ភ្នំពេញ ៖ នគរបាលខណ្ឌឫស្សីកែវ និងប៉ុស្តិ៍រដ្ឋបាលគីឡូម៉ែត្រលេង៦ បានធ្វើការស្រាវជ្រាវរហូតឈានទៅឃាត់ខ្លួនជនសង្ស័យជួញដូរគ្រឿងញៀនខុសច្បាប់ចំនួន២នាក់ រួមទាំងថ្នាំ១៣កញ្ចប់តូចធំកាលពីវេលាម៉ោង៩និង៣០នាទី ព្រឹកថ្ងៃទី៣ ខែធ្នូ ឆ្នាំ២០១៨ ត្រង់ចំណុចផ្ទះលេខ២១៧៩ ក្រុម៧ភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ។
សមត្ថកិច្ចឲ្យដឹងថា នៅមុនពេលឃាត់ខ្លួនជនសង្ស័យទាំង២នាក់នោះ សមត្ថកិច្ចខណ្ឌ និងប៉ុស្តិ៍ បានធ្វើការស្រាវជ្រាវរហូតកំណត់មុខសញ្ញាជនសង្ស័យច្បាស់លាស់ និងឈានទៅការឃាត់ខ្លួនជនសង្ស័យតែម្ដង។
ជនសង្ស័យ ទី១-ឈ្មោះ យ៉ុង ស៊ីបូរ៉ា ហៅបូរ៉ា ភេទប្រុស អាយុ២៨ឆ្នាំ មុខរបរមិនពិតប្រាកដ ស្នាក់នៅផ្ទះជួលកើតហេតុខាងលើ មានស្រុកកំណើតនៅភូមិមិត្តភាព សង្កាត់ឫស្សីកែវ ខណ្ឌឫស្សីកែវរាជធានីភ្នំពេញ។ ទី២-ឈ្មោះ រ៉ូយ៉ាំង ហាំង ហៅរ៉ូ ភេទប្រុស អាយុ២៣ឆ្នាំ ជនជាតិវៀតណាម មុខរបរមិនពិតប្រាកដ ស្នាក់នៅផ្ទះគ្មានលេខ ក្រុម៩ ភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ។
សម្ភារៈដកហូតមានក្រាមពណ៌សថ្លា សង្ស័យគ្រឿងញៀន១៣កញ្ចប់ ក្នុងនោះកញ្ចប់ធំល្មម១កញ្ចប់និងឧបករណ៍សម្រាប់ប្រើប្រាស់គ្រឿងញៀនមួយចំនួន។
ក្រោយឃាត់ខ្លួនជនសង្ស័យ ត្រូវបានសមត្ថកិច្ចកសាងសំណុំរឿងបញ្ជូនទៅអនុវត្តតាមនីតិវិធី៕
Source: Kampuchea Thmey Daily
0 Comments