មការិនី ទាំង២ស្ថាប័ន លោកស្រី ឃួន សុដារី បានសំដែងនូវមនោសញ្ចេតនាសប្បាយរីករាយ ស្និទ្ធស្នាល ព្រមទាំងបានពាំនាំនូវបណ្ដាំសាកសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនចំពោះបងប្អូនកម្មករកម្មការិនីយើងទាំងអស់ ដែលបំពេញមុខនាទីសម្រាប់ធ្វើអនាម័យបរិស្ថានសម្រាប់រាជធានីភ្នំពេញ ហើយការផ្តាំផ្ញើគឺប្រកបដោយក្តីនឹករលឹក ក៏ដូចជាមនោសញ្ចេតនាស្រឡាញ់រាប់អាន របស់សម្តេចកិត្តិព្រឹទ្ធបណ្ឌិត ដល់បងប្អូនកម្មករកម្មការិនីយើង ដោយបានថ្លែងអំណរគុណដូចជាការកោតសរសើរនិងវាយតម្លៃខ្ពស់ ចំពោះបងប្អូនកម្មករកម្មការិនី ផ្នែកអនាម័យ បរិស្ថាន ទាំងរបស់ក្រុមហ៊ុនស៊ីនទ្រី និងកម្មករកម្មការិនីរបស់មន្ទីរសាធារណការរាជធានីភ្នំពេញ ដោយបងប្អូនបានបំពេញការងារមួយប្រកបដោយភាពថ្លៃថ្នូរ បានពលីកម្ម ដោយយកសុខភាពរបស់ខ្លួន ប្ដូរជាមួយនឹងសុខភាពរបស់អ្នកដទៃ ពិសេសគឺការចូលរួមដើម្បីធ្វើឲ្យសោភ័ណ្ឌភាពរបស់រាជធានីភ្នំពេញ ដែលជាបេះដូង ជាមជ្ឈមណ្ឌលនយោបាយវប្បធម៌ សេដ្ឋកិច្ច របស់ប្រទេសជាតិ មានភាពស្រង់បំព្រង។
លោកស្រី ឃួន សុដារី ក៏បានលើកឡើងដែរថា នៅសល់ជាង១០ថ្ងៃទៀតប៉ុណ្ណោះ រាជធានីភ្នំពេញក៏ដូចជាបងប្អូនប្រជាពលរដ្ឋយើងទាំងអស់ នឹងចូលរួមអបអរនៅក្នុងពិធីសម្ពោធវិមានឈ្នះឈ្នះ ដែលជានយោបាយផ្តួចផ្តើមគំនិត ឡើងដោយសម្ដេចអគ្គមហាសេនាបតីតេជោ ហ៊ុន សែន ហើយដោយសារនយោបាយនេះ ហើយដែលបាននាំមកនូវសុខសន្តិភាពពេញលេញជូនប្រទេសជាតិយើង ព្រោះបើគ្មាន ៧មករាគ្មាននយោបាយឈ្នះឈ្នះ ប្រទេសជាតិយើង ក៏មិនមានការរីកចម្រើនដូចសព្វថ្ងៃនេះដែរ។
លោកស្រីឃួន សុដារី បានលើកឡើងដែរថា តាមរយៈការខិតខំប្រឹងប្រែងរបស់រាជរដ្ឋាភិបាលកម្ពុជា ឃើញថាកម្មករកម្មការិនីទាំងអស់ គឺទទួលបាននូវអត្ថប្រយោជន៍យ៉ាងច្រើន នៅក្នុងនោះប្រាក់បៀវត្ស ក៏ទទួលបានការកើនឡើងជាលំដាប់ រួមនឹងការយកចិត្តទុកដាក់ក្នុងការថែរក្សាសុខភាពជាបន្តបន្ទាប់ ពិសេសសុខភាពស្ត្រីមានផ្ទៃពោះ និងការឆ្លងទន្លេ ដែលនេះគឺជាការជំរុញគោលនយោបាយសមភាពយេនឌ័ររវាងបុរសនិងស្ត្រី។
សូមបញ្ជាក់ថា កម្មករ កម្មការិនី របស់ក្រុមហ៊ុនស៊ិនទ្រី និងកម្មករ កម្មការិនី នៃមន្ទីរសាធារណការ និងដឹកជញ្ជូនរាជធានីភ្នំពេញ សរុបចំនួន២២៦៥នាក់ គឺក្នុងម្នាក់ៗទទួលបានអំណោយអង្ករ៣០គីឡូក្រាម មី១កេះ ត្រីខ១០កំប៉ុង ឃីត១កញ្ចប់និងថវិកា១០ម៉ឺនរៀល៕
Source: Kampuchea Thmey Daily
0 Comments