កណ្ដាល ៖ ជនសង្ស័យម្នាក់ ជាមុខសញ្ញាលួច ធ្លាប់ជាប់ពន្ធនាគារម្តងរួចមកហើយ ពេលចេញមកវិញលួចទៀត ត្រូវនគរបាលស្រុកកៀនស្វាយឃាត់ខ្លួនចាប់វាយខ្នោះ។ ហេតុការណ៍នេះបានកើតឡើងថ្ងៃទី០២ ខែធ្នូ ឆ្នាំ២០១៨ វេលាម៉ោង០១និង៣០នាទី ចំណុចភូមិរទាំង ឃុំភូមិធំ ស្រុកកៀនស្វាយ ខេត្តកណ្ដាល។
ជនរងគ្រោះ ឈ្មោះ ប៉ុល វាសនា ភេទប្រុស អាយុ៥០ឆ្នាំ មានទីលំនៅ ភូមិរទាំង ឃុំភូមិធំ ស្រុកកៀនស្វាយ ខេត្តកណ្តាល មុខរបរមន្ត្រីរាជការ។ ជនសង្ស័យឈ្មោះ សាំង សំរេច ភេទប្រុស អាយុ១៩ឆ្នាំ មានទីលំនៅ ភូមិរទាំង ឃុំភូមិធំ ស្រុកកៀនស្វាយ ខេត្តកណ្តាល មុខរបរមិនពិតប្រាកដ។ ចំណែកសម្ភារៈបាត់បង់មានទូរស័ព្ទម៉ាក oppo S3 ចំនួន០២គ្រឿង (ពណ៌ទឹកប៊ិច១គ្រឿង ពណ៌ ក្រហម១គ្រឿង)។
នគរបាលស្រុកកៀនស្វាយបានឲ្យដឹងថា នៅថ្ងៃខែឆ្នាំវេលាម៉ោងកើតហេតុខាងលើ ខណៈពេលជនរងគ្រោះបានដេកនៅលើសាឡុងខាងក្រៅផ្ទះរបស់ខ្លួន ជនសង្ស័យបានធ្វើសកម្មភាពលួចទូរស័ព្ទជនរងគ្រោះ ក្រោយមកជនរងគ្រោះបានឃើញជនសង្ស័យរត់ចេញពីក្នុងបន្ទប់ក្នុងផ្ទះរបស់ខ្លួន ក៏បានរត់ដេញតាមចាប់ ប៉ុន្តែដេញមិនទាន់ បានរត់គេចខ្លួនបាត់។
បន្ទាប់មកជនរងគ្រោះបានមកប្តឹងនគរបាលប៉ុស្តិ៍ភូមិធំឲ្យជួយអន្តរាគមន៍ ក្រោយទទួលបានពាក្យនគរបាលប៉ុស្តិ៍ ក៏បានចុះទៅដល់កន្លែងកើតហេតុ ស្រាវជ្រាវចាប់ខ្លួនជនសង្ស័យយកមកប៉ុស្តិ៍ ដើម្បីសាកសួរពីដំណើររឿង និងបញ្ជូនមកអធិការដ្ឋាននគរបាលស្រុក បន្តបន្តចាត់ការតាមនីតិវិធីច្បាប់។
បញ្ជាក់ ៖ ជនសង្ស័យ ឈ្មោះ សាំង សំរេច ធ្លាប់ជាប់ពន្ធនាគារម្តងរួចមកហើយ កាលពីថ្ងៃទី២៣ ខែធ្នូ ឆ្នាំ២០១៦ ពីបទលួច(គាស់ផ្ទះ) ប្រព្រឹត្តនៅភូមិ រទាំងត្បូង ឃុំភូមិធំ ស្រុកកៀនស្វាយ ខេត្តកណ្តាល កាលពីថ្ងៃទី២២ ខែធ្នូ ឆ្នាំ២០១៦ ជាប់រយៈពេល ០៧ ខែ៕
Source: Kampuchea Thmey Daily
0 Comments