កីឡាករបាល់ទាត់ល្បីៗ កំពុងតែមានប្រជាប្រិយភាពក្នុងស្រុកជាច្រើន បានបបួលគ្នា ចូលរួមកម្មវិធីប្រកួតបាល់ទាត់មិត្តភាពសប្បុរសធម៌មួយ នៅថ្ងៃទី១០ ខែធ្នូ ខាងមុខ ដោយត្រូវប្រកួតទល់នឹងក្រុមមិនអាជីពរបស់7NG (មានខ្លះជាអតីតកីឡាករជម្រើសជាតិកម្ពុជា) ដើម្បីស្វែងរកមូលនិធិជួយដល់មន្ទីរពេទ្យគន្ធបុប្ផា។
កម្មវិធីសប្បុរសធម៌នេះ គឺផ្ដួចផ្ដើមរៀបចំដោយលោក ស្រី ចាន់ថា ថ្នាក់ដឹកនាំក្រុម 7NG ដើម្បីរួមចំណែកជួយដល់សង្គម តាមរយៈសកម្មភាពបាល់ទាត់។ ហេតុនេះលោកសង្ឃឹមថា យ៉ាងមុតមាំថា ការប្រកួតនេះនឹងទទួលបានការគាំទ្រ និងមានការចូលរួមច្រើនពីសំណាក់អ្នកគាំទ្រវិស័យកីឡាបាល់ទាត់កម្ពុជា ពិសេសអ្នកគាំទ្រកីឡាករជម្រើសជាតិ និងអតីតកីឡាករជម្រើសជាតិ ដែលនឹងចូលរួមក្នុងព្រឹត្តិការណ៍នេះតែម្ដង។
កីឡាករជម្រើសជាតិកម្ពុជាចំនួន៣រូប បានត្រៀមខ្លួនហើយជាស្រេច ក្នុងការចូលរួមនេះ រួមមានកីឡាករ ចាន់វឌ្ឍនាកា, ប្រាក់ មុន្នីឧត្តម និងកីឡាករ ឈិន ឈឿន។ លើសពីនេះ ក៏មានកីឡាករអាជីពមួយចំនួនបានបង្ហាញពីការត្រៀមខ្លួនចូលរួមក្នុងកម្មវិធីនេះផងដែរ ដូចជាម្ចាស់ពានឯកត្តជនរបស់ CNCC ចំនួន ៤ គឺកីឡាករ នួន បូរី ជាដើម។ ចំណែកកីឡាករផ្សេងៗ ដែលកំពុងសម្រាកពីការប្រកួតពានសម្ដេចតេជោ ហ៊ុន សែន និងលីគកំពូលកម្ពុជា ក៏អាចចូលរួមបានដែរ។
គួរបញ្ជាក់ថា សម្រាប់ក្រុមមានការបបួសគ្នាចូលរួមពីសំណាក់កីឡាករអាជីពក្នុងស្រុក នឹងប្រើឈ្មោះថាក្រុមបាល់ទាត់ BFF ហើយត្រូវប្រកួតជាមួយក្រុមបាល់ទាត់ 7NG នាវេលាម៉ោង ៤និង៣០នាទីល្ងាច នៅលើទីលានពហុកីឡដ្ឋានជាតិ ក្នុងរាជធានីភ្នំពេញ នាថ្ងៃច័ន្ទ ទី១០ ខែធ្នូ ឆ្នាំ២០១៨ ខណៈសំបុត្រចូលទស្សនាមានតម្លៃ ៥,០០០រៀល។ ចំពោះថវិកាទទួលបានការលក់សំបុត្រ ក៏ដូចជាការបរិច្ចាគផ្សេងៗ នឹងត្រូវបរិច្ចាគទាំងស្រុង ជូនមន្ទីរពេទ្យគន្ធបុប្ផាតែម្ដង៕
Source: Kampuchea Thmey Daily
0 Comments